រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌដង្កោបានដាក់គោលដៅត្រួតពិនិត្យអាវុធជាតិផ្ទុះក្នុងមូលដ្ឋានរបស់ខ្លួនជាប់ជាប្រចាំ ថ្វីដ្បិតតែរកមិនឃើញមានអ្នកកាន់កាប់និងប្រើប្រាស់អាវុធខុសច្បាប់មែនប៉ុន្តែបានរកឃើញជនសង្ស័យជាអ្នកជួញដូរគ្រឿងញៀនចំនួន២នាក់ ព្រមទាំងឃាត់ខ្លួននាំទៅសាកសួរ និងកសាងសំណុំរឿងចាត់ការតាមច្បាប់។
ការចាប់ឃាត់ខ្លួនជនសង្ស័យទាំង២នាក់ខាងលើនេះបានធ្វើឡើងកាលពីវេលាម៉ោង៧និង៤០នាទីយប់ថ្ងៃទី២៤ ខែមេសា ឆ្នាំ២០១៩ នៅតាមផ្លូវលេខ២១៧ ត្រង់ចំណុចមុខវត្ដសំបួរមាស ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
ជនសង្ស័យទាំង២នាក់ដែលត្រូវសមត្ថកិច្ចឃាត់ខ្លួន ក្នុងនោះម្នាក់ឈ្មោះ ម៉ៅ ភាព ភេទប្រុស អាយុ១៨ឆ្នាំ មានទីលំនៅភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ និងម្នាក់ទៀតឈ្មោះ សៀន វណ្ណា ភេទប្រុស អាយុ២១ឆ្នាំ មានទីលំនៅភូមិភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ ។
ក្រោយពេលចាប់ខ្លួនជនសង្ស័យទាំង២នាក់ខាងលើ កម្លាំងសមត្ថកិច្ចបានធ្វើការដកហូតបានវត្ថុតាងមួយចំនួនដូចជា ថ្នាំញៀន១កញ្ចប់ធំ ម៉ូតូ១គ្រឿង និងទូរស័ព្ទ១គ្រឿង ។
លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោបានឲ្យដឹងថា កាលពីវេលាម៉ោង៧និងយប់ថ្ងៃទី២៤ ខែមេសា ឆ្នាំ២០១៩ កម្លាំងគណៈបញ្ជាការឯកភាពខណ្ឌដង្កោ បានចុះត្រួតពិនិត្យអាវុធជាតិផ្ទុះនៅត្រង់ចំណុចខាងលើ ដើម្បីទប់ស្កាត់រាល់បទល្មើសទាំងឡាយ។លុះរយៈពេល៤០នាទីក្រោយមក ក៏លេចមុខជនសង្ស័យចំនួន២នាក់ ជិះម៉ូតូ១គ្រឿង ម៉ាកគុបចង្កៀងជ្រុង ពណ៌ទឹកប្រាក់ ពាក់ស្លាកលេខ ភ្នំពេញ ១W-១៥៩២ ធ្វើដំណើរក្នុងទិសដៅពីជើងទៅត្បូង ឆ្លងកាត់គោលដៅត្រួតពិនិត្យ ។
លោកអធិការនគរបាលខណ្ឌដង្កោបានបន្តឱ្យដឹងថា ដោយមានការសង្ស័យ កម្លាំងចម្រុះក៏បានហៅឲ្យឈប់ និងធ្វើការឆែកឆេររកឃើញថ្នាំញៀន១កញ្ចប់នៅក្នុងហោប៉ៅខោខាងឆ្វេងរបស់ឈ្មោះ ម៉ៅ ភាព ទើបឃាត់ខ្លួនជនសង្ស័យទាំង២នាក់ខាងលើ រួមនឹងវត្ថុតាង យកមកធ្វើការសាកសួរនៅអធិការដ្ឋាននគរបាលខណ្ឌដង្កោតាមនីតិវិធីច្បាប់តែម្ដង៕
ចែករំលែកព័តមាននេះ