ខេត្តបន្ទាយមានជ័យ ៖ «ត្រូវបង្កើនការដាំដើមឈើឡើងវិញជុំវិញផ្ទះ ធ្វើផ្ទះត្រូវធ្វើឲ្យរឹងមាំដោយមានដំស្នឹងចងខ្សែកាប ឬខ្សែលួសធំយិតយោង ដើម្បីការពារខ្យល់កន្ត្រាក់បក់បោកបណ្តាលឱ្យដួលរលំ និងបង្កឲ្យរងការខូចខាតទ្រព្យសម្បត្តិនិងផ្ទះសម្បែងរបស់បងប្អូន និងអំពាវនាវដល់មន្ត្រីរាជការ កងកំលាំងប្រដាប់អាវុធ និងសប្បុរសជនចូលរួមជួយសង្គ្រោះប្រជាពលរដ្ឋរងគ្រោះដោយខ្យល់កន្ត្រាក់ដែលចេះតែកើតមានជារៀលរាល់ថ្ងៃ»។
នេះគឺជាការណែនាំរបស់លោកឧបនាយករដ្ឋមន្ត្រីកែ គឹមយ៉ាន ប្រធានអាជ្ញាធរ ជាតិប្រយុទ្ធប្រឆាំងគ្រឿងញៀន ជាប្រធានក្រុមការងារថ្នាក់ជាតិ ចុះជួយខេត្តបន្ទាយមានជ័យ បានថ្លែងក្នុងពិធីសំណេះ
សំណាល សួរសុខទុក្ខ និងចែកអំណោយដល់ប្រជាពលរដ្ឋរងគ្រោះដោយខ្យល់កន្ត្រាក់ នៅក្នុងស្រុកមង្គលបូរី ខេត្តបន្ទាយមានជ័យ កាលពីថ្ងៃទី២៨ ខែមេសា ឆ្នាំ២០១៩ នៅវត្តបឹងត្រាវ ឃុំបត់ត្រង់ ស្រុកមង្គលបូរី ចំនួន១៥០គ្រួសារ ។
ក្នុងឱកាសនោះផងដែរ លោកឧបនាយករដ្ឋមន្ត្រីក៏បានពាំនាំនូវការផ្ដាំផ្ញើសួរសុខទុក្ខ ពីសំ ណាក់ថ្នាក់ដឹកនាំកំពូលជាតិមាន សម្តេចវិបុលសេនាភក្តី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រីហេង សំរិន ប្រធានរដ្ឋសភា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់ គិតគូរដល់បងប្អូនប្រជាពលរដ្ឋ ដែលរងគ្រោះដោយគ្រោះធម្មជាតិ និងគ្រោះមហន្តរាយផ្សេងៗ ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយហើយទីណាមានការលំបាកខ្វះខាតទីនោះគឺមានវត្តមានថ្នាក់ដឹកនាំគ្រប់ជាន់ថ្នាក់និងកាកបាទក្រហមចុះជួយអន្តរាគមន៍ដោះស្រាយដោយមិនទុកឲ្យប្រជាពលរដ្ឋណាម្នាក់ដែលជួបការលំបាកចោលដោយមិនដោះស្រាយនោះឡើយ«កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល»នោះឡើយ។
ក្នុងឱកាសនោះដែរ លោកឧបនាយករដ្ឋមន្ត្រីកែ គឹមយ៉ាន ក៏បានចែកអំណោយជូនដល់ប្រជាពលរដ្ឋទាំង១៥០គ្រួសារ ក្នុង១គ្រួសារទទួលបានអំណោយរួមមាន ឃីត១, អង្ករ២៥គីឡូក្រាម, ត្រីខ១០កំប៉ុង, មី១កេស ,ប្រេងឆា១លីត្រ ទឹកស៊ីអុីវ៣ដប ,នំធុង១ធុង ,ទឹកសុទ្ធ១កេស ,មុង១ ,សារុង២ ,ក្រម៉ា២ ,ភួយ១ ,ថវិកា៥ម៉ឺនរៀល និងឧបត្ថម្ភដល់សាលាស្រុក ឃុំ បត់ត្រង់ កងកម្លាំងយោធា នគរបាល កងរាជអាវុធហត្ថ ដែលបានចុះអន្តរគមន៍ជួយជួសជុលផ្ទះជូនប្រជាពលរដ្ឋ និងគណៈកម្មាការអាចារ្យវត្តបឹងត្រាវនូវថវិកាមួយចំនួនផងដែរ។ ជាមួយគ្នានោះលោកក៏បានឧបត្ថម្ភស័ង្កសីចំនួន២ពាន់សន្លឹកសម្រាប់ជួសជុលផ្ទះប្រជាពលរដ្ឋដែលរងនូវការខូចខាតដំបូលផងដែរ។
អភិបាលស្រុក មង្គលបូរី លោកដា ស៊ីណង់ បានឲ្យដឹងថា នៅស្រុកមង្គលបូរី ចាប់ពីខែមីនាដល់ខែមេសា ឆ្នាំ២០១៩ កើតមានខ្យល់កន្ត្រាក់ចំនួន១១លើក ក្នុងឃុំចំនួន១១ធ្វើឲ្យខូចខាតលំនៅដ្ឋានប្រជាពលរដ្ឋសរុបចំនួន៣៣៨ខ្នង ឃ្លាំង២កន្លែង រោងម៉ាស៊ីនកិនស្រូវ៤កន្លែង ក្នុងនោះ ឃុំចំនួន៣២ខ្នង ឃ្លាំង១កន្លែង,ឃុំបត់ត្រង់ចំនួន១១៧ខ្នង, ឃុំចំណោម៣ខ្នង, ឃុំគោកបល្ល័ង្គ៤២ខ្នង, ឃុំសឿ៣៩ខ្នង, ឃុំរហាត់ទឹក១៤ខ្នងនិងរោងម៉ាស៊ីនកិនស្រូវ៣កន្លែង,ឃុំតាឡំ៣៨ខ្នង, ឃុំប្ញស្សីក្រោក២១ខ្នង,ឃុំអូរប្រាសាទ១២ខ្នងនិងឃ្លាំង១ ម៉ាស៊ីនកិនស្រូវកន្លែង,ឃុំស្រះរាំង១៦ខ្នងនិងឃុំសំបួរ៤ខ្នង។
ដោយឡែកប្រជាពលរដ្ឋរងគ្រោះនៅថ្ងៃទី២៥-២៦ ខែមេសា ដែលទទួល អំណោយថ្ងៃនេះ គឺមានចំនួន១៥០គ្រួសារ មកពី៦ឃុំគឺឃុំបត់ត្រង់១១៦គ្រួសារ,ឃុំសឿ២០គ្រួសារ,ឃុំប្ញស្សីក្រោ៥គ្រួសារ,ឃុំអូរប្រាសាទចំនួន៥គ្រួសារ, ឃុំចំណោម៣គ្រួសារ និងឃុំបន្ទាយនាង១គ្រួសារផងដែរ ៕
ចែករំលែកព័តមាននេះ