ប្រទេសចិន ៖ ប្រធានាធិបតីចិនលោកស៊ីជីនពីង ប្រកាសកាលពីថ្ងៃទី២៧មេសាថា បណ្ដាកិច្ចព្រមព្រៀង មានទឹកប្រាក់មហាសាលដល់ទៅជាង៦៤ពាន់លានដុល្លារ ត្រូវបានចុះហត្ថលេខា ក្នុងឱកាសនៃកិច្ចប្រជុំកំពូលស្ដីពី ខ្សែក្រវាត់និងផ្លូវសូត្រ ដែលរៀបចំធ្វើនាសប្ដាហ៍កន្លងទៅនៅក្រុងប៉េកាំង។
ក្នុងសុន្ទរកថាបិទកិច្ចប្រជុំកំពូលនោះប្រមុខរដ្ឋចិនបញ្ជាក់ថា បណ្ដាគោលការណ៍នៃទីផ្សារនឹងអនុវត្ត បណ្ដាគម្រោងនៃកិច្ចសហប្រតិបត្តិការ ក្នុងក្របខណ្ឌនៃការផ្ដួចផ្ដើមគំនិតដ៏ធំនោះ ដែលសំដៅបង្កើនការផ្លាស់ប្ដូរពាណិជ្ជកម្ម រវាងអាស៊ី និងអឺរ៉ុប។
ជាលើកទី២ក្នុងរយៈពេលតែ២ឆ្នាំមេដឹកនាំចិនរូបនោះ បានរៀបចំឲ្យមានការជួបប្រជុំកំពូលពីផ្លូវសូត្រថ្មីៗ ជាការផ្ដួចផ្ដើមគំនិតដែលសំដៅកសាងបណ្ដាហេដ្ឋារចនាសម្ព័ន្ធ តភ្ជាប់គ្នា ក្នុងបណ្ដាប្រទេសកំពុងអភិវឌ្ឍន៍នៅអាស៊ី អឺរ៉ុបនិងអាហ្វ្រិក។ ទិសដៅគឹការផ្សារភ្ជាប់ទំនាក់ទំនងគ្នារវាងប្រទេសមហាយក្សអាស៊ីនោះ និងបណ្ដាដៃគូពាណិជ្ជកម្មសំខាន់ៗ ដែលត្រូវការខ្លាំងការជួយផ្គត់ផ្គង់។
លោកស៊ីជីនពីងអះអាងថា អ្វីៗត្រូវតែធ្វើដោយតម្លាភាពហើយយើងពុំត្រូវមានការអនុគ្រោះ ចំពោះអំពើពុករលួយ។ លោកបន្តថាចិនក៏នឹងជម្រុញផងដែរការអភិវឌ្ឍន៍បៃតង ខណៈគម្រោងមួយចំនួននៃផ្លូវសូត្រ ពិសេសទំនប់វារីអគ្គិសនីឬមជ្ឈមណ្ឌលអគ្គិសនីប្រើធ្យូងថ្ម ជារឿយៗមានការរិះគន់ថា នាំឲ្យមានការប៉ះពាល់ដល់បរិស្ថាន។
គោលដៅនៃការផ្ដួចគំនិតខ្សែក្រវាត់និងផ្លូវសូត្រនោះគឺការតភ្ជាប់គ្នា នូវផ្លូវថ្នល់ផ្លូវរថភ្លើងនិងកំពង់ផែក្នុងប្រទេស៦៥ ដែលមានទឹកប្រាក់សរុបជា១០០០ពាន់លានដុល្លារ។ លោកលើកពីការកសាងហេដ្ឋារចនាសម្ព័ន្ធដែលមានគុណភាពខ្ពស់ ប្រើបានយូរអង្វែង បម្រើសេដ្ឋកិច្ច និងអាចឆ្លើយតបចំពោះរាល់គ្រោះថ្នាក់ និងបញ្ហា ព្រមទាំងនឹងជួយបណ្ដាប្រទេសឲ្យអាចប្រើបានពេញលេញ បណ្ដាធនធានរបស់ពួកគេ៕
ចែករំលែកព័តមាននេះ