ប្រទេសវៀតណាម ៖ យោងតាមសេចក្តីរាយការណ៍របស់ភ្នាក់ងារសារព័ត៌មាន Viet Nam News បានឲ្យដឹងថា ទីផ្សារអចលនទ្រព្យឧស្សាហកម្មក្នុងស្រុករបស់វៀតណាមត្រូវបានព្យាករណ៍ថានឹងលូតលាស់បានយ៉ាងរឹងមាំ និងអាចក្លាយជាវិស័យដ៏ទាក់ទាញសម្រាប់វិនិយោគិនក្នុងឆ្នាំនេះ និងឆ្នាំមុខៗទៀត។
លោក Nguyen Tran Nam ដែលជាប្រធានសមាគមន៍អចលនទ្រព្យវៀតណាមបាននិយាយក្នុងសេចក្តីថ្លែងការណ៍មួយនៅវេទិកាអចនទ្រព្យឧស្សាហកម្មវៀតណាមឆ្នាំ ២០១៩ កាលពីថ្ងៃអង្គារ៍ថា ទីផ្សារអចលនទ្រព្យឧស្សាហកម្មវៀតណាមមើលឃើញការអភិវឌ្ឍន៍យ៉ាងរឹងមាំ ដែលបង្កើតជំនឿទុកចិត្តសម្រាប់វិនិយោគិនបរទេសជាច្រើន។ វានឹងក្លាយជាមូលដ្ឋានសម្រាប់ការលូតលាស់ និងជួយដល់ប្រទេសឲ្យក្លាយជាទីតាំងវិនិយោគដែលមានភាពទាក់ទាញជាងគេក្នុងអាស៊ីអាគ្នេយ៍សម្រាប់វិស័យផលិតកម្ម។ ដោយមានអត្ថប្រយោជន៍បង្កើតឡើងដោយការអភិវឌ្ឍន៍ផ្នែកសេដ្ឋកិច្ចសង្គម និងគោលនយោបាយផ្សេងៗ ទីផ្សារអចលនទ្រព្យឧស្សាហកម្មវៀតណាមអាចនឹងមានឱកាសកាន់តែច្រើនទៀតក្នុងការអភិវឌ្ឍន៍។
លោក Nam បានបន្តថា “ប្រសិនបើវិនិយោគិនទាញអត្ថប្រយោជន៍ពីឱកាស និងគោលនយោបាយទាំងនេះ នោះទីផ្សារអចលន ទ្រព្យឧស្សាហកម្មវៀតណាមនឹងមានឱកាសកាន់តែច្រើនទៀតក្នុងការអភិវឌ្ឍន៍”។ ជាមួយគ្នានេះផងដែរ លោក Nguyen Dinh Cung ដែលជាប្រធានវិទ្យាស្ថានគ្រប់គ្រងសេដ្ឋកិច្ចកណ្តាល (CIEM) បាននិយាយថា វាជាពេលវេលាដ៏ល្អបំផុតក្នុងការវិនិយោគលើអចលនទ្រព្យឧស្សាហកម្មដើម្បីអភិវឌ្ឍន៍ទីប្រជុំជន តំបន់ឧស្សាហកម្ម និងតំបន់សេដ្ឋកិច្ចជាដើម។ លោក Cung បានបន្តថា “ភាពទាក់ទាញនៃទីផ្សារអចលនទ្រព្យឧស្សាហកម្មក្នុងស្រុកមានខ្ពស់ជាងភាពទាក់ទាញក្នុងតំបន់ ហើយវាបន្តកើនឡើងព្រោះតែកត្តាជាច្រើនដូចជាការចំណាយលើពលកម្មទាប តម្លៃជួលសមរម្យ និងពន្ធប្រាក់ចំណូលក្រុមហ៊ុនសមរម្យជាដើម”។
យ៉ាងណាក្តីលោកបានបន្ថែមថា ការអភិវឌ្ឍន៍ក្នុងវិស័យនេះនៅជួបឧបសគ្គជាច្រើននៅឡើយដូចជាកង្វះហេដ្ឋារចនាសម្ព័ន្ធដែលតភ្ជាប់តំបន់ឧស្សាហកម្មជាមួយនឹងហេដ្ឋារចនាសម្ព័ន្ធដទៃទៀត។ គោលនយោបាយរដ្ឋាភិបាលនៅមានភាពមិនប្រាកដប្រជាច្រើន ហើយមិនទាន់រឹងមាំគ្រប់គ្រាន់ក្នុងការគាំទ្រដល់វិនិយោគិន និងជំរុញដល់ការលូតលាស់ឡើយ៕
ចែករំលែកព័តមាននេះ