អាសូរ! ជាងភ្លើងម្នាក់ ម៉ូតូអស់សាំង កំពុងបណ្តើរតាមផ្លូវ ត្រូវរថយន្តស៊េរីទំនើបបុ.កពីក្រោយ ស្លា.ប់យ៉ាងអាណោចអាធ័ម
- ភ្នំពេញ
រាជធានីភ្នំពេញ ៖ បុរសម្នាក់ខណៈកំពុងតែបណ្តើរម៉ូតូអស់សាំង តាមផ្លូវក៍ត្រូវរថយន្ត lexus nx200t បើកជ្រុលទៅបុកពីក្រោយយ៉ាងពេញទំហឹង បណ្ដាលឲ្យខ្ទាតទាំងម៉ូតូនិងមនុស្សស្លាប់យ៉ាងអាណោចអាធ័ម នៅវេលាម៉ោង១១និង៣០នាទីយប់ ថ្ងៃទី៣១ ខែឧសភា ឆ្នាំ២០២៦ តាមបណ្តោយផ្លូវ១០៤ ភូមិព្រះធាតុ សង្កាត់រលួស ខណ្ឌដង្កោ រាជធានីភ្នំពេញ ។
ជនរងគ្រោះ មានឈ្មោះ ណយ វណ្ណា ភេទប្រុស អាយុ៣២ឆ្នាំ មុខរបរជាងភ្លើង ស្នាក់នៅកន្លែងធ្វើការ សង្កាត់រលួស ខណ្ឌដង្កោ មានស្រុកកំណើតនៅភូមិល្បើក ឃុំនគរភាស ឃុំអង្គរជុំ ខេត្តសៀមរាប ។ ដោយឡែកអ្នកបើកបររថយន្ដមិនទាន់ស្គាល់អត្តសញ្ញាណ ត្រូវបានសមត្ថកិច្ចឃាត់ខ្លួន ។
ប្រភពព័ត៌មានបានអោយដឹងថា មុនពេលកើតហេតុ ជនរងគ្រោះរួមទាំងមិត្តភ័ក្ដិម្នាក់ទៀត បានជិះម៉ូតូហុងដាឌ្រីម ពណ៌ខ្មៅ ពាក់ស្លាកលេខ បន្ទាយមានជ័យ 1C-6313 ចេញពីកន្លែងស្នាក់នៅ គោលបំណងទៅមើលកម្មវិធីប្រដាល់ នៅជិតកន្លែងកើតហេតុដែរទេ ដោយបានធ្វើដំណើរតាមបណ្តោយផ្លូវ១០៤ទិសដៅពីលិចទៅកើត លុះជិះមកដល់ពាក់កណ្ដាលផ្លូវ ក៍ស្រាប់តែម៉ូតូអស់សាំង ហើយបុរសជាជនរងគ្រោះបានបណ្តើរម៉ូតូ ចំនែកមិត្តភ័ក្ដិម្នាក់ទៀត បានជិះម៉ូតូកង់បីទៅទិញសាំង ខណៈដែលជនរងគ្រោះកំពុងបណ្ដើរដល់កន្លែងកើតហេតុជាផ្លូវងងឹត ក៍ស្រាប់តែបុរសម្នាក់បានបើករថយន្តម៉ាក lexusnx200t ពណ៌ស ពាក់ស្លាកលេខ ភ្នំពេញ BI 5334 បើកបោះពួយក្នុងទិសដៅស្របគ្នា ក៍ជ្រុលទៅបុកជនរងគ្រោះដែលកំពុងបណ្តើរម៉ូតូពីក្រោយយ៉ាងពេញទំហឹង បណ្ដាលឲ្យខ្ទាតទាំងមនុស្សនិងម៉ូតូជាច្រើនម៉ែត្រចូលក្នុងព្រៃស្មៅបោកក្បាលហូរឈាមយ៉ាងអាណោចអាធ័ម ។ ដោយឡែកខាងរថយន្តវិញ រងការខូចខាតផ្នែកខាងមុខចំហៀងខាងស្ដាំ ហើយអ្នកបើករថយន្តព្យាយាមបើករត់ទាំងបែកកង់ រហូតដល់មុខបុរីពិភពថ្មីគួរ៣ ខណ្ឌដង្កោដដែល ទើបសមត្ថកិច្ចឃាត់រថយន្តនិងអ្នកបើកបរប្រគល់អោយផ្នែកជំនាញចរាចរណ៍ ។
តាមប្រភពពីសាច់ញាតិជនរងគ្រោះដែលបានមកដល់កន្លែងកើតហេតុបានបញ្ជាក់ថា ជនរងគ្រោះបានជិះម៉ូតូជាមួយមិត្តភក្តិ ទៅមើលកម្មវិធីប្រដាល់ និងខនសឺត ក៍ជួបគ្រោះថ្នាក់បែបនេះតែម្តង ។
ក្រោយកើតហេតុ សមត្ថកិច្ចបានធ្វើលិខិតប្រគល់សពអោយសាច់ញាតិយកទៅធ្វើបុណ្យតាមប្រពៃណី ចំណែកមធ្យោបាយនិងអ្នកបើកបរ សមត្ថកិច្ចវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោក រង់ចាំចាត់ការតាមនិតិវិធី ៕
ចែករំលែកព័តមាននេះ