ប្រទេសថៃ ៖ យោងតាមភ្នាក់ងារសារព័ត៌មាន Bangkok Post កាលពីថ្ងៃទី ២៤កន្លងមកបានឲ្យដឹងថា ធនាគារពិភពលោកបានប្រាប់មកថា ភាពមិនប្រាកដប្រជាផ្នែកនយោបាយក្នុងស្រុកអាចបង្កជាហានិភ័យដ៏ធំសម្រាប់ការលូតលាស់ GDP…
ប្រទេសថៃ ៖ យោងតាមភ្នាក់ងារសារព័ត៌មាន Bangkok Post កាលពីថ្ងៃទី ២៤កន្លងមកបានឲ្យដឹងថា ធនាគារពិភពលោកបានប្រាប់មកថា ភាពមិនប្រាកដប្រជាផ្នែកនយោបាយក្នុងស្រុកអាចបង្កជាហានិភ័យដ៏ធំសម្រាប់ការលូតលាស់ GDP របស់ប្រទេសថៃក្នុងឆ្នាំនេះ ព្រោះការពន្យាពេលក្នុងការបង្កើតរដ្ឋាភិបាលថ្មីអាចប៉ះពាល់ដល់គម្រោងវិនិយោគសាធារណៈ និងប៉ះពាល់ដល់ចំណាប់អារម្មណ៍ក្នុងការវិនិយោគក្នុងវិស័យឯកជន។
លោក Kiatipong Ariyapruchya ដែលជាសេដ្ឋវិទូថ្នាក់ខ្ពស់សម្រាប់ប្រទេសថៃនៅធនាគារពិភពលោកបានឲ្យដឹងថា “គម្រោងវិនិយោគសាធារណៈអាចត្រូវបានប៉ះពាល់ប្រសិនបើការបង្កើតរដ្ឋាភិបាលថ្មីត្រូវបានពន្យាពេល។ គម្រោងវិនិយោគសាធារណៈក្នុងកំឡុងឆ្នាំ ២០១៩ ដល់ ២០២០ មិនទទួលការប៉ះពាល់ទេ ប៉ុន្តែគម្រោងដែលនឹងចាប់ផ្តើមពីឆ្នាំ ២០២១ អាចនឹងទទួលរងគ្រោះ។ ការវិនិយោគដែលបង្ហាញសញ្ញាថាកំពុងតែល្អប្រសើរឡើងក៏មានហានិភ័យថានឹងអន់ថយដែរ”។
យោងទៅតាមធនាគារពិភពលោកបានឲ្យដឹងទៀតថា GDP របស់ប្រទេសថៃអាចនឹងលូតលាស់បាន ៣.៨%ក្នុងឆ្នាំ ២០១៩ និង ៣.៩%ក្នុងឆ្នាំ ២០២០ ដែលទាបជាងការព្យាករណ៍មុនដែលស្មើ ៤.១%ព្រោះតែឧបសគ្គមួយចំនួនដូចជាការអន់ថយនៃទស្សនៈវិស័យសេដ្ឋកិច្ចពិភពលោក ការធ្លាក់ចុះនៃទិន្នផលឧស្សាហកម្ម និងភាពតានតឹងពាណិជ្ជកម្មរវាងសេដ្ឋកិច្ចធំជាងគេទាំងពីររបស់ពិភពលោកជាដើម។
ធនាគារនេះព្យាករណ៍ទៀតថា ការនាំចេញផលិតផលនិងសេវាកម្មរបស់ប្រទេសថៃនឹងលូតលាស់បាន ៥.៧%ក្នុងឆ្នាំនេះ។
ពួកគេបានបន្តថា “ការលូតលាស់នឹងត្រូវបានជំរុញដោយការចំណាយសាធារណៈលើគម្រោងហេដ្ឋារចនាសម្ព័ន្ធធំៗ ក៏ដូចជាការលូតលាស់យ៉ាងលឿននៃការចំណាយ និងការវិនិយោគឯកជន ”។
ជាមួយគ្នានេះផងដែរ ធនាគារពិភពលោកបានឲ្យដឹងទៀតថា ការព្យាករណ៍លើ GDP របស់ប្រទេសថៃមានកម្រិតទាបជាងកគារសម្រាប់ប្រទេសអាស៊ានដែលកំពុងតែអភិវឌ្ឍន៍ ខណៈដែលអត្រាលូតលាស់ GDP ជាមធ្យមរបសើតំបន់ស្មើត្រឹម ៤.៥%។
យ៉ាងណាក្តី លោក Kiatipong បាននិយាយថា “ពួកយើងមិនគួរប្រៀបធៀបអត្រាលូតលាស់ GDP របស់ប្រទេសថៃទៅនឹងប្រទេសជិតខាងទេ។ ប្រទេសមានទស្សនៈវិស័យសេដ្ឋកិច្ចល្អប្រសើរជាង ២ទៅ៣ឆ្នាំមុន ព្រោះតម្រូវការក្នុងស្រុកបានជួយបំពេញចម្លោះនៃការអន់ថយការនាំចេញ ខណៈដែលការវិនិយោគសាធារណៈ និងឯកជន ក៏ដូចជាការលក់យានយន្តកំពុងតែចាប់ផ្តើមល្អប្រសើរវិញដែរ៕
ចែករំលែកព័តមាននេះ