រាជធានីភ្នំពេញ ៖ ស្ត្រីអាយុ៣៤ឆ្នាំម្នាក់បានចិត្តចង.កសម្លាប់ខ្លួនចោលប្តីនិងកូនប្រុស-ស្រី៣នាក់ និងបង្កឱ្យមានការភ្ញាក់ផ្អើលឡើង កាលពីវេលាម៉ោងប្រមាណ៥និង៣០នាទីព្រឹកថ្ងៃទី២៥ ខែមេសា នៅចំណុចហាងអ៊ុតសក់មួយកន្លែងយីហោ «ណាផាសាឡន» តាមផ្លូវលេខ៣៥១ ក្នុងភូមិតាងូវកណ្តាល សង្កាត់និរោធ ខណ្ឌច្បារអំពៅ ។
ស្ត្រីរូបនេះឈ្មេាះ ថន គឹមស្រស់ អាយុ៣៤ឆ្នាំ ជាម្ចាស់ហាងអ៊ុតសក់ខាងលើ ។ នាងមានប្តីជាមន្ត្រីនគរបាលផ្នែកអន្តរាគមន៍នៃអធិការដ្ឋានខណ្ឌចំការមន ហើយបច្ចុប្បន្ននាងមានកូនប្រុសស្រី៣នាក់ផងដែរ (ប្រុស២ ស្រី១ ) ។
តាមប្រភពព័ត៌មានឱ្យដឹងថា នៅយប់ថ្ងៃទី២៤ ខែមេសា ស្ត្រីរងគ្រោះនិងប្តី ព្រមទាំងក្រុមគ្រួសារបងប្អូនជាច្រើននាក់ បាននាំគ្នាអង្គុយហូបស្រាបៀរជាលក្ខណៈគ្រួសារធម្មតា ។ ប៉ុន្តែកំឡុងពេលអង្គុយហូបនោះ គេឯងសប្បាយគ្រប់គ្នា លើកលែងតែស្ត្រីរងគ្រេាះពំុសូវមាត់.កឡើយ ហើយអង្គុយចុចតែទូរស័ព្ទឆ្លងឆ្លើយសារ តែគេពំុដឹងថា ឆ្លើយឆ្លងជាមួយអ្នកណាទេ ។
លុះយប់កាន់តែជ្រៅ ការហូបចុកជំុគ្នាក៏បានបញ្ចប់ ដោយម្នាក់ៗសុទ្ធតែស្រវឹងក៏ចូលទៅតាមបន្ទប់សម្រាករៀងៗខ្លួន លុះព្រឹកឡើងវេលាម៉ោងប្រមាណ៥និង៣០នាទីថ្ងៃទី២៥ ខែមេសា ខណៈបុរសជាប្តីក្រោកឡើង ស្រាប់តែឃើញប្រពន្ធចងកស្លាប់ទៅហើយ នៅនឹងបង្អួចដែកខាងក្រោមផ្ទះ កន្លែងរកស៊ី ។
ក្រោយកើតហេតុ នគរបាលមូលដ្ឋានរួមជាមួយនគរបាលជំនាញ បានទៅពិនិត្យនិងធ្វើកោសល្យវិច័យកន្លែងកើតហេតុ និងសពស្ត្រីរងគ្រេាះយ៉ាងល្អិតល្អន់រួចមកឃើញថា នាងពិតជាចងកសម្លាប់ខ្លួនប្រាកដមែន ពំុមែនជាករណីអ្វីផ្សេងឡើយ ។ ក្រោយពីពិនិត្យរួច សពត្រូវបានប្រគល់ជូនក្រុមគ្រួសារសាច់ញាតិ ដើម្បីយកទៅធ្វើបុណ្យតាមប្រពៃណី ។
ជំុវិញករណីខាងលើនេះ អធិការរងនគរបាលខណ្ឌច្បារអំពៅ ទទួលផែនព្រហ្មទណ្ឌ លោកវរសេនីយ៍ទោ ម៉ៅ សឿត ប្រាប់កេាះសន្តិភាពថា ករណីនេះបើតាមការសាកសួរបុរសជាប្តីថា មួយរយៈចុងក្រោយនេះ ប្រពន្ធគាត់ឧស្សាហ៍ចុចទូរស័ព្ទឆាតលេងណាស់ តែពំុដឹងឆាតឆ្លងឆ្លើយជាមួយអ្នកណាទេ ។
នៅយប់ថ្ងៃកើតហេតុ ខណៈបងប្អូនក្រុមគ្រួសារកំពុងអង្គុយហូបចុកសប្បាយ បែរជានាងកើតទុក្ខនិងអង្គុយចុចទូរស័ព្ទឆ្លើយឆ្លងរហូត ។ នាងហូបស្រាបៀរអស់តែ២ ទៅ៣កំប៉ុងប៉ុណ្ណោះ លុះព្រឹកឡើងស្រាប់តែកើតុរឿងហេតុដូចខាងលើតែម្តង ។
យ៉ាងណាមិញ ករណីនេះពំុមានប្រភពច្បាស់ការណ៍ណាមួយបញ្ជាក់ពីមូលហេតុដែលនាំឲ្យស្ត្រីជាម្ចាស់ហាងសម្អាងខាងលើចងកសម្លាប់ខ្លួននោះទេ ៕
ចែករំលែកព័តមាននេះ