រាជធានីភ្នំពេញ ៖ បុរសម្នាក់បើកបររថយន្តមួយគ្រឿងទៅឈប់ចំកណ្ដាលផ្លូវ រួចដេកលង់លក់យ៉ាងរំភើប សង្ស័យតែគាត់ស្រវឹងខ្លាំងពេក បានបង្កឲ្យមានការភ្ញាក់ផ្អើលដល់សមត្ថកិច្ចមូលដ្ឋាននិងប្រជាពលរដ្ឋនាំគ្នាគោះទ្វារដាស់ កាលពីវេលាម៉ោង២និង១០នាទីរំលងអធ្រាត្រឈានចូលថ្ងៃទី២៧ ខែមេសា ឆ្នាំ២០១៩ ត្រង់ចំណុចខាងមុខនឹងសាលាខណ្ឌសែនសុខ…
រាជធានីភ្នំពេញ ៖ បុរសម្នាក់បើកបររថយន្តមួយគ្រឿងទៅឈប់ចំកណ្ដាលផ្លូវ រួចដេកលង់លក់យ៉ាងរំភើប សង្ស័យតែគាត់ស្រវឹងខ្លាំងពេក បានបង្កឲ្យមានការភ្ញាក់ផ្អើលដល់សមត្ថកិច្ចមូលដ្ឋាននិងប្រជាពលរដ្ឋនាំគ្នាគោះទ្វារដាស់ កាលពីវេលាម៉ោង២និង១០នាទីរំលងអធ្រាត្រឈានចូលថ្ងៃទី២៧ ខែមេសា ឆ្នាំ២០១៩ ត្រង់ចំណុចខាងមុខនឹងសាលាខណ្ឌសែនសុខ តាមបណ្ដោយផ្លូវហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ដែលស្រវឹង ខាងលើបានបើករថយន្តមួយគ្រឿងម៉ាកកាមរីហាយប្រ៊ីត ពណ៌ស្ករ ពាក់ស្លាកលេខ ភ្នំពេញ ២Q-៤៥៣៥ ដោយធ្វើដំណើរតាមបណ្ដោយផ្លូវហាណូយ ក្នុងទិសដៅពីត្បូងទៅជើង ។ បន្ទាប់មកស្រាប់តែបុរសជាអ្នកបើកបានបើករថយន្តទៅឈប់ចតនៅកណ្តាលទ្រូងផ្លូវនៅត្រង់ចំណុចកើតហេតុ រួចក៏ដេកលង់លក់យ៉ាងស្កប់ស្កល់នៅក្នុងរថយន្តតែម្តង ។
ប្រភពដដែលបានបន្តថា ខណៈនោះក៏មានប្រជាពលរដ្ឋដែលរស់នៅក្បែរនោះបានដើរមកជួយគោះទ្វាររថយន្តដើម្បីដាស់បុរសជាអ្នកបើកបរដែលស្រវឹងជោកជាំខាងលើឲ្យភ្ញាក់ ព្រោះខ្លាចមានជនខិលខូចឆ្លៀតឱកាសលួចយកទ្រព្យសម្បត្តិ និងខ្លាចក្រែងមានគ្រោះថ្នាក់ចរាចរណ៍កើតឡើងដោយប្រការណាមួយ។
ប្រភពដដែលបានបន្តទៀតថា ប្រជាពលរដ្ឋបានគោះទ្វារដាស់បុរសជាអ្នកបើកខាងលើ អស់រយៈពេលជិត១ម៉ោង ប៉ុន្តែបុរសនោះនៅតែមិនព្រមភ្ញាក់ដឹងខ្លួននោះទេ។ បន្ទាប់មកប្រជាពលរដ្ឋក៏បានរាយការណ៍ជូនសមត្ថកិច្ចមូលដ្ឋានដើម្បីឲ្យចុះមកជួយធ្វើការអន្តរាគមន៍វិញម្ដង។ ពេលនោះសមត្ថកិច្ចមូលដ្ឋានដែលកំពុងជិះល្បាតក្នុងមូលដ្ឋាន ក៏បានចុះមកដល់កន្លែងកើតហេតុ រួចក៏បានជួយគោះទ្វាររថយន្តដើម្បីដាស់រួមជាមួយនឹងប្រជាពលរដ្ឋជាបន្តទៀត លុះមួយសន្ទុះធំក្រោយមក ទើបបុរសដែលជាអ្នកបើករថយន្តនោះបានភ្ញាក់ដឹងខ្លួនរួចក៏បានបង្ហើបកញ្ចក់រថយន្តផងដែរ។ ប៉ុន្តែសមត្ថកិច្ចមិនអាចធ្វើការសួរនាំបាននោះទេ ព្រោះបុរសខាងលើស្រវឹងជោកជាំខ្លាំងពេក។
ក្រោយពេលកើតហេតុ ដោយមិនអាចបើកទ្វាររថយន្តខាងលើបាន និងមិនអាចសួរនាំបុរសជាអ្នកបើកបររថយន្តនោះបាន សមត្ថកិច្ចមូលដ្ឋានបានត្រឹមតែប្រាប់ឲ្យបុរសខាងលើបើករថយន្តអែបទៅចតលើចិញ្ចើមផ្លូវ និងបិទកញ្ចក់វិញប៉ុណ្ណោះ បន្ទាប់មកសមត្ថកិច្ចក៏ជិះម៉ូតូចាកចេញទៅបន្តការល្បាតបាត់ទៅ ចំណែកបុរសជាអ្នកបើកបររថយន្តដែលស្រវឹងដុនដាបក៏ដេកក្នុងរថយន្តរបស់ខ្លូនយ៉ាងស្កប់ស្កល់ជាបន្តទៀតផងដែរ៕
ចែករំលែកព័តមាននេះ