ខេត្តក្រចេះ ៖ បុរសម្នាក់ដែលពិការជើងម្ខាងរស់នៅក្នុងឃុំវឌ្ឍនៈ ស្រុកសំបូរ បានកាន់រូបថតប្រពន្ធជាច្រើនសន្លឹកសួរគេឯងស្វែងរកប្រពន្ធ ក្រោយពីនាងបាត់ខ្លួនពីផ្ទះគ្មានដំណឹងឈឹងអស់រយៈពេលជាង១សប្តាហ៍មកហើយ ។ បុរសដែលពិការស្វិតជើងម្ខាងរូបនេះ ឈ្មោះ តាំង…
ខេត្តក្រចេះ ៖ បុរសម្នាក់ដែលពិការជើងម្ខាងរស់នៅក្នុងឃុំវឌ្ឍនៈ ស្រុកសំបូរ បានកាន់រូបថតប្រពន្ធជាច្រើនសន្លឹកសួរគេឯងស្វែងរកប្រពន្ធ ក្រោយពីនាងបាត់ខ្លួនពីផ្ទះគ្មានដំណឹងឈឹងអស់រយៈពេលជាង១
សប្តាហ៍មកហើយ ។ បុរសដែលពិការស្វិតជើងម្ខាងរូបនេះ ឈ្មោះ តាំង គឹមស្រ៊ាង ហៅញ៉េប អាយុ៥២ឆ្នាំ បានរៀបរាប់ឲ្យដឹងនៅថ្ងៃទី២៤ ខែមេសាថា ប្រពន្ធរបស់គាត់ឈ្មោះ សួន សុភ័ណ អាយុ៣៨ឆ្នាំ បានចេញបាត់ពីផ្ទះតាំងពីថ្ងៃទី១៧ ខែមេសា គឺតាំងពីថ្ងៃចូលឆ្នាំចុងក្រោយមកម្លេ៉ះ ហើយរហូតមកទល់នឹងពេលនៅមិនទាន់មានដំណឹងនៅឡើយទេ ។ បុរសរូបនេះនិយាយថា ការបាត់ខ្លួនប្រពន្ធរបស់គាត់សង្ស័យជាអំពើផិតក្បត់ គឺប្រពន្ធរបស់គាត់អាចនឹងរត់តាមមនុស្សប្រុសម្នាក់ នៅក្នុងភូមិដែលជាសហាយ ។
គាត់រៀបរាប់ថា ប្តីប្រពន្ធគាត់មានកូន៦នាក់ក្នុងនោះស្រី៣នាក់ ពួកគេកំពុងទន្ទឹងរង់ចាំ មើលផ្លូវម្តាយរបស់ខ្លួន ក្រោយពេលបាត់ពីផ្ទះដោយគ្មានដំណឹងអស់រយៈពេលជិត១០ថ្ងៃមកហើយ ។គាត់និយាយថា ទោះបីជារូបគាត់ពិការដោយស្វិតជើងម្ខាងមែន តែគាត់ខិតខំធ្វើអ្វីៗគ្រប់បែប យ៉ាងដើម្បីបានកម្រៃមកចិញ្ចឹមប្រពន្ធកូន ។ គាត់ស្រឡាញ់ប្រពន្ធកូនណាស់ ហើយក៏មិនដែលមានទំនាស់ទាស់ទែងគ្នាធ្ងន់ធ្ងរដែរ ។ ដោយសារតែភាពស្រឡាញ់ថ្នាក់ថ្នមទើបប្រពន្ធរបស់គាត់នៅផ្ទះ មិនធ្វើអ្វីធ្ងន់ក្រៅពីតុបតែងខ្លួនមើលថែកូនឡើយ ។
បុរសរូបនេះរៀបរាប់ទៀតថា គាត់បានចេញពីផ្ទះទៅធ្វើជាកម្មករស៊ីឈ្នួលឲ្យក្រុមហ៊ុននៅខេត្ត មណ្ឌលគិរីមួយរយៈ ទើបមិនដឹងថាប្រពន្ធលួចមានទំនាក់ទំនងជាមួយមនុស្សប្រុសនៅក្នុងភូមិ តែរឿងនេះក៏មានអ្នកភូមិជាច្រើននាក់បានលួចប្រាប់គាត់ដែរ តែគាត់ហាក់មិនជឿនោះទេ ។ គាត់និយាយថា មុនថ្ងៃចូលឆ្នាំថ្មី គាត់និងប្រពន្ធបានកើតមានទំនាស់គ្នាតិចតួច ដោយសារតែប្រពន្ធដើរផឹកស៊ីក្នុងភូមិ ដោយផឹកដេកផ្លូវមិនចូលផ្ទះ ។ គាត់បន្តថា ក្រោយពីមានទំនាស់គ្នាមួយថ្ងៃ ក៏ត្រូវរ៉ូវគ្នាវិញ តែមួយថ្ងៃក្រោយមក ប្រពន្ធ គាត់ដែលគម្រោងផែនការច្បាស់បានគេចចេញពីផ្ទះបាត់ ធ្វើឲ្យរូបគាត់និងកូនៗដែលមិនដឹងរឿងមានការភ្ញាក់ផ្អើលយ៉ាងខ្លាំង ។
បុរសរូបនេះនិយាយថា គាត់និងកូនៗបានសម្រេចចិត្តកាន់រូបថតរបស់ប្រពន្ធនិងម្តាយជាច្រើនសន្លឹក ឆ្លងទូកដមកទីរួមខេត្តដើម្បីសួរគេឯងស្វែងរកប្រពន្ធ ។ គាត់ចង់ឲ្យប្រពន្ធវិលត្រឡប់មកផ្ទះ និងនិយាយគ្នាឲ្យបានច្បាស់លាស់មុននឹងធ្វើការលែងលះគ្នាឲ្យបានត្រឹមត្រូវ មិនមែនរត់តាមប្រុសឈ្មោលបែបនេះឡើយ ។
ចែករំលែកព័តមាននេះ