ត្រឹម១យប់! ស្លា.ប់៤នាក់ របួ.សធ្ងន់២នាក់ ក្នុងគ្រោះថ្នា.ក់ចរាចរណ៍ ៤ករណីផ្សេងគ្នា នៅខេត្តព្រៃវែង
- ព្រៃវែង
ខេត្តព្រៃវែង ៖ យ៉ាងហោចណាស់មានមនុស្សចំនួន ៤នាក់បានស្លាប់ និង ២នាក់ផ្សេងទៀតបានរងរបួសធ្ងន់ នៅក្នុងហេតុការណ៍គ្រោះថ្នាក់ចរាចរណ៍ ៤ករណីផ្សេងពីគ្នា នៅក្នុងយប់ថ្ងៃទី ៣១ ឧសភា។
ករណីទី១-បានកើតឡើងកាលពីវេលាម៉ោង ៦ និង ៣០នាទីយប់ ថ្ងៃទី ៣១ ឧសភា នៅលើកំណាត់ផ្លូវជាតិលេខ ១១ ត្រង់ចំណុចភូមិព្រៃខ្លាទី១ ឃុំព្រៃខ្លា ស្រុកស្វាយអន្ទរ ដោយម៉ូតូ១គ្រឿង ម៉ាក់វ៉េវ ពណ៌ខ្មៅ បើកបរដោយជនរងគ្រោះឈ្មោះ យ៉ាន វ៉ា ភេទប្រុស អាយុ 40 ឆ្នាំ រស់នៅភូមិចំបក់ ឃុំចុងអំពិល ស្រុកកញ្ជ្រាច បានបើកទៅបុកម៉ូតូសណ្ដោងរម៉ក ( ម៉ូតូលក់បបរមាន់ ) ពីក្រោយ បណ្ដាលឲ្យអ្នកបើកម៉ូតូស្លាប់ភ្លាមៗនៅនឹងកន្លែង ចំណែកអ្នកបើកម៉ូតូរម៉កឈ្មោះ ថន ស្រីអូន អាយុ 44 ឆ្នាំ រងរបួសធ្ងន់ធ្ងរ ត្រូវបានបញ្ជូនទៅព្យាបាលនៅមន្ទីរពេទ្យរាជធានីភ្នំពេញ។
ករណីទី២-បានកើតឡើងកាលពីវេលាម៉ោង ៨យប់ ថ្ងៃទី៣១ ឧសភា នៅលើកំណាត់ផ្លូវជាតិលេខ ១១ ក្នុងភូមិព្រែកខ្សាយ ឃុំព្រែកខ្សាយ ( ក ) ស្រុកស្រុកពាមរក៍ ត្រង់ចំណុចខាងមុខមន្ទីរសម្រាកព្យាបាល និង សម្ភព ញឹក ឌឹមនរ៉ា ដោយម៉ូតូឌ្រីមសង់១គ្រឿង បើកបរដោយឈ្មោះយឺន ភក្ត្រា ភេទប្រុស អាយុ 18 ឆ្នាំ ក្នុងស្ថានភាពស្រវឹងជោគ បានបើកទៅបុករថយន្តមួយគ្រឿង ម៉ាកលុចស៊ីស ពាក់ស្លាកលេខភ្នំពេញ ២CI ៩៩៨៧ ដែលកំពុងថយចេញពីមន្ទីរពេទ្យ មកកាត់ទទឹងថ្នល់ បណ្ដាលឲ្យអ្នកបើកបរម៉ូតូ បាក់កស្លាប់ភ្លាមៗនៅហ្នឹងកន្លែង។
ករណីទី៣-បានកើតឡើងកាលពីវេលាម៉ោង 10 និង ៥៥នាទីយប់ ថ្ងៃទី ៣១ ឧសភា នៅលើកំណាត់ផ្លូវកៅស៊ូក្នុងឃុំពាមមានជ័យ ស្រុកពាមរក៍ ដោយម៉ូតូហុងដា១គ្រឿង ពណ៌ខ្មៅបើកបរដោយឈ្មោះ គឹម ហុង ភេទប្រុស អាយុ 55 ឆ្នាំ រស់នៅភូមិបឹងផ្សោត ឃុំពាមមានជ័យ ក្នុងល្បឿនលឿន បានជ្រុលទៅបុកម៉ូតូ១គ្រឿងទៀតម៉ាកវ៉េវ ពណ៌ក្រហម បើកបរដោយបុរសម្នាក់មិនស្គាល់អត្តសញ្ញាណ បណ្ដាលឱ្យអ្នកបើកបរម៉ូតូវ៉េវ ស្លាប់បាត់បង់ជីវិតនៅនឹងកន្លែងកើតហេតុ ចំណែកជនបង្កបានរងរបួសធ្ងន់។
ចំណែកករណីទី៤-បានកើតឡើងនៅវេលាម៉ោង ៤ ទាបភ្លឺ ឈានចូលព្រឹកថ្ងៃទី ១ មិថុនា នៅលើកំណាត់ផ្លូវជាតិលេខ១ ត្រង់ចំណុចភូមិសទ្ធា ឃុំរំចេក ស្រុកព្រះស្ដេច ដោយជនសតិមិនគ្រប់ម្នាក់ឈ្មោះ តុល សុគា ភេទប្រុស អាយុ 46 ឆ្នាំមានទីលំនៅក្នុងភូមិជង្រុះ ឃុំរំចេក ស្រុកព្រះស្ដេច ត្រូវបានរថយន្តមិនស្គាល់ម៉ាក១គ្រឿងបុកបណ្ដាលឱ្យស្លាប់ភ្លាមៗ ក្នុងពេលកំពុងដើរតាមបណ្ដោយផ្លូវជាតិលេខ១ ហើយរថយន្តបង្ក បានរត់គេចខ្លួនបាត់ បន្សល់ទុកសាកសពជនរងគ្រោះនៅលើផ្លូវកន្លែងកើតហេតុ។
សរុបមក ក្នុងពេលត្រឹមតែ១យប់ ខេត្តព្រៃវែងកើតមានគ្រោះថ្នាក់ចរាចរណ៍ចំនួន ៤ ករណីបណ្ដាលឲ្យមនុស្សស្លាប់ចំនួន ៤នាក់ និងរងរបួសធ្ងន់២នាក់ នៅលើទីតាំង៤កន្លែងផ្សេងពីគ្នា ៕
ចែករំលែកព័តមាននេះ