ខេត្តបាត់ដំបង ៖ កុមារីអាយុ៣ឆ្នាំ និងប្អូនប្រុសអាយុ១៦ខែ បានលង់ទឹកស្លាប់យ៉ាងអាណោចអាធ័មបំផុតនៅក្នុងស្រះខាងក្រោយផ្ទះ កាលពីម៉ោង១និង៣០នាទីរសៀលថ្ងៃទី២៧ មេសា ២០១៩ ស្ថិតនៅភូមិកាច់រទេះ ឃុំកំពង់ព្រៀង ស្រុកសង្កែ ដោយសារការធ្វេសប្រហែសរបស់ម្ដាយ ហើយជីតាដេកលក់ក្នុងដំណេកពេលថ្ងៃ។
មន្ត្រីមូលដ្ឋានបានឲ្យដឹងថា ក្មេងរងគ្រោះទាំង២នាក់បងប្អូននោះ គឺកុមារីឈ្មោះនិត រក្សា អាយុ៣ឆ្នាំ និងកុមារាឈ្មោះនិត សំណាង អាយុ១៦ខែ។ ពួកគេត្រូវបានប្រទះឃើញស្លាប់យ៉ាងរន្ធត់ក្បែរគ្នានៅទឹកស្រះខាងក្រោយផ្ទះប្រហែល២០ម៉ែត្រ ដែលមានជម្រៅទឹកជាង១ម៉ែត្រ។
មន្ត្រីដដែលបញ្ជាក់ថា កុមារទាំង២នាក់បងប្អូននេះ នៅជាមួយម្ដាយ និងជីតា តែទំនងបាននាំគ្នាដើរទៅលេងមាត់ស្រះ ហើយរអិលធ្លាក់ចូលទឹកតែម្ដង ដោយសារម្ដាយមិនចាប់អារម្មណ៍ ហើយជីតាកំពុងដេកលក់មួយភាំងពេលថ្ងៃ លុះម្ដាយកុមាររងគ្រោះស្រែកបាត់កូនក៏នាំគ្នាដើររកស្រាប់តែឃើញកូនស្លាប់នៅក្បែរគ្នាក្នុងស្រះបង្កឲ្យមានការភ្ញាក់ផ្អើលពេញភូមិតែម្ដង។
ជុំវិញហេតុការណ៍យ៉ាងរន្ធត់នេះ លោកម៉ាន់ ប៉ុន អាយុ៦៥ឆ្នាំ ដែលត្រូវជាជីតារបស់កុមាររងរងគ្រោះនិយាយថា ពេលដែលកើតហេតុ គឺគាត់កំពុងដេកលក់មួយភាំងនាពេលនោះ តែគាត់បានដឹងពេលកូនស្រីឈ្មោះប៉ុន.ធារី អាយុ២៥ឆ្នាំ (ម្តាយកុមាររងគ្រោះទាំងពីរនាក់) ស្រែកផ្អើលឆោឡោថា បាត់កូនៗពីផ្ទះ។ ជីតាកុមាររងគ្រោះនិយាយទៀតថា ពេលនេះគាត់ដើររកចៅជាមួយម្ដាយកុមាររងគ្រោះ ស្រាប់តែឃើញចៅទាំង២នាក់លង់ទឹកស្រះខាងក្រោយផ្ទះគួរឲ្យតក់ស្លុតបំផុត។ ឃើញដូច្នេះរូបគាត់ និងម្តាយក្មេងរងគ្រោះក៏បានចុះស្រង់យកមកធ្វើចលនា តែកុមារទាំង២បានស្លាប់បាត់ទៅហើយ។
មន្ត្រីជំនាញអធិការស្ក្រសង្កែ បានចុះពិនិត្យសាកសពកុមារទាំង២នាក់ភ្លាមៗដែរ បន្ទាប់ពីកើតហេតុ។ មន្ត្រីដដែលបានប្រាប់ថា កុមាររងគ្រោះពុំមានស្លាកស្នាមអ្វីគួរឲ្យសង្ស័យទៅលើបទល្មើសផ្សេងៗទេ។ កុមារទាំង២នាក់ពិតជាស្លាប់ដោយសារលង់ទឹកមែន។ នេះជាការធ្វេសប្រហែសរបស់អាណាព្យាបាល ទើបធ្វើឲ្យកូនជួបគ្រោះថ្នាក់ដល់ជីវិតបែបនេះ៕
ចែករំលែកព័តមាននេះ