ទីក្រុងរ៉ង់ហ្គូន៖ ហេតុការណ៍ផ្ទុះដ៏ខ្លាំងក្លាមួយនៅប្រទេសមីយ៉ាន់ម៉ាភាគឦសានកាលពីថ្ងៃអាទិត្យនៅអគារមួយកន្លែងដែលស្តុកទុកគ្រឿងផ្ទុះសម្រាប់យករ៉ែបានសម្លាប់មនុស្សជាង៤៥នាក់។ នេះបើយោងតាមក្រុមអ្នកជួយសង្គ្រោះ និងសារព័ត៌មានឯករាជ្យ។ ក្រៅពីនេះ មនុស្ស៧០នាក់ទៀតរងរបួសដោយសារហេតុការណ៍ផ្ទុះដែលកើតឡើងនៅវេលាល្ងាចនៅក្នុងភូមិកោងថូប (Kaungtup) នៃតំបន់ណាំខាំ (Namkham)។ ទីតាំងនេះស្ថិតនៅចម្ងាយបីគីឡូម៉ែត្រពីព្រំដែនប្រទេសចិន និងកំពុងស្ថិតនៅក្រោមការគ្រប់គ្រងរបស់ចលនាតស៊ូរំដោះជាតិតាអាង (Ta’ang )។ ពួកគេជាក្រុមជនជាតិភាគតិចដែលឧស្សាហ៍ប៉ះទង្គិចគ្នាជាមួយកងទ័ពមីយ៉ាន់ម៉ា។
អ្នកជួយសង្គ្រោះម្នាក់ដែលបានស្រូតរូតទៅកន្លែងផ្ទុះនោះបានប្រាប់ទីភ្នាក់ងារព័ត៌មាន AP ថាគិតត្រឹមយប់ថ្ងៃអាទិត្យ គេរកឃើញសាកសពជនរងគ្រោះ៤៦នាក់រួមទាំងកុមារ៦នាក់ផងដែរ និងបានដឹកជញ្ជូនទៅឈាបនដ្ឋានដើម្បីបូជា។ អ្នកជួយសង្គ្រោះដែលស្នើសុំមិនបញ្ចេញឈ្មោះនោះថ្លែងបន្តទៀតថាអ្នករបួស៧៤នាក់ត្រូវគេដឹកជញ្ជូនទៅមន្ទីរពេទ្យ។ រហូតមកដល់ពេលនេះ ប្រតិបត្តិការជួយសង្គ្រោះនៅតែបន្តធ្វើនៅឡើយទេ។ អ្នកជួយសង្គ្រោះម្នាក់ទៀតដែលស្នើសុំមិនបញ្ចេញឈ្មោះដែរថ្លែងថាមនុស្សប្រហែល៤០នាក់បានស្លាប់ និងផ្ទះជាង១រយខ្នងនៅក្បែរកន្លែងផ្ទុះនោះរងការខូចខាត។
សារព័ត៌មានមីយ៉ាន់ម៉ាចុះផ្សាយថាអត្រាស្លាប់អាចមានចន្លោះពី៥០ទៅ៥៥នាក់។ សារព័ត៌មានទាំងនោះបានចុះផ្សាយរូបថត និងវីឌីអូបង្ហាញផ្សែងដ៏ខ្មៅងងឹតហោះហើរចេញពីកន្លែងផ្ទុះ និងចេញពីអគារដែលរងការខូចខាត និងបង្ហាញកម្ទេចកម្ទីបាក់បែកដែលនៅរាយប៉ាយក្រោយហេតុការណ៍ផ្ទុះ។ ទូរទស្សន៍របស់រដ្ឋចិន ស៊ីស៊ីធីវី (CCTV) ផ្សាយថាការផ្ទុះនេះបណ្ដាលឱ្យស្លាប់ និងរបួសមនុស្សជាច្រើននាក់។ ផ្ទះរបស់អ្នកស្រុកនៅក្បែរនោះរងគ្រោះយ៉ាងធ្ងន់ធ្ងរ។
ទូរទស្សន៍ដដែលនេះផ្សាយបន្តទៀតថាយោងតាមលទ្ធផលស៊ើបអង្កេតបឋម ការផ្ទុះនេះកើតឡើងនៅលើទីតាំងមួយកន្លែងដែលស្តុកទុកគ្រឿងផ្ទុះយ៉ាងច្រើនសន្ធឹកសន្ធាប់សម្រាប់យករ៉ែ។ អាជ្ញាធរមូលដ្ឋានកំពុងផ្ដល់សេវាជួយសម្រាលបន្ទុករបស់អ្នករងគ្រោះ ក៏ដូចជាផ្ដល់ការថែទាំសុខភាព និងការសាងសង់ទីជម្រកសម្រាប់អ្នកដែលរងផលប៉ះពាល់ពីហេតុការណ៍នេះ។ កងទ័ពរំដោះជាតិតាអាងចេញសេចក្ដីប្រកាសថាគ្រឿងផ្ទុះត្រូវបានស្តុកទុកនៅក្នុងទីតាំងនោះយ៉ាងច្រើនសន្ធឹកសន្ធាប់សម្រាប់ទុកប្រើប្រាស់យករ៉ែ និងបំបែកថ្មភ្នំ៕ ប្រភព៖ AP
ចែករំលែកព័តមាននេះ