ទីក្រុងហ្កាហ្សា៖ ជនជាតិប៉ាឡេស្ទីនយ៉ាងតិច៩នាក់ស្លាប់ និងម្ភៃនាក់ទៀតរងរបួសដោយសារការវាយប្រហាររបស់អ៊ីស្រាអែលទៅលើអគារស្នាក់នៅរបស់ប្រជាជននៅទីក្រុងហ្កាហ្សាកាលពីយប់មិញ។ នេះជាការរំលោភបទឈប់បាញ់ដែលចូលជាធរមានតាំងពីថ្ងៃទី១០ ខែតុលា ឆ្នាំមុន។ នេះបើយោងតាមប្រភពជាច្រើនប្រាប់អ្នកសារព័ត៌មាន។ យន្តហោះចម្បាំង និងឧទ្ធម្ភាគចក្រសហការគ្នាវាយប្រហារលំនៅដ្ឋានរបស់ប្រជាជននៅតំបន់ហ្កាហ្សាភាគខាងលិច និងភាគខាងជើង។
ការវាយប្រហារនោះត្រូវចំអគារជាន់ទីបួននៃអាផាតមេនឡេប៊ីត នៅតំបន់មូហាបារ៉ាត់ (Muhabarat) បណ្ដាលឱ្យស្លាប់សមាជិកគ្រួសារ៥នាក់។ ក្នុងនោះមានលោកហាសាន់ រេបា លេប៊ីត (Hassan Rebah Lebid), ភរិយារបស់គាត់ និងកូនៗបីនាក់។ កូនស្រីអាយុ៩ឆ្នាំត្រូវគេទាញចេញពីគំនិតបាក់បែកដោយមានរបួសស្នាមបន្តិចបន្តួច។ នៅតែលអាល់ហាវ៉ា (Tel Al-Hawa) ជនជាតិប៉ាឡេស្ទីន២នាក់បានស្លាប់នៅក្នុងការវាយប្រហារមួយ។
មនុស្ស២នាក់ទៀតក៏បានស្លាប់ផងដែរនៅក្នុងការវាយប្រហារទៅលើគ្រួសារមូហាណា (Muhana) នៅជំរំជនភៀសខ្លួនសាទី (Shati) និងទៅក៏វាយប្រហារទៅលើលំនៅដ្ឋានមួយកន្លែងក្បែរចំណុចប្រសព្វអាប៊ូអាមីន (Abu Amin)។ សង្គ្រាមរយៈពេល២ឆ្នាំកន្លងទៅនេះសម្លាប់ជនជាតិប៉ាឡេស្ទីនជិត៧៣០០០នាក់ និងរបួសជាង១៧ម៉ឺននាក់ ភាគច្រើនជាស្ត្រី និងកុមារ។ ទោះបីមានបទឈប់បាញ់កាលពីថ្ងៃទី១០ ខែតុលា ឆ្នាំ២០២៥យ៉ាងណាក្ដី ប៉ុន្តែយោធាអ៊ីស្រាអែលនៅតែបន្តសម្លាប់ជនជាតិប៉ាឡេស្ទីន៩៣២នាក់ និងរបួសជាង២ពាន់នាក់។ នេះបើយោងតាមការិយាល័យព័ត៌មានប្រចាំតំបន់ហ្កាហ្សា៕ ប្រភព៖ AP
ចែករំលែកព័តមាននេះ