រាជធានីភ្នំពេញ ៖ ប្រជាពលរដ្ឋប្រមាណជាង៥០នាក់ ដែលរស់នៅក្នុងភូមិព្រៃរងៀង សង្កាត់ភ្លើងឆេះរទេះ ខណ្ឌពោធិ៍សែនជ័យ តំណាងឲ្យរាប់រយគ្រួសារដែលរស់នៅក្នុងភូមិចំនួន៨ បានប្រមូលផ្ដុំគ្នាធ្វើការតវ៉ាកាលពីម៉ោង៩ព្រឹក ថ្ងៃទី២៨ ខែមេសា…
រាជធានីភ្នំពេញ ៖ ប្រជាពលរដ្ឋប្រមាណជាង៥០នាក់ ដែលរស់នៅក្នុងភូមិព្រៃរងៀង សង្កាត់ភ្លើងឆេះរទេះ ខណ្ឌពោធិ៍សែនជ័យ តំណាងឲ្យរាប់រយគ្រួសារដែលរស់នៅក្នុងភូមិចំនួន៨ បានប្រមូលផ្ដុំគ្នាធ្វើការតវ៉ាកាលពីម៉ោង៩ព្រឹក ថ្ងៃទី២៨ ខែមេសា ឆ្នាំ២០១៩ ។ ដើម្បីប្រឆាំងតវ៉ាមិនឲ្យក្រុមហ៊ុនប្រមូលសំរាម ស៊ិន ទ្រី ដឹកសំរាមយកទៅចាក់ចោលនៅក្នុងរណ្ដៅដីមួយកន្លែងដែលនាំឲ្យមានការប៉ះពាល់បរិស្ថាន សុខភាព អនាម័យ និងការរស់នៅរបស់ភូមិទាំងអស់ខាងលើ ជាពិសេសវត្តអារាម និងសាលារៀនដែលស្ថិតនៅក្បែរនោះតែម្ដង។
អ្នកតវ៉ាខាងលើបាននិយាយថា រថយន្តក្រុមហ៊ុនប្រមូលសំរាមស៊ិនទ្រី បំរុងដឹកយកសំរាមចូលទៅចាក់ចោលក្នុងរណ្ដៅដីខាងលើនោះទាំងយប់ទាំងថ្ងៃជាបន្តបន្ទាប់អស់រយៈពេល៤ថ្ងៃកន្លងមកហើយ ដែលមិនដឹងថា មានការអនុញ្ញាតពីអាជ្ញាធរថ្នាក់ណានោះឡើយ។ ក្រោយពេលឃើញទិដ្ឋភាពបែបនេះ បានធ្វើឲ្យពួកគាត់មានការភ្ញាក់ផ្អើលយ៉ាងខ្លាំង ម្យ៉ាងទៀតទើបតែ៤ថ្ងៃសោះសំរាមត្រូវបានយកទៅចាក់ចោលទីនោះរាប់សិបតោន និងកំពុងជះក្លិនស្អុយអសោចិ៍ បង្កផលប៉ះពាល់ដល់ការរស់នៅរបស់ពួកគាត់ ។
ពួកគាត់មានការព្រួយបារម្ភពីសុខភាព អនាម័យ ជាពិសេសបានធ្វើឲ្យសិស្សសាលាជិតនោះរៀន រៀនសូត្រមិនកើតព្រោះតែទ្រាំនឹងក្លិនស្អុយមិនបាន ។ ចំណែកព្រះសង្ឃក្នុងវត្តជន្លុងម្លូរ ដែលស្ថិតនៅក្បែរនោះក៏ទទួលរងក្លិនសំរាមនេះខ្លាំងក្លាដែរ។
ប្រភពដដែលបន្តថា នៅជុំវិញទីតាំងរណ្ដៅដីដែលក្រុមហ៊ុនស៊ិនទ្រីចាក់ចោលសំរាមនោះមានភូមិចំនួន៨ ដែលនឹងត្រូវរងផលប៉ះពាល់ ហើយអ្នកភូមិទាំងអស់ប្រាកដជាមិនអាចនៅស្ងៀមបានឡើយ បើក្រុមហ៊ុនស៊ិនទ្រីនៅតែបន្តដឹកសំរាមយកទៅចោលនៅទីនោះតទៅទៀនោះ។
ដោយឡែកពួកគាត់ធ្វើការប្រមូលផ្ដុំគ្នានាពេលនេះ គឺដើម្បីធ្វើការប្រឆាំងតវ៉ាទៅនឹងក្រុមហ៊ុននេះឲ្យបញ្ឈប់ការចាក់សំរាមនេះជាបន្ទាន់ ព្រោះទីនោះមិនសមនឹងយកសំរាមទៅចាក់ចោលឡើយ ព្រោះវាស្ថិតនៅក្បែរភូមិឋាន វត្តអារាម និងសាលារៀនតែម្ដង បើគ្មានការទប់ស្កាត់ទេ ទីនោះនឹងក្លាយទៅជាភ្នំសំរាមមានក្លិនស្អុយ មានសត្វរុយ និងសត្វចម្លងមេរោគផ្សេងៗទៀត ហើយពួកគាត់មិនអាចរស់នៅបានឡើយ។
អ្នកភូមិបានលើកឡើងថា គោលបំណងសំខាន់ក្នុងការតវ៉ានេះ ពួកគាត់ចង់ឲ្យអាជ្ញាធររាជធានីភ្នំពេញ និងខណ្ឌពោធិ៍សែនជ័យ ជួយធ្វើការទប់ស្កាត់បញ្ឈប់រាល់សកម្មភាពរបស់ក្រុមហ៊ុននេះជាបន្ទាន់ ហើយពួកគាត់ក៏បានខលទៅជំរាបសួរលោកអភិបាលខណ្ឌពោធិ៍សែនជ័យ ហែម ដារិទ្ធិ ពីបញ្ហានេះដែរ។
ខណៈនោះលោកអភិបាលខណ្ឌខាងលើប្រាប់ពួកគាត់ថា លោកមិនបានអនុញ្ញាតឲ្យក្រុមហ៊ុនស៊ិនទ្រីនេះ យកសំរាមទៅចាក់នៅទីនោះឡើយ ពេលនេះចាំលោកខលទៅប្រាប់ក្រុមហ៊ុននេះឲ្យបញ្ឈប់ជាបន្ទាន់។ មិនតែប៉ុណ្ណោះសំរាមដែលចាក់ចូលរណ្ដៅ ហើយមិនអាចដឹកចេញវិញទេ ប៉ុន្តែពួកគាត់ស្នើសុំឲ្យធ្វើការឈូសឆាយ និងចាក់ដីលុបចោលផង កុំឲ្យជះក្លិនស្អុយតទៅទៀត៕
ចែករំលែកព័តមាននេះ