រាជធានីភ្នំពេញ ៖ ជនសង្ស័យ២នាក់ បានត្រូវប្រជាពលរដ្ឋនាំគ្នាចាប់វាយរហូតទ្រមខ្លួន រួចប្រគល់ឲ្យនគរបាលចាត់ការតាមច្បាប់ បន្ទាប់ពីធ្វើសកម្មភាពឆក់ទូរស័ព្ទមិនបានសម្រេច ហើយព្យាយាមជិះម៉ូតូគេចខ្លួនក៏ជ្រុលទៅបុករថយន្តមួយគ្រឿងដែលចតស្ងៀមអែបផ្លូវ ។ ហេតុការណ៍នេះ បង្កឲ្យមានការភ្ញាក់ផ្អើល…
រាជធានីភ្នំពេញ ៖ ជនសង្ស័យ២នាក់ បានត្រូវប្រជាពលរដ្ឋនាំគ្នាចាប់វាយរហូតទ្រមខ្លួន រួចប្រគល់ឲ្យនគរបាលចាត់ការតាមច្បាប់ បន្ទាប់ពីធ្វើសកម្មភាពឆក់ទូរស័ព្ទមិនបានសម្រេច ហើយព្យាយាមជិះម៉ូតូគេចខ្លួនក៏ជ្រុលទៅបុករថយន្តមួយគ្រឿងដែលចតស្ងៀមអែបផ្លូវ ។ ហេតុការណ៍នេះ បង្កឲ្យមានការភ្ញាក់ផ្អើល កាលពីវេលាម៉ោង៣និង២០នាទីរសៀលថ្ងៃទី២៥ ខែមេសាកន្លងទៅ នៅក្នុងបុរីពិភពថ្មី ក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ ។
ជនសង្ស័យដែលត្រូវឃាត់ខ្លួននេះ ម្នាក់ឈ្មោះ ជីម សុខ ហៅរតនា អាយុ២៣ឆ្នាំ មានទីលំនៅភូមិសុភី ឃុំសុភី ស្រុកបាទី ខេត្តតាកែវ និងម្នាក់ឈ្មោះ ធុន ថុល អាយុ៣០ឆ្នាំ ស្នាក់នៅផ្ទះជួលក្នុងសង្កាត់ទួលសង្កែទី១ ខណ្ឌឫស្សីកែវ ។ តាមព័ត៌មានឲ្យដឹងថា ជនសង្ស័យទាំង២នាក់ជិះម៉ូតូមួយគ្រឿង ម៉ាកហុងដា សេ១២៥ ពណ៌ខ្មៅ ពាក់ផ្លាកលេខ ភ្នំពេញ ១O-៤០៦៣ បានធ្វើសកម្មភាពឆក់ទូរស័ព្ទពីអ្នកដំណើរប្រុសស្រី២នាក់ ដែលកំពុងជិះម៉ូតូកង់បីនៅខាងមុខផ្សារម៉ាក្រូ តែមិនបានសម្រេច ។
ខណៈនោះដែរ ម្ចាស់ទូរស័ព្ទបានស្រែកថា ចោរៗ ធ្វើឲ្យជនសង្ស័យភ័យស្លន់ស្លោជិះម៉ូតូគេចខ្លួនចូលក្នុងបុរីពិភពថ្មីក្បែរផ្សារអីុអន២ ក៏ជ្រុលទៅបុករថយន្តអ្នកដំណើរដែលឈប់ចតស្ងៀមបណ្តាលឲ្យដួល ហើយត្រូវប្រជាពលរដ្ឋនាំគ្នាចាប់បានវាយរហូតទ្រមខ្លួន ។ បន្ទាប់មកសមត្ថកិច្ចក៏ទៅដល់ហើយនាំខ្លួនទៅចាត់ការតាមច្បាប់ តែម្ចាស់ទូរស័ព្ទបានទៅបាត់ដោយពុំបានដាក់ពាក្យបណ្តឹងឡើយ ៕
ចែករំលែកព័តមាននេះ