គ្រឿងចក្រគាស់កកាយដីស្រែប៉ះចំកំណប់គ្រា.ប់កាំ.ភ្លើ.ងត្បាល់ចំនួន២២គ្រាប់ តៃកុងព្រលឹងចុងសក់
- បាត់ដំបង
ខេត្តបាត់ដំបង ៖ គ្រាប់កាំភ្លើងត្បាល់ធុន៦០ និង៨២ម.ម ប្រមាណ២២គ្រាប់ ដែលគេកប់ក្នុងដីសេសសល់ពីសម័យសង្គ្រាម ត្រូវបានប្រទះឃើញនៅពេលបុរសម្នាក់ បានយកគ្រឿងចក្រទៅកាយដីស្រែក្បែរៗមាត់ប្រឡាយ កាលពីព្រឹកថ្ងៃទី០៣ មិថុនា នៅចំណុចភូមិដំណាក់សាលា ឃុំតាក្រី ស្រុកកំរៀង តែមិនបង្កឲ្យផ្ទុះទេ ។
មន្ត្រីមូលដ្ឋានបានរាយការណ៍ថា អ្នកភូមិឈ្មោះ លន់ ម៉េងជូរ ភេទប្រុស អាយុ២៩ឆ្នាំ បានយកគ្រឿងចក្រចូលទៅកាយដីស្រែ ហើយក៏ប្រទះឃើញគំនរគ្រាប់យុទ្ធភណ្ឌនោះធ្វើឲ្យមានការភ្ញាក់ផ្អើលទាំងព្រឹក ហើយគាត់ក៏បានរាយការណ៍ប្រាប់អាជ្ញាធរ និងសមត្ថកិច្ចមូលដ្ឋានភ្លាមៗដែរ ។
នៅថ្ងៃដដែល ក្រោយពីអាជ្ញាធរទទួលបានព័ត៌មាននេះ គេបានរាយការណ៍បន្តភ្លាមៗ ទៅកាន់អង្គភាពកំចាត់មីន ស៊ីម៉ាក់ ដើម្បីជួយអន្តរាគមន៍ចុះងត្រូតពិនិត្យ និងរំដោះគ្រាប់យុទ្ធភ័ណ្ឌទាំងនោះចេញពីតំបន់គ្រោះថ្នាក់ ។ នៅទីតាំងកើតហេតុ កម្លាំងកំចាត់មីនស៊ីម៉ាក់ បានចុះត្រូតពិនិត្យ និងបានរាវរកឃើញគ្រាប់យុទ្ធភណ្ឌចំនួន២២គ្រាប់ ដែលសុទ្ធសឹងជាគ្រាប់កាំភ្លើងត្បាល់ ។
យោងតាមរបាយការណ៍របស់សមត្ថកិច្ចបានឲ្យដឹងថា គ្រាប់កាំភ្លើងត្បាល់ដែលមន្ត្រី ស៊ីម៉ាក់ប្រមូលបានរួមមាន៖ គ្រាប់ធុន៦០ម.ម ចំនួន១២គ្រាប់ និងគ្រាប់ធុន៨២ម.ម ចំនួន១០គ្រាប់ ។ បើតាមប្រភពព័ត៌មានបានប្រាប់ថា គ្រាប់កាំភ្លើងត្បាល់ទាំងនោះ ពុំមានបំពាក់ក្បាលបំផ្ទុះទេ (គីមបំបែក) ហើយត្រូវបានកប់នៅក្នុងដីក្នុងសម័យសង្គ្រាម កាលពីជាង៣០ឆ្នាំមុន ដែលមានស្ថានផាពច្រេះចាប់អស់ហើយ ។
ប៉ុន្តែយ៉ាងណា មិនអាចទុកចិត្តទេ គ្រាប់យុទ្ធភណ្ឌទាំងនេះ វានៅតែអាចបង្កគ្រោះថ្នាក់បាន ។ នេះជាការល្អដែលយើងប្រទះឃើញ ហើយមន្ត្រីស៊ីម៉ាក់ចុះប្រមូលយកទៅកំទេចចោល មុនពេលវាបង្កគ្រោះថ្នាក់ដល់មនុស្ស ៕
ចែករំលែកព័តមាននេះ