រាជធានីភ្នំពេញ ៖ ខណៈប្រមុខដឹកនាំរាជរដ្ឋាភិបាលបានបង្ហាញនូវសុទិដ្ឋិនិយមថា ការតភ្ជាប់ស្ពានមិត្តភាពកម្ពុជា-ថៃ (ស្ទឹងបត់-បានណងអៀន) ឬហៅថាច្រកអូរនាង នៅក្រុងប៉ោយប៉ែត ខេត្តបន្ទាយមានជ័យ ព្រំដែនកម្ពុជា-ថៃ នឹងជួយជំរុញកំណើនសេដ្ឋកិច្ច ការផ្លាស់ប្តូរពាណិជ្ជកម្ម និងវិនិយោគរវាងកម្ពុជា-ថៃ ក៏ដូចជាមួយបណ្តាប្រទេសនៃមហាអនុតំបន់មេគង្គនោះ វិស័យឯកជនរំពឹងថានឹងជួយជំរុញការបញ្ជូនទំនិញចេញក្រៅប្រទេសកាន់តែច្រើនថែមទៀត ជាពិសេសចំនេញដល់ពេលវេលា និងការចំណាយកក្រៅផ្លូវការ ។
ស្ពានមិត្តភាពកម្ពុជា-ថៃ (ស្ទឹងបត់-បានណងអៀន) មានទីតាំងឋិតនៅក្នុងភូមិសាស្ត្រ ក្រុងប៉ោយប៉ែត ខេត្តបន្ទាយមានជ័យ មានប្រវែងសរុប៦២០ម៉ែត្រ និងទទឹង១៧ម៉ែត្រ ក្រាលបេតុងកៅស៊ូ (AC) នៅផ្ទៃខាងលើស្ពាន ដោយក្នុងនោះរួមមាន៖ តួស្ពានប្រវែង១៣០ម៉ែត្រ នៅក្នុងទឹកដីកម្ពុជាប្រវែង៦៥ម៉ែត្រ នៅក្នុងទឹកដីថៃ ប្រវែង៦៥ម៉ែត្រ ។ ផ្លូវភ្ជាប់ក្បាលស្ពាន មានប្រវែង ៤៩០ម៉ែត្រ (១៥០ម៉ែត្រ ក្នុងទឹកដីកម្ពុជា៣៤០ម៉ែត្រក្នុងទឹកដីថៃ)។
បើតាមលោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា បានមានប្រសាសន៍តាមទូរសព្ទអោយដឹងថា ជាការពិតណាស់ ការបើកច្រកថ្មីដោយភ្ជាប់ស្ពានស្ទឹងបត់ និងតភ្ជាប់ផ្លូវរថភ្លើង ពីកម្ពុជាទៅថៃនោះ នឹងសម្រួលដល់ការងារដឹកជញ្ជូនច្រើនសម្រាប់វិស័យដឹកជញ្ជូនកម្ពុជាជាពិសេស សម្រួលដល់ការបញ្ចូនទំនិញចេញពីកម្ពុជាបានលឿនរហ័ស ដោយរំពឹងថាកម្ពុជា នឹងអាចនាំទំនិញចេញកាន់តែច្រើនថែមទៀត ។
ប្រធានសមាគមភ្នាក់ងារបញ្ជូនទំនិញកម្ពុជារូបនេះបន្ថែមទៀតថា « នៅពេលច្រកថ្មីនេះ បើកដំណើរ វានឹងលែងមានការកកស្ទះនៅច្រកចាស់ទៀតហើយ ដោយច្រកចាស់គេទុកសម្រាប់អ្នកដឹកដំណើរឆ្លងកាត់ដូចជាភ្ញៀវទេសចរ និងអ្នកឆ្លងដែនចេញចូលប្រទេសថៃ ជាដើម ហើយច្រកថ្មី ឆ្លងកាត់ស្ពាន សម្រាប់ដឹកជញ្ជូនទំនិញ ដូច្នេះ វានឹងកាន់តែលឿនសម្រាប់ដឹកទំនិញចេញចូល » ។
លោកបន្តថា ក្រៅពីការបញ្ជូនទំនិញទៅផ្ទាល់ទៅកាន់ប្រទេសថៃ ការបើកច្រកថ្មីនិងតភ្ជាប់ផ្លូវរថភ្លើងពីកម្ពុជាទៅកាន់ប្រទេសថៃ ក៏ជាច្រកថ្មីមួយសម្រាប់អោយអ្នកដឹកជញ្ជូនទំនិញ អាចបញ្ជូនទំនិញរបស់ខ្លួនទៅកាន់ប្រទេសទីបី ដោយឆ្លងកាត់ប្រទេសថៃ ដូចជាទៅប្រទេសម៉ាឡេស៊ី និងសឹង្ហបុរីជាដើម ពីព្រោះបច្ចុប្បន្ននេះការដឹកជញ្ជូនទំនិញ ពីកម្ពុជា ទៅកាន់ប្រទេសទាំងនោះ ភាគច្រើនធ្វើឡើងតាមកប៉ាល់ ដោយត្រូវចំណាយពេលយូរ ហើយបើចង់ឆាប់ត្រូវដឹកតាមផ្លូវអាកាស និងមានតម្លៃខ្ពស់ ។ លោកបន្តថា « នៅថ្ងៃអនាគត បើសិនជាមានការតភ្ជាប់ផ្លូវរថភ្លើងពីកម្ពុជាទៅកាន់ប្រទេសសឹង្ហបុរី ដូចគម្រោងមែននោះ ការដឹកជញ្ជូនទំនិញរបស់អ្នកដឹកជញ្ជូនយើងកាន់តែងាយស្រួល ហើយកម្ពុជានឹងអាចនាំទំនិញរបស់ខ្លួនចេញក្រៅ បានកាន់តែច្រើនថែមទៀត និងមិនមានហានិភ័យផងដែរ » ។
បច្ចុប្បន្ននេះ បញ្ហាសម្រាប់អ្នកដឹកជញ្ជូនទំនិញ មិនមែនតែបញ្ហាលើផ្លូវ និងហេដ្ឋារចនាសម្ព័ន្ធនោះទេ «តែជាការរត់ឯកសារផ្សេងផងដែរ ដូច្នេះ បើសិនជាមានតភ្ជាប់ហើយ វានឹងលែងមានការរត់ឯកសាររញ៉េរញ៉ៃច្រើនទៀតហើយ» ។ ប្រធានសមាគមភ្នាក់ងារបញ្ជូនជញ្ជូនទំនិញរូបនេះបានបន្ថែម ។
រដ្ឋមន្ត្រីក្រសួងសាធារណការនិងដឹកជញ្ជួន លោក ស៊ុន ចាន់ថុល បានថ្លែងគូសបញ្ជាក់កាលពីថ្ងៃទី ២២ ខែមេសា នាឱកាសតភ្ជាប់ ស្ពានជាមួយភាគីថៃថា «ការសាងសង់ហេដ្ឋា រចនាសម្ព័ន្ធ នៅច្រកទ្វារព្រំដែន អន្តរជាតិស្ទឹងបត់-បានណងអៀន នាពេលនេះ បានឆ្លុះបញ្ចាំងឱ្យឃើញនូវការយកចិត្តទុកដាក់ខ្ពស់របស់រាជរដ្ឋាភិបាលក្នុងការលើកកម្ពស់ប្រសិទ្ធភាពនៃការធ្វើដំណើរ និងប្រព័ន្ធភស្តុភារកម្ម ដែលនឹងជួយជំរុញកំណើនសេដ្ឋកិច្ច ការផ្លាស់ប្តូរពាណិជ្ជកម្ម និង វិនិយោគរវាងកម្ពុជា -ថៃ ក៏ដូចជាមួយបណ្តាប្រទេសនៃមហាអនុតំបន់មេគង្គផងដែរ» ។ លោករដ្ឋមន្ត្រី មានប្រសាសន៍បន្តទៀតថា ការបើកច្រកព្រំដែនត្រង់ចំណុចស្ទឹងបត់-បានណងអៀននេះ បានបង្កើនកាលានុវត្ត ភាពដល់កិច្ចសហប្រតិបត្តិការអន្តរជាតិ និងកាអភិវឌ្ឍសេដ្ឋកិច្ចជាតិ តាមរយៈការធ្វើពាណិជ្ជកម្មឆ្លងកាត់ ព្រំដែន ការបង្កើតការងារ និងការទាក់ទាញភ្ញៀវទេសចរណ៍ ក៏ដូចជាការសម្រេចឱ្យបាននូវចក្ខុវិស័យរបស់ អាស៊ានក្នុងការតភ្ជាប់ ប្រទេសនៅក្នុងតំបន់ អាស៊ានទាំងមូល (Asean Connectivity)។ ជាងនេះទៅទៀត ច្រកព្រំដែនថ្មីនេះនឹងដើរតួនាទីយ៉ាងសំខាន់ ដើម្បីជួយសម្រួលចរាចរណ៍ របស់ រថយន្តដឹកទំនិញឆ្លង កាត់រវាងកម្ពុជា និងថៃ និងជួយកាត់បន្ថយការកកស្ទះនៅច្រកព្រំដែនប៉ោយ ប៉ែតនាពេលបច្ចុប្បន្ន។
សូមរម្លឹកថា នៅព្រឹកថ្ងៃទី២២ មេសា ២០១៩ កម្ពុជា-ថៃ ក៏បានចុះកិច្ចព្រមព្រៀងប្រតិបត្តិការរួមគ្នាលើការដឹកជញ្ជូនតាមផ្លូវដែក ឆ្លងកាត់ព្រំដែនកម្ពុជា ថៃ ហើយថៃក៏បានប្រគល់ក្បាលរថភ្លើង ដល់កម្ពុជា ដើម្បីដំណើរ ការដឹកអ្នកដំណើរ និងទំនិញផងដែរ ។ កិច្ច ព្រមព្រៀងប្រតិបត្តិការរួមគ្នាលើការដឹកជញ្ជូនឆ្លងកាត់ព្រំដែនតាមផ្លូវដែក និងការតភ្ជាប់ផ្លូវដែកកម្ពុជា និងថៃ ពិតជានាំមកនូវកាលានុវត្តភាពថ្មី សម្រាប់វិស័យដឹកជញ្ជូនតាមផ្លូវដែក ដែលជាមធ្យាបាយដឹក ជញ្ជូនទំនិញដ៏ស័ក្តិសិទ្ធ មានតម្លៃថោក និងមានសុវត្ថិភាពខ្ពស់ រួមចំណែកក្នុងការអភិវឌ្ឍខឿន សេដ្ឋកិច្ចជាតិរបស់ប្រទេសទាំងពីរ និងរួមចំណែកក្នុងការតភ្ជាប់ និងអភិវឌ្ឍតំបន់អាស៊ាន និងមហាអនុ តំបន់មេគង្គផងដែរ ។
]គួរបញ្ជាក់ថា ទំហំពាណិជ្ជកកម្មរវាងកម្ពុជា និងថៃ កាលពីឆ្នាំ ២០១៨កន្លងទៅនេះសម្រេចបានប្រមាណ៧ពាន់លានដុល្លារអាមេរិក ក្នុងនោះថៃនាំចូលមកកម្ពុជា មានទឹកប្រាក់ប្រមាណជាង៦ពាន់លានដុល្លារអាមេរិក ហើយកម្ពុជានាំចេញទៅថៃវិញមានតែប្រមាណ១ពាន់លានដុល្លារប៉ុណ្ណោះ ។ ម្យ៉ាងទៀត កម្ពុជា និងថៃបានប្ដេជ្ញាថានឹងជំរុញទំនិញពាណិជ្ជកម្មរវាងគ្នាអោយបានប្រមាណ១៥ពាន់លានដុល្លារអាមេរិក នៅក្នុងឆ្នាំ ២០២០ខាងមុខ ដោយថៃនិងកម្ពុជា បានបន្តបើកច្រកថ្មីៗ ដើម្បីសម្រួលដល់ការនាំទំនិញចេញចូល ។
ថ្លែងនៅក្នុងពិធីបើកការដ្ឋានសាងសង់អគារច្រកទ្វារព្រំដែន អន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិ លេខ៥ សម្តេចអគ្គមហាសេនាបតីតេជោនាយករដ្ឋមន្ត្រី បានមានប្រសាសន៍ថា រាជរដ្ឋាភិបាលកម្ពុជា កំពុងប្រែក្លាយតំបន់តាមព្រំដែន ពិសេសអតីតតំបន់ប្រយុទ្ធគ្នាឱ្យក្លាយទៅជាតំបន់អភិវឌ្ឍន៍ ជាព្រំដែនសន្តិភាព សហប្រតិបត្តិការ និងការអភិវឌ្ឍ ពិសេសការសាងសង់បណ្តាញផ្លូវតភ្ជាប់ដើម្បីបង្កើនទំហំ ពាណិជ្ជកម្មរវាងប្រទេសជិតខាង បង្កើតការងារធ្វើ និងបង្កើនប្រាក់ចំណូលជូនប្រជាពលរដ្ឋផងដែរ ៕
ចែករំលែកព័តមាននេះ