ខេត្តបន្ទាយមានជ័យ ៖ ក្រុមក្មេងទំនើង២ក្រុមបានធ្វើសកម្មភាពជិះម៉ូតូដេញកាប់គ្នាយ៉ាងសាហាវ បណ្តាលឱ្យភាគីម្ខាងរងបួសធ្ងន់ម្នាក់ ចំណែកភាគីម្ខាងទៀតរត់គេចខ្លួនបាត់បន្សល់ទុកម៉ូតូ១គ្រឿង និងកាំបិត២ដើម បង្កឲ្យភ្ញាក់ផ្អើលកើតឡើងកាលពីវេលាម៉ោង១និង៣០នាទីរសៀលថ្ងៃទី២៦ ខែមេសា ឆ្នាំ២០១៩ នៅតាមកំណាត់ផ្លូវជាតិលេខ៥៨ ស្ថិតនៅភូមិសិលាខ្មែរ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
បើតាមប្រភពព័ត៌មានពីនគរបាលប៉ុស្តិ៍ការពារព្រំដែនគោកលេខ៩១១ដែលឈរជើងនៅតំបន់នោះ ប្រាប់ថា មុនពេលកើតហេតុ គេឃើញភាគីក្រុមក្មេងទំនើងម្ខាងមានគ្នាប្រមាណជា១៤នាក់ មិនស្គាល់អត្តសញ្ញាណជិះម៉ូតូចំនួន៧គ្រឿង ចំណែកភាគីក្រុមក្មេងទំនើងម្ខាងទៀតមានគ្នាចំនួន៧នាក់ ជិះម៉ូតូចំនួន៤គ្រឿង ស្រាប់តែក្រុមក្មេងទំនើងទាំង២ក្រុមនេះបានយកកាំបិតជិះម៉ូតូដេញកាប់គ្នានៅតាមកំណាត់ផ្លូវជាតិលេខ៥៨ ស្ថិតនៅភូមិសិលាខ្មែរ ឃុំអូរបីជាន់ ស្រុកអូរជ្រៅ ដែលគេសង្ស័យថាជារឿងគំនុំសងសឹកស្លាប់រស់។
ប្រភពដដែលបានបន្តថា ក្នុងហេតុការណ៍ខាងលើនេះដែរ ភ្លាមៗនោះគេឃើញភាគីក្រុមក្មេងទំនើងម្ខាងមានគ្នាច្រើននាក់បានកាប់ត្រូវភាគីក្រុមក្មេងទំនើងម្ខាងទៀតដែលមានគ្នាតិចជាង បណ្តាលឱ្យរងបួសធ្ងន់ម្នាក់ឈ្មោះណា បូរ៉ា ភេទប្រុស អាយុ២៣ឆ្នាំ មុខរបរសិស្ស រស់នៅភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ រយះក្បាលធ្ងន់ធ្ងរ។
ក្រោយពីបានទទួលព័ត៌មានភ្លាមខាងលើភ្លាម កម្លាំងនគរបាលវរៈ(៩១១)ចុះទៅជួយអន្តរាគមន៍ តែខាងភាគីក្រុមក្មេងទំនើងដែលមានគ្នាច្រើនបានជិះម៉ូតូគេចខ្លួនបាត់អស់ បន្សល់ទុកនៅវត្ថុតាងម៉ូតូមួយគ្រឿងម៉ាកហ្សូមមើអិច និងកាំបិតចំនួន២ដើម ។ រីឯអ្នករងរបួសត្រូវបានកម្លាំងនគរបាលការពារព្រំដែនដឹកបញ្ជូនទៅសង្គ្រោះនៅមណ្ឌលសុខភាពសិលាខ្មែរ ឃុំអូរបីជាន់ បានទាន់ពេលវេលា ។ ចំណែកវត្ថុតាងបានប្រគល់ឲ្យកម្លាំងប៉ុស្តិ៍រដ្ឋបាលអូរបីជាន់ នៃអធិការដ្ឋាននគរបាលស្រុកអូរជ្រៅ ដើម្បីធ្វើការស្រាវជ្រាវស្វែងរកក្រុមក្មេងទំនើងដែលរត់គេចខ្លួនទាំងនោះ៕
ចែករំលែកព័តមាននេះ