ខេត្តព្រៃវែង ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានហៅការអំពាវនាវរបស់ក្រុមប្រឆាំងពីក្រៅប្រទេសឲ្យប្រជាពលរដ្ឋប្រឆាំងនឹងរាជរដ្ឋាភិបាលជាអំពើនៃរដ្ឋប្រហារ ហើយមិនអាចកើតមានទៅរួចឡើយ ។ ការលើកឡើងរបស់សម្តេចក្រឡាហោម ស ខេង នេះខណៈលោកសម រង្ស៊ី អតីតមេបក្សប្រឆាំងដែលនៅក្រៅប្រទេសបានអំពាវនាវដល់ប្រជាពលរដ្ឋ និងកងកម្លាំងប្រដាប់អាវុធឲ្យប្រឆាំងនឹងរាជរដ្ឋាភិបាល។អតីតមេបក្សប្រឆាំងបានចាក់រុកសម្តេច ស ខេង ឲ្យចងកំហឹងជាមួយសម្តេចតេជោ ហ៊ុន សែនថែមទៀត ។
ឆ្លើយតបនឹងការលើកឡើងរបស់អតីតមេបក្សប្រឆាំងនេះសម្តេចស ខេង បានលើកឡើង ក្នុងពិធីបុណ្យបញ្ចុះខណ្ឌសីមាព្រះវិហារ និងឆ្លងសមិទ្ធិផលនានានៃវត្តសិរីមានជ័យហៅវត្តអង្គរជ័យ ស្ថិតក្នុងភូមិស្វាយ ឃុំអង្គររាជ្យ ស្រុកព្រះស្ដេច ខេត្តព្រៃវែង កាលពីថ្ងៃទី២៧ ខែមេសា ឆ្នាំ២០១៩ សម្តេចបានអំពាវនាវដល់ប្រជាពលរដ្ឋ និងអ្នកនយោបាយមកគ្រប់គណបក្សនយោបាយកុំចង់សាកក្នុងការចូលរួមធ្វើរដ្ឋប្រហារដូចការអំពាវនាវ (អតីតមេបក្សប្រឆាំង) ដែលជារឿងបុគ្គលឲ្យសោះព្រោះថា វាមិនងាយចប់នោះទេ ។
សម្តេចបានគូសបញ្ជាក់ថា «សូមបងប្អូនអ្នកធ្វើនយោបាយនៅមូលដ្ឋានសូមពិចារណា ហើយត្រូវទុកផលប្រយោជន៍ជាតិជាធំ ។ កុំយកផលប្រយោជន៍បុគ្គលបក្ខពួកជាធំ វាមិនងាយចប់ទេ ។ បើធ្វើឡើងវិញមានតែខ្ទេចហិនហោចអស់ហើយ» ។ ជាមួយគ្នានោះដែរសម្តេចក៏បានលើកពីការធ្វើបដិវត្តពណ៌ថា គឺជាសកម្មភាពបែបរដ្ឋប្រហារមួយប្រភេទដែលមិនប្រើប្រាស់កម្លាំងយោធាធ្វើនោះទេ ប៉ុន្តែប្រើកម្លាំងមហាជនដែលគេអះអាងថា អហិង្សា ។ យ៉ាងណាក្តីទោះបីជាមានក្រុមប្រឆាំងប្រើពាក្យអហិង្សាយ៉ាងណាក្តីសម្តេចស ខេង បានអះអាងថា ចុងបញ្ចប់នៃកាធ្វើរដ្ឋប្រហារបដិវត្តពណ៌ចុងនឹងកើតមានហិង្សា ។ រួចហើយមិនប្រាកដថា ឈ្នះនោះទេ ។ គឺក្រុមប្រឆាំងបានញួស ឬចាក់រុកឲ្យឈ្លោះគ្នា ដោយឲ្យរដ្ឋាភិបាល និងប្រជាជនជល់គ្នារហូតដល់បង្ហូឈាមដែលចុងក្រោយបានទៅលើអ្នកនយោបាយ» ។
សម្តេចបញ្ជាក់ថា «កុំឲ្យមានអាហ្នឹង ! ក្នុងនាមជាសមាជិករាជរដ្ឋាភិបាលម្នាក់ក៏មានចំណែកទទួលខុសត្រូវធំជាងគេ ក្នុងរឿងប្រឆាំងនឹងអំពើបដិវត្តន៍ពណ៌» ។ ជាមួយគ្នានោះដែរសម្តេចក៏បានរំលឹកពីសកម្មភាពនៃការបោះឆ្នោតឆ្នាំ២០១៣ថា ការបោះឆ្នោតបានប្រព្រឹត្តទៅដោយរលូនដោយមានការទទួលស្គាល់ពីអន្តរជាតិ និងគណបក្សនយោ បាយដែលចួលរួមបោះឆ្នោតប៉ុន្តែមានគណបក្សនយោបាយមួយ (បក្សសង្គ្រោះជាតិ) ប្រកាសមិនទទួលស្គាល់រហូតដល់ដើរកៀរគរប្រជាជនធ្វើបាតុកម្មរហូតដល់ចង់ផ្តួលរដ្ឋាភិបាល ប៉ុន្តែមិនជោគជ័យនោះទេ ។ សម្តេចបន្ថែមកាលបាតុកម្មឆ្នាំ២០១៣ បើប្រើប្រាស់កាំភ្លើងតែប៉ុន្មានបង់នោះបានស្លាប់អស់ ប៉ុន្តែមិនធ្វើទេ ព្រោះថាមើលទៅវាអា ណោចអាធម្មណាស់ គឺសុខចិត្តធ្វើតាមសន្តិវិធីដោយយកច្បាប់ជាធំ ដោយគ្មានអ្នកណាច្បាប់នោះទេ ។ លើកលែងតែចុងក្រោយក្រុមប្រឆាំងបានទៅញុះញង់នៅផ្លូវវេងស្រេងដែលមានរោងចក្រច្រើនដោយញួសញុងឲ្យកម្មករធ្វើបាតុកម្មរហូតដល់មានអ្នកស្លាប់ខ្លះ ។
សម្តេចក៏បានលើកឡើងថា បច្ចុប្បន្ននេះក្រុមប្រឆាំងបានកំពុងតែញុះញង់ និងបបួលប្រជាពលរដ្ឋ ដើម្បីធ្វើការប្រឆាំងនឹងរាជរដ្ឋាភិបាល ប៉ុន្តែការបបួលនេះមិនអាចធ្វើបានឡើងព្រោះថា ប្រជាជនបានដឹងច្បាស់ហើយ ។ សម្តេចគូសបញ្ជាក់បន្ថែមថា «មិនចាំបាច់អ្នកឯងថា រដ្ឋាភិបាលអាក្រក់ ម្តេចការនោះទេ គឺប្រជាជនលោកដឹងច្បាស់ជាងលោកឯងទៀត ហើយគាត់សម្រេចដោយខ្លួនគាត់តាមរយៈសន្លឹកឆ្នោត» ។
ចំពោះការបបួលរបស់ក្រុមប្រឆាំង ដើម្បីផ្តួលរំលំរាជរដ្ឋាភិបាលត្រូវបានសម្តេចគូសបញ្ជាក់ថា «អ្នកនយោបាយដែលមិនយល់ពីចិត្ត ពីបំណងរបស់ប្រជាជន គឺធ្វើមិនកើតទេ ដូច្នេះយើងត្រូវតែយល់អំពីបំណងប្រាថ្នា និងចិត្តសាស្ត្រចិត្តគាត់ ដើម្បីយើងធ្វើតម្រូវចិត្តគាត់ ។ វាអត់មានអីពិបាកដូចសម័យខ្មែរក្រហមនោះទេ» ។ សម្តេចថាអ្នកនយោបាយមួយចំនួនដែលបបួលឲ្យពលរដ្ឋបះបោរផ្តួលរំលំរដ្ឋាភិបាល គឺដេកចាំទៅព្រោះ ថាពលរដ្ឋសព្វថ្ងៃនេះទាំងជនបទ និងទីក្រុងយល់អស់ហើយ ៕
ចែករំលែកព័តមាននេះ