ខេត្តកំពង់ស្ពឺ ៖ បន្ទាប់ពីមានការកើនឡើងថ្លៃដីជាបន្តបន្ទាប់នោះ ឃើញថា ក្រុមឈ្មួញមានលុយ និងមានអំណាចមួយចំនួន បានឃុបឃិតគ្នាជាលក្ខណៈប្រព័ន្ធជាមួយនឹងជំនាញ អាជ្ញាធរភូមិ ឃុំ ស្រុក ធ្វើការងាកមករកប្រិវិធីបែបថ្មី គឺធ្វើការជីកកាយក្នុងបាតអាងស្តុកទឹក បាតបឹងជាដើម ដើម្បីបានយកអាចម៌ដីចាក់ពុះឡូតិ៍លក់ ។
ជាក់ស្ដែងស្ថិតនៅក្នុងភូមិព្រៃរំដួល និងភូមិស្រែត្រោក ឃុំសែនដី ស្រុកសំរោងទង ខេត្តកំពង់ស្ពឺ ឈ្មួញកំពុងតែប្រើវិធីនេះដើម្បីកេងចំណេញតាមរយៈការមិនទិញដី តែបានដីយកមចាក់ដើម្បីពុះឡូតិ៍ដោយគ្រាន់តែចំណាយលុយក្រោមតុតែប៉ុណ្ណោះ។
អ្វីដែលមានការចាប់អារម្មណ៍ គឺក្រុមឈ្មួញ លួចឃុបឃិតគ្នាជាលក្ខណៈប្រព័ន្ធជាមួយអាជ្ញាធរភូមិ ឃុំ ស្រុក និងជំនាញធនធានទឹកតែម្ដង ហើយការជីកកាយរបស់ក្រុមឈ្មួញខាងលើនេះធ្វើឡើងច្រើនខែមកហើយ ចំពោះការដឹកដីវិញគឺមិនបានគ្របឱ្យបានត្រឹមត្រូវនោះឡើយធ្វើឱ្យដីធ្លាក់លើផ្លូវជាតិ មានធូលីដីហុយប៉ះពាល់ដល់សុខភាពរបស់បងប្អូនប្រជាពលរដ្ឋ ហើយអ្វីដែលគួរឲ្យចាប់អារម្មណ៍នោះ ប្រជាពលរដ្ឋចំនួន២ភូមិ អ្នកខ្លះមិនបានផ្តិតមេដៃយល់ព្រមក្នុងការសម្រួលដល់ការកាយដីអាងស្តុកទឹករបស់រដ្ឋនៅចំណុចខាងលើនេះទេ ។
ដែលអ្នកខ្លះ អះអាងថា ជាដីរបស់រដ្ឋ ហើយអាងស្តុកទឹកនេះគឺពួកគាត់ប្រើប្រាស់ទឹកចំនួន២ ភូមិ ទើបតែពេលថ្មីៗកន្លងមកនេះ ក៏ឃើញមានគ្រឿងចក្រចូលមកកាយដី ហើយដឹកយកទៅចាក់នៅកន្លែងពុះឡូតិ៍មួយកន្លែងដែលនៅមិនឆ្ងាយពីទីនេះប៉ុន្មានឡើយ។ ហើយការងាក មករកមុខជំនួញថ្មីរបស់ក្រុមឈ្មួញខាងលើ បានជីកកាយមិនចំផ្ទៃអាងនោះទេ គឺជីកកាយដីនៅជុំវិញផ្ទៃអាងទៅវិញដែលធ្វើឲ្យប្រជាពលរដ្ឋមានការងឿងឆ្ងល់ជាខ្លាំង។ ពលរដ្ឋបានដាក់ការសង្ស័យថា ប្រហែលជាការឃុបឃិតរវាងអាជ្ញាធរជំនាញពាក់ព័ន្ធ ក្រុមឈ្មួញអ្នកមានលុយមានអំណាច ដើម្បីយកលុយដាក់ហោប៉ៅរបស់ពួកគេនោះ។
ព័ត៌មានពិស្តារមានផ្សាយនៅកាសែតកោះសន្តិភាព
ចែករំលែកព័តមាននេះ