ខេត្តបាត់ដំបង ៖ មនុស្សម្នាយ៉ាងច្រើនកុះករបាននាំគ្នាសម្រុកចូលទៅផឹកកាហ្វេជាមួយនឹងការភ្នាល់ល្បែងបញ្ជល់មាន់តាមអ៊ីនធឺណេត ដែលស្រែកហោរកញ្ជ្រៀវរំខានប្រជាពលរដ្ឋដែលរស់នៅក្បែរនោះស្ទើររាល់ថ្ងៃ តែមិនរំខានដល់កម្លាំងសមត្ថកិច្ចឡើយ ព្រោះល្បីថា ទីតាំងល្បែងនោះជាសាច់ញាតិរបស់មន្ត្រីស្នងការដ្ឋានខេត្តផង។
បើតាមការទម្លាយឲ្យដឹងពីអតិថិជនដែលធ្លាប់ទៅផឹកកាហ្វេ និងភ្នាល់ល្បែងនៅទីនោះបានប្រាប់ថា ហាងកាហ្វេបង្កប់ល្បែងបញ្ជល់មាន់តាមអ៊ីនធឺណេតដ៏អធឹកអាធម័នោះ មានទីតាំងនៅខាងក្រោយវត្តកណ្ដឹង ស្ថិតនៅភូមិវត្តគរ សង្កាត់វត្តគរ ក្រុងបាត់ដំបង ដែលមានម្ចាស់ឈ្មោះ ចិត្ត ភេទប្រុស។
ប្រភពដដែលឲ្យដឹងទៀតថា ឈ្មោះចិត្ត បានលួចបើកទីតាំងបញ្ជល់មាន់តាមអ៊ីនធឺណេតនេះបានរយៈប្រហែល១ឆ្នាំកន្លែងមកហើយ ប៉ុន្តែបុរសនេះបានយកមុខរបរលក់កាហ្វេធ្វើជាខែលដើម្បីបិទបាំងមុខរបរមិនល្អរបស់ខ្លួន។ បើតាមអ្នកផឹកកាហ្វេភ្នាល់ល្បែងមាន់បានបញ្ជាក់ថា អ្នកភ្នាល់ល្បែងបញ្ជល់មាន់តាមអ៊ីនធឺណេតនេះ បានប្រមូលផ្ដុំគ្នាលេងគគ្រឹកគគ្រេងបំផុតនៅថ្ងៃសៅរ៍ និងថ្ងៃអាទិត្យ ក្រៅពីនេះគឺជាការបើកលេងបន្ទាប់បន្សំ។
អ្នកលេងតែងស្រែកហោរកញ្ជៀវយ៉ាងកងរំពងស្ទើរផ្អើលអ្នកភូមិ ជាមួយនឹងការភ្នាល់មាន់ជល់នេះ តែមិនរំខានដល់អាជ្ញាធរដែនដី ឬរំខានដល់សមត្ថកិច្ចម្ដងណាទេ។ ព្រោះលោកដង្ខៅចិត្ត បានអ៊ួតថា បានបង់សំណែនឲ្យសមត្ថកិច្ចគ្រប់ស្ថាប័ន និងគ្រប់លំដាប់ថ្នាក់។ ពិសេសជាងនេះទៀត លោកដង្ខៅចិត្តធ្លាប់បានព្រលយប្រាប់អ្នកលេងថា ខ្លួនបានទំនាក់ទំនងយ៉ាងជិតស្នឹតជាមួយមន្ត្រីស្នងការខេត្តសំខាន់ៗមួយចំនួនទៀតផង។
ព័ត៌មានពិស្តារមានផ្សាយជូននៅកាសែតកោះសន្តិភាព
ចែករំលែកព័តមាននេះ