រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពកាច់សោកម៉ូតូ១គ្រឿងបានសម្រេច ហើយព្យាយាមជិះគេចខ្លួន ប៉ុន្តែបានត្រឹមចម្ងាយប្រមាណ៥០ម៉ែត្រប៉ុណ្ណោះត្រូវបានម្ចាស់ម៉ូតូក្រឡេកឃើញទាន់ ក៏ស្រែកឆោឡោថាចោរៗ បង្កឲ្យមានការភ្ញាក់ផ្អើលយ៉ាងខ្លាំង។ ខណៈនោះកម្លាំងនគរបាលប៉ុស្តិ៍កំបូលដែលកំពុងល្បាតនៅជិតនោះ រួមទាំងប្រជាពលរដ្ឋបានដេញតាម ដែលជាហេតុធ្វើឲ្យជនសង្ស័យមានការភិតភ័យក៏បានផ្តួលម៉ូតូចោលរួចរត់គេចខ្លួន ប៉ុន្តែរត់មិនរួចឡើយ ក៏ត្រូវចាប់ខ្លួនបានភ្លាមៗតែម្ដង។
ហេតុការណ៍ខាងលើនេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី២៤ ខែមេសា ឆ្នាំ២០១៩ នៅក្នុងបុរីពីភពថ្មីកំបូល ស្ថិតនៅក្នុងភូមិគល់ សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យខាងលើឈ្មោះ សៀន រុន ហៅភក្តី ភេទប្រុស អាយុ៣៣ឆ្នាំ ទើបចេញពីពន្ធនាគារថ្មីៗប៉ុណ្ណោះ មានទីលំនៅក្នុងភូមិមនោរម្យ ឃុំបែកចាន ស្រុកអង្គស្នួល ខេត្តកណ្តាល និងមានស្រុកកំណើតនៅក្នុងភូមិសាមគ្គី ឃុំស្វាយភ្លោះ ស្រុកពាមជរ ខេត្តព្រៃវែង ។
តាមប្រភពព័ត៌មាននៅមុនពេលកើតហេតុបានឲ្យដឹងថា មុនពេលកើតហេតុ ជនសង្ស័យបានធ្វើសកម្មភាពកាច់សោកម៉ូតូមួយគ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០០៥ ដែលម្ចាស់ចតទុកនៅកន្លែងកើតហេតុ ។ លុះធ្វើសកម្មភាពកាច់សោកម៉ូតូបានសម្រេចហើយក៏ជិះគេចខ្លួនបានចម្ងាយប្រហែល៥០ម៉ែត្រប៉ុណ្ណោះ ត្រូវបានម្ចាស់ម៉ូតូក្រឡេកឃើញទាន់ស្រែកឆោឡោថាចោរៗបង្កការភ្ញាក់ផ្អើល ហើយស្របពេលនោះកម្លាំងនគរបាលប៉ុស្តិ៍កំបូលកំពុងល្បាតជិតនោះក៏បានសហការជាមួយប្រជាពលរដ្ឋ និងម្ចាស់ម៉ូតូដេញតាមចាប់។
ប្រភពដដែលបានបន្តថា ពេលនោះបានធ្វើឲ្យជនសង្ស័យមានការភិតភ័យក៏បានផ្តួលម៉ូតូចោល រួចរត់គេចខ្លួន ប៉ុន្តែទោះបីជាព្យាយាមរត់យ៉ាងណាក៏ដោយក៏រត់មិនរួចដែរ ទីបំផុតត្រូវបាននគរបាលនិងប្រជាពលរដ្ឋចាប់បានភ្លាមៗ បន្ទាប់មកនគរបាលបាននាំជនសង្ស័យម្នាក់នេះទៅធ្វើការសាកសួរនៅប៉ុស្តិ៍ ។
ក្រោយមកទើបដឹងថាជនសង្ស័យគឺជាមុខសញ្ញាលួចយ៉ាងសកម្មម្នាក់ ហើយក៏ធ្លាប់ពន្ធនាគារផងដែរ និងទើបតែត្រូវបានដោះលែងកាលពីពេលថ្មីកន្លងទៅនេះប៉ុណ្ណោះ ប៉ុន្តែជននេះមិនរាងចាលសូម្បីតែបន្តិចសោះ ។ ពេលនេះបានធ្វើសកម្មភាពលួចកាច់សោកម៉ូតូខាងលើនេះទៀត ត្រូវជាប់អន្ទាក់និងបានចូលគុកជាថ្មីម្ដងទៀត៕
ចែករំលែកព័តមាននេះ