ទីក្រុងប៉េកាំង៖ ប្រទេសចិនហាមមិនឱ្យអ្នកតំណាងរាស្ត្រជនជាតិនូវែលហ្សេឡង់បួននាក់ចូលទឹកដីរបស់ខ្លួន (ចិន) រយៈពេល១ឆ្នាំ និងទាមទារឱ្យពួកគេសូមអភ័យទោសចំពោះកំហុសឆ្គងដែលពួកគេធ្វើដំណើរជាផ្លូវការទៅកោះតៃវ៉ាន់។ នេះបើយោងតាមការផ្ញើកំណត់ទូតតាមរយៈស្ថានទូតចិនទៅមន្ត្រីរដ្ឋសសភា និងបង្ហាញទៅទីភ្នាក់ងារព័ត៌មាន AP។ មែនទែនទៅ នេះមិនមែនជាលើកទី១ទេដែលចិនចាត់វិធានការយ៉ាងដូច្នេះ។ កាលពីពេលកន្លងមកអ្នកតំណាងរាស្ត្រមិនតិចនាក់ឡើយដែលត្រូវចិនហាមឃាត់មិនឱ្យជាន់ទឹកដីរបស់ខ្លួន។
ទោះជាយ៉ាងណាក្ដី សម្រាប់នូវែលហ្សេឡង់ ចិនទើបតែចាត់ការករណីនេះជាលើកដំបូង។ នេះបើយោងតាមមន្ត្រីរដ្ឋាភិបាលនូវែលហ្សេឡង់ប្រចាំរដ្ឋធានីវេលីងតុនបង្ហើបឱ្យដឹង។ អ្នកតំណាងរាស្ត្រ២នាក់ដែលទីភ្នាក់ងារព័ត៌មានអេភីទាក់ទងបានបានបញ្ជាក់ថាខ្លួននឹងមិនសូមអភ័យទោសជាដាច់ខាត។ ចំណែកអ្នកតំណាងរាស្ត្រ២នាក់ទៀតមិនទាន់អាចទាក់ទងបាននៅឡើយទេ។ រដ្ឋាភិបាលនូវែលហ្សេឡង់ថ្លែងថាខ្លួនសោកស្ដាយចំពោះការហាមឃាត់អ្នកតំណាងរាស្ត្រមិនឱ្យចូលទឹកដីរបស់ចិន។
សូមរំលឹកថាអ្នកតំណាងរាស្ត្រទាំង៤បានធ្វើដំណើរទៅទីក្រុងតៃប៉ិកាលពីខែឧសភា។ នេះជាអ្វីដែលក្រុមអ្នកតំណាងរាស្ត្រនូវែលហ្សេឡង់ធ្លាប់ធ្វើជាច្រើនទសវត្សមកហើយ។ អ្នកនាំពាក្យក្រសួងការបរទេសនូវែលហ្សេឡង់ថាអ្នកតំណាងរាស្ត្ររបស់ខ្លួនធ្លាប់ធ្វើដំណើរបែបនេះរាប់ទសវត្សរ៍មកហើយពុំដែលមានបញ្ហាអ្វីកើតឡើងនោះទេ។ រដ្ឋាភិបាលចិនថ្លែងថាកោះតៃវ៉ាន់គ្មានសិទ្ធិភ្ជាប់ទំនាក់ទំនងការទូតជាមួយប្រទេសណាទាំងអស់។ ចិនចាត់ទុកអ្នកតំណាងរាស្ត្រណាក៏ដោយដែលធ្វើដំណើរទៅកោះតៃវ៉ាន់ជាការមិនគោរពអធិបតេយ្យភាពជាតិរបស់ប្រទេសចិនទាល់តែសោះ។
អ្នកនាំពាក្យដដែលនេះថ្លែងថាការធ្វើដំណើរជាផ្លូវការនោះមិនពាក់ព័ន្ធនឹងនយោបាយចិនតែ១ដែលនូវែលហ្សេឡង់តែងតែប្រកាន់យកតាំងពីយូរមកហើយ។ ក្នុងនោះមានការទទួលស្គាល់ថាតៃវ៉ាន់ជាទឹកដីរបស់ចិនជាដើម។ នូវែលហ្សេឡង់មិនស្ថិតនៅក្នុងចំណោមប្រទេសចំនួន១២នៅក្នុងសាកលលោកដែលមានទំនាក់ទំនងជាមួយកោះតៃវ៉ាន់នោះទេ។ ចិនថាប្រសិនបើអ្នកតំណាងរាស្ត្រទាំង៤នាក់សូមទោសនូវទង្វើរបស់ខ្លួន ពេលនោះចិនសុខចិត្តដកចេញនូវបម្រាមនោះវិញ៕ ប្រភព AP
ចែករំលែកព័តមាននេះ