ខេត្តពោធិ័សាត់ ៖ កាលពីថ្ងៃទី១៥ វិច្ឆិកា កន្លងទៅនេះ ក្រុមអភិរក្សបង្ក្រាបព្រៃឈើ និងសត្វព្រៃដែលហៅកាត់ថា CI និងផ្នែករដ្ឋបាលព្រៃឈើវាលវែង បានចាប់ឃាត់រថយន្តលួចដឹកសត្វព្រៃខុសច្បាប់មួយគ្រឿងត្រង់ចំណុចភូមិស្ទឹងថ្មី ឃុំប្រមោយ ស្រុកវាលវែង។ នៅក្នុងរថយន្តនោះសមត្ថកិច្ចពិនិត្យឃើញមានសត្វប្រមារស់ចំនួន៤ក្បាល មានទំងន់ស្មើនឹង៥៤គីឡូក្រាម ដែលពួកឈ្មួញដាក់បន្លំជាមួយអីវ៉ាន់។ មន្ត្រីអង្គការ CI ឱ្យដឹងថា បន្ទាប់ពីភ្នាក់ងារផ្តល់ព័ត៌មានមកថា នៅរសៀលថ្ងៃនោះមានរថយន្តមួយគ្រឿងម៉ាក Ford Ranger ពណ៌ទឹកប្រាក់ ចង្កូតស្តាំ ពាក់ស្លាកលេខកំពង់ចាម 2A-3397 មានផ្ទុកសត្វព្រៃខុសច្បាប់ ហើយកំពុងធ្វើដំណើរពីទីរួមស្រុកវាលវែងឆ្ពោះមកកាន់ទីរួមខេត្តពោធិ៍សាត់ភ្លាម កំលាំងអង្គការ CI បានសហការជាមួយផ្នែករដ្ឋបាលព្រៃឈើវាលវែងចាំស្ទាក់ រហូតចាប់ឃាត់បាននៅចំណុចភូមិស្ទឹងថ្មី។
ភ្លាមៗនោះ អ្នកបើកបរមិនស្គាល់ឈ្មោះបានឈប់រថយន្តក្បែរចិញ្ចើមថ្នល់រួចហើយរត់គេចខ្លួនចូលក្នុងព្រៃបាត់។ បន្ទាប់មកសមត្ថកិច្ចយើងបានឆែកឆេរក្នុងរថយន្តនោះ ក៏ប្រទះឃើញមានសត្វប្រមារស់ចំនួន៤ក្បាល មានទំងន់ស្មើនឹង៥៤គីឡូក្រាម ដែលឈ្មួញដាក់បន្លំជាមួយអីវ៉ាន់ផ្សេងៗ។ ក្រោយពីចងក្រងសំណុំរឿងតាមនីតិវិធីរួចមក សមត្ថកិច្ចបានលែងសត្វប្រមាទាំង៤ក្បាលចូលក្នុងព្រៃឱ្យមានសេរីភាពវិញ ឯរថយន្តដឹកជញ្ជួនបទល្មើសបាននាំយកទៅរក្សាទុកនៅកន្លែងអង្គការ CI ។
មន្ត្រីអភិរក្សព្រៃឈើ និងសត្វព្រៃ ឱ្យដឹងថា សត្វប្រមាជាសត្វមានដោយកម្រដែលសព្វថ្ងៃស្ទើរតែផុតពូជអស់ទៅហើយ ដោយសារពួកព្រានព្រៃប្រមាញ់ និងពួកឈ្មួញទុច្ចរិតដើរទិញ។ ដូច្នេះហើយទើបរាជរដ្ឋាភិបាល ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ ក៏ដូចជាអង្គការជាតិ-អន្តរជាតិដែលជាម្ចាស់ជំនួយ ផ្តោតការយកចិត្តទុកដាក់យ៉ាងខ្លាំងក្នុងការថែរក្សាការពារ ហើយកន្លងមកនេះ សមត្ថកិច្ចក៏បានឃាត់ខ្លួនអ្នកប្រមាញ់ និងឈ្មួញទុច្ចរិតមួយចំនួនដាក់ពន្ធនាគារផងដែរ៕
ចែករំលែកព័តមាននេះ