អ្នកភូមិគោកដូងបុណ្យសម្ពោធភូមិដេញខ្មោចព្រាយបិសាច ឧបទ្រពចង្រៃ
- សៀមរាប
ខេត្តសៀមរាប ៖ បុណ្យសម្ពោធភូមិ ឬហៅបុណ្យភូមិ កាលពីថ្ងៃទី២៦ មេសា ឆ្នាំ២០១៩ ក្នុងភូមិគោកដូង សង្កាត់ទឹកវិល ក្រុងសៀមរាប…
ខេត្តសៀមរាប ៖ បុណ្យសម្ពោធភូមិ ឬហៅបុណ្យភូមិ កាលពីថ្ងៃទី២៦ មេសា ឆ្នាំ២០១៩ ក្នុងភូមិគោកដូង សង្កាត់ទឹកវិល ក្រុងសៀមរាប…
ខេត្តសៀមរាប ៖ បុណ្យសម្ពោធភូមិ ឬហៅបុណ្យភូមិ កាលពីថ្ងៃទី២៦ មេសា ឆ្នាំ២០១៩ ក្នុងភូមិគោកដូង សង្កាត់ទឹកវិល ក្រុងសៀមរាប ។ បុណ្យភូមិនេះធ្វើឡើងដើម្បីដេញខ្មោចព្រាយបិសាច ឧបទ្រពចង្រៃ ចេញពីក្នុងភូមិ សុំសេចក្តីសុខ សេចក្តីចម្រើនជូនប្រជាពលរដ្ឋក្នុងភូមិគោកដូងទាំងអស់ ។
ពិធីបុណ្យក្រោមវត្តមានលោកឧត្តមសេនីយ៍ត្រីហួត សុធី ស្នងការរងទទួលផែនការងារសន្តិសុខ និងជាប្រធានក្រុមការងារចុះជួយភូមិគោកដូង ដោយមានការចូលរួមពីលោកមេភូមិ និងលោកតាអាចារ្យវត្ត យាយជី តាជី ព្រមទាំងអ្នកភូមិគោកដូង ប្រមាណ៦៣៥គ្រួសារ ។
លោកតាអាចារ្យឡុង តិក អាយុ៦៨ឆ្នាំ មានប្រសាសន៍ថា អ្នកភូមិគោកបានមូលមតិគ្នាផ្តួចផ្តើមធ្វើបុណ្យសម្ពោធភូមិនេះឡើង ជាលើកទី២ ក្រោយរយៈពេល២៨ឆ្នាំ ។ ការរៀបចំធ្វើបុណ្យសម្ពោធភូមិនេះលើកទី១ កាលពីជំនាន់លន់ នល់ មានអ្នកភូមិចូលរួមប្រមាណ៨៥គ្រួសា ។
ពិធីរៀបចំធ្វើឡើង៩ទិស ៖ទិសទី១/ទិសកណ្តាល (ផ្ចិតភូមិមេ) មានព្រះសង្ឃគង់នៅ ៣អង្គ ដើម្បីសូត្រធម៌ ដេញខ្មោចព្រាយបិសាចចេញពីក្នុងភូមិ ឱ្យប្រជាពលរដ្ឋមានសេចក្តីសុខចម្រើន ។ ទី២/ឦសាន ,ទី៣/ទិសបូព៌ា ,ទី៤/ទិសអាគ្នេយ៍ ,ទី៥/ទិសទក្សិណ ,ទី៦/ទិសនិរតី , ទី៧/ទិសបស្ចិម ,ទី៨/ទិសពាយ័ព្យ និទី៩/ទិសឧត្តរ ។ ទិស នីមួយៗ មានព្រះសង្ឃគង់នៅ១ អង្គដើម្បីសូត្រមន្តរំដោះគ្រោះតាមផ្ទះ ជូនប្រជាពលរដ្ឋ ដើម្បីដេញខ្មោច ឧបទ្រព ចេញឱ្យអស់ពីក្នុងភូមិ ។
លោកតាឲ្យដឹងថា កាធ្វើបុណ្យភូមិនេះ មិនមែនចេះតែធ្វើទេ ដល់តែមានការសហការគ្នាល្អពីពុទ្ធបរិស័ទ និងប្រជាពលរដ្ឋ ជាពិសេសអាជ្ញាធរមូលដ្ឋាន ។ បុណ្យភូមិនេះឱ្យតែអ្នកភូមិចង់ធ្វើ កុំថា ១ ឬ ៣ឆ្នាំ ឱ្យតែមានលុយគឺធ្វើបានទាំងអស់ ។ ការធ្វើបុណ្យភូមិនេះ គឺផ្តើមចេញពីប្រជាពលរដ្ឋក្នុងភូមិ ចេះនាំគ្នាប្រមូលយកស្រូវក្នុង១ផ្ទះ១បាវ ហើយស្រូវដែលនៅសល់ គឺទុកសម្រាប់ចែកពួកគាត់វិញខ្លះ នៅសល់ប៉ុន្មានលក់យកលុយមកកសាងផ្លូវ ដើម្បីទុកសម្រាប់ពួកគាត់ធ្វើដំណើរ ស្រួល និងទុកសម្រាប់កូនចៅជំនាន់ក្រោយផងដែរ ។
លោកធុយ ហ៊ត់ មេភូមិគោកដូង ថ្លែងថា «ការរៀបចំសម្ពោធភូមិ ឬហៅថា បុណ្យភូមិនេះ គឺធ្វើឡើងសុំសេចក្តីសុខជូនបងប្អូនប្រជាពលរដ្ឋក្នុងភូមិគោកដូងទាំងអស់ ដែលបាននាំគ្នាយកស្រូវមកក្នុង ម្នាក់ៗ១បាវ ទម្ងន់៥០ទៅ៦០គីឡូក្រាម ព្រមទាំងមានបងប្អូន ជិតឆ្ងាយដែលបានឃើញ ពួកយើងធ្វើបុណ្យភូមិនេះឡើង ក៏បាននាំគ្នាមកចូលបុណ្យតាមសទ្ធា រៀងៗរបស់ពួកគាត់ ។
ថ្នាក់ដឹកនាំក្រុមការងារដែលដឹកនាំដោយលោកឧត្តមសេនីយ៍ត្រីហួត សុធី និងសប្បុរសជន បានយកជាថវិកាមកជួយឧបត្ថម្ភក្នុងបុណ្យនេះផង ដើម្បីកសាងផ្លូវ ជូនបងប្អូនប្រជាពលរដ្ឋ ក្នុងភូមិគោកដូង ទាំងអស់ ក៏ដូចជាភ្ញៀវមកពីទីជិតឆ្ងាយ ស្រួលធ្វើដំណើរឆ្លងកាត់ទៅមក ។ ចំណែក ស្រូវដែលបងប្អូនបាននាំគ្នាយកមកក្នុងកម្មវិធីបុណ្យភូមិនេះ បន្ទាប់ពីចប់កម្មវិធី នៅសល់ប៉ុន្មាន គឺគណៈកម្មការ និងអាចារ្យវត្ត គាត់បានចាត់ចែងអស់ហើយ »។
អ្នកភូមិនាំគ្នាពាក់ខ្សែអំបោះខ្សែសីមាដើរពីខាងជើងស្នងការដ្ឋាននគរបាលខេត្ត កាត់តាមផ្លូវជាតិ មុខផ្ទះនានា ឆ្ពោះទៅព្រលានយន្តហោះ និងចូលពាក់តាមមុខផ្ទះនីមួយៗក្នុងភូមិ ។ ក្រៅពីនេះអ្នកភូមិដាក់ទីងមោងមុខផ្ទះ ម្នាក់១ៗផងដែរ ៕
ចែករំលែកព័តមាននេះ