រាជធានីភ្នំពេញ ៖ អគ្គនាយកបច្ចេកទេសធនាគារជាតិនៃកម្ពុជាបានបញ្ជាក់ថា ការរក្សាបាននូវស្ថិរភាពហិរញ្ញវត្ថុបានល្អ គឺវាមានសារៈសំខាន់ចំពោះសេដ្ឋកិច្ចជាតិទាំងមូល ហើយប្រៀបធៀបទៅនឹងខ្លួនប្រាណ គឺវាស្មើនិងបេះដូងរបស់មនុស្ស។ថ្លែងក្នុងពិធីផ្សព្វផ្សាយពីសៀវភៅស្តីពីស្ថិរភាពហិរញ្ញវត្ថុឆ្នាំ២០១៨ លោកស្រី ជា សិរី អគ្គនាយកបច្ចេកទេសធនាគារជាតិនៃកម្ពុជាមានប្រសាសន៍ថា ប្រទេសនៅលើពិភពលោកមានការផ្តោតនិងយកចិត្តទុកដាក់ខ្លាំង លើប្រព័ន្ធហិរញ្ញវត្ថុក្រោយមានវិបត្តិសេដ្ឋកិច្ចនៅឆ្នាំ២០០៧ និង២០០៨។ ក្រោយមានវិបត្តិនេះ អាជ្ញាធររូបិយវត្ថុទាំងអស់ចាប់ផ្តើមយល់ពីសារៈសំខាន់នៃការរក្សាប្រព័ន្ធហិរញ្ញវត្ថុ។
លោកស្រី ជា សិរី បន្តថា «ចំពោះវិស័យសេដ្ឋកិច្ច ប្រទេសណាមួយនៅពេលវិស័យហិរញ្ញវត្ថុមិនដើរ ក៏ធ្វើឱ្យប៉ះពាល់ដល់វិស័យដទៃទៀតដែរ។បើសិនក្រុមហ៊ុនមួយគាត់ចង់ពង្រីកអាជីវកម្មក៏ មិនអាចធ្វើទៅបានដោយសារវិស័យហិរញ្ញវត្ថុ គាត់អត់មានធនធាន គាត់អត់អាចខ្ចីលុយពីគ្រឹះស្ថានវិស័យហិរញ្ញវត្ថុមិនបាន»។
អគ្គនាយកបច្ចេកទេសធនាគារជាតិនៃកម្ពុជាបានពន្យល់និងប្រៀបធៀបថា វិស័យសេដ្ឋកិច្ចប្រៀបដូចទៅនិងខ្លួនមនុស្ស រីឯវិស័យហិរញ្ញវត្ថុប្រៀបធៀបទៅនិងបេះដូងរបស់មនុស្ស ។ កាលណាបេះដូងខ្សត់ឈាមទៅចិញ្ចឹមសារីរាង្គផ្សេងៗនោះ វិស័យហិរញ្ញវត្ថុក៏ខ្សត់នូវមូលធនយកទៅអភិវឌ្ឍន៍វិស័យផ្សេងទៀត។ ដូចនេះបើបេះដូងឈប់ដើរ មនុស្សយើងនឹងស្លាប់ ។ ចំពោះវិស័យសេដ្ឋកិច្ច កាលណាវិស័យហិរញ្ញវត្ថុមិនដំណើរការក៏ធ្វើឱ្យប៉ះពាល់ដល់វិស័យដទៃទៀត បើសិនក្រុមហ៊ុនមួយចង់ពង្រីកអាជីវកម្ម ក៏គាត់មិនអាចធ្វើទៅបាន»។
លោកស្រីសង្កត់ធ្ងន់ថា ដូចនេះការរក្សាស្ថិរភាពហិរញ្ញវត្ថុ ដែលជាប្រព័ន្ធបេះដូងនៃសេដ្ឋកិច្ចនេះដើរបានស្រួលបួល ត្រូវសង្វាក់ដែលគាត់ត្រូវដើរគឺមានសារសំខាន់ចំពោះសេដ្ឋកិច្ចទាំងមូល។ ចំណែកលោកស្រី នាវ ច័ន្ទថាណា ទេសាភិបាលរងធនាគារជាតិនៃកម្ពុជា បានបញ្ជាក់ថានេះជាលើកដំបូងហើយ ដែលធនាគារជាតិនៃកម្ពុជាបោះផ្សាយសៀវភៅស្តីពីស្ថានភាពស្ថិរភាពហិរញ្ញវត្ថុ ក្រោយពីបានបង្កើតគណៈកម្មាធិការស្ថិរភាពហិរញ្ញវត្ថុនៅធនាគារជាតិនៃកម្ពុជា កាលពី ៨ឆ្នាំមុន។
លោកស្រីមានប្រសាសន៍បន្តថា «ខ្ញុំសូមបញ្ជាក់ថា ធនាគារជាតិនៃកម្ពុជាបានពង្រឹងយន្តការតាមដានស្ថិរភាពហិរញ្ញវត្ថុ ជាមួយនឹងការអភិវឌ្ឍសមត្ថភាពធនធានជំនាញចាប់តាំងពីឆ្នាំ២០១១មក ក្រោមការផ្តល់ជំនួយបច្ចេកទេសរបស់មូលនិធិរូបិយវត្ថុអន្តរជាតិ។សៀវភៅស្តីពីស្ថានភាពស្ថិរភាពហិរញ្ញវត្ថុដែលយើងមាននៅក្នុងដៃនាពេលនេះ ត្រូវបានរៀបចំឡើងដោយចំណាយពេលប្រមាណ ៩ខែ ក្រោមការដឹកនាំដោយផ្ទាល់ពីអ្នក ជំនាញការមូលនិធិរូបិយវត្ថុអន្តរជាតិប្រចាំធនាគារជាតិនៃកម្ពុជា»។
យ៉ាងណាមិញលោកស្រី នាវ ច័ន្ទថាណា សង្កត់ធ្ងន់ថា «ខ្ញុំសង្ឃឹមថា សៀវភៅស្តីពីស្ថានភាពស្ថិរភាពហិរញ្ញវត្ថុប្រចាំឆ្នាំ២០១៨នេះ នឹងក្លាយជាឯកសារមួយដ៏មានតម្លៃសម្រាប់ជូនសាធារណជនក្នុងការសិក្សាស្វែងយល់ពីវិស័យហិរញ្ញវត្ថុ និងផ្តល់ជាធាតុចូលមួយក្នុងការរៀបចំគោលនយោបាយនានារបស់វិស័យសាធារណៈនិងឯកជន ពិសេស វិនិយោគិន, គ្រឹះស្ថានធនាគារនិងហិរញ្ញវត្ថុ និងភាគីពាក់ព័ន្ធនានា ក្នុងការសម្រេចចិត្តលើការវិនិយោគ ពង្រីកអាជីវកម្ម និងពង្រឹងកិច្ចការពារហានិភ័យនានាដែលអាចកើតឡើងជាយថាហេតុ ឱ្យបានកាន់តែប្រសើរ សំដៅរួមចំណែកអភិវឌ្ឍវិស័យហិរញ្ញវត្ថុប្រកបដោយចីរភាពនិងបរិយាប័ន្ន ដែលនឹងគាំទ្រដល់គោនយោបាយរបស់រាជរដ្ឋាភិបាលក្នុងការកាត់បន្ថយភាពក្រីក្រ និងអភិវឌ្ឍសេដ្ឋកិច្ចជាតិ»។
តាមការឲ្យដឹងរបស់លោកស្រី នាវ ច័ន្ទថាណា គឺថាធនាគារជាតិនៃកម្ពុជា គ្រោងនឹងបោះផ្សាយនូវសៀវភៅស្តីពីស្ថានភាពស្ថិរភាពហិរញ្ញវត្ថុប្រចាំឆ្នាំបន្តទៀតនាឆ្នាំខាងមុខ ស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០១៦-២០២៥ របស់រាជរដ្ឋាភិបាល៕
ចែករំលែកព័តមាននេះ