ខេត្តបាត់ដំបង៖ គ្រាប់យុទ្ធភ័ណ្ឌដែលមិនទាន់ផ្ទុះជិត២០គ្រាប់ ត្រូវបានប្រជាពលរដ្ឋប្រទះឃើញ កាលពីល្ងាចថ្ងៃទី២៤ មេសា ដែលគ្រាប់ខ្លះត្រូវបានពលរដ្ឋប្រទះឃើញនៅក្នុងទឹកប្រឡាយ និងខ្លះទៀតប្រទះឃើញពេលភ្ជួរដីចំការ នៅចំណុចភូមិស្ពាន ឃុំគាស់ក្រឡ ស្រុកគាស់ក្រឡ។
សមត្ថកិច្ចបានឲ្យដឹងថា គ្រាប់យុទ្ធភ័ណ្ឌមិនទាន់ផ្ទុះដែលប្រជាពលរដ្ឋបានប្រទះឃើញទាំងនោះសរុបមានចំនួន១៨គ្រាប់ ក្នុងនោះមាន ប្រភេទគ្រាប់ B.40 ចំនួន១២គ្រាប់, ប្រភេទគ្រាប់ធុន៦០មីល្លីម៉ែត្រ ចំនួន៣គ្រាប់, ប្រភេទគ្រាប់ធុន៦២មីល្លីម៉ែត្រ ចំនួន១គ្រាប់, គ្រាប់M79 ចំនួន១គ្រាប់ និងប្រភេទគ្រាប់ណាប៉ាចំនួន១គ្រាប់។ បើតាមសេចក្ដីរាយការណ៏បានបញ្ជាក់ថា គ្រាប់យុទ្ធភ័ណ្ឌទាំងនេះត្រូវបានប្រជាពលរដ្ឋភ្ជួរដីចំការប្រទះឃើញ ហើយគ្រាប់ខ្លះទៀតប្រទះឃើញនៅក្នុងទឹកប្រឡាយ។ បន្ទាប់ពីរកឃើញ ប្រជាពលរដ្ឋបានរាយការណ៏ជូនសមត្ថកិច្ចឲ្យចុះមកត្រូតពិនិត្យភ្លាមៗផងដែរ។
លោកប៉ាង ហៀង អធិការនគរបាលស្រុកគាស់ក្រឡបានឲ្យដឹងថា បើតាមការពិនិត្យជាក់ស្ដែង គ្រាប់កាំភ្លើងទាំងនោះកប់នៅក្នុងដី ដែលសេសសល់ពីសម័យសង្គ្រាម ហើយគ្រាប់ទាំងនោះហាក់មានសភាពច្រែះចាប់អស់ទៅហើយ តែអាចបង្កឲ្យមានគ្រោះថ្នាក់បាន ប្រសិនបើមានការប៉ះទង្គិចធ្ងន់ធ្ងរ ព្រោះគ្រាប់ខ្លះមាននៅភ្ជាប់ក្បាលបំផ្ទុះនៅឡើយ។
លោកអធិការបាននិយាយថា ក្រោយពេលប្រទះឃើញ មន្ត្រីប៉ុស្ដិ៍រដ្ឋបាលរបស់លោកបានចុះទៅពិនិត្យ និងបានហ៊ុមព័ទ្ធទីតាំងមិនឲ្យមានការប៉ះពាល់ ដើម្បីរង់ចាំកម្លាំងកំចាត់មីនស៊ីម៉ាកចុះមកធ្វើការត្រូតពិនិត្យ និងដោះស្រាយតាមបច្ចេកទេស។ ទោះបីយ៉ាងជាណា លោកប៉ាង ហៀង បានបញ្ជាក់ថា ពេលនេះមន្ត្រីអង្គភាពកំចាត់មីនស៊ីម៉ាកបានចុះទៅប្រមូលគ្រាប់យុទ្ធភ័ណ្ឌទាំងនោះយកទៅកំទេចចោលហើយ៕
ចែករំលែកព័តមាននេះ