ខេត្តកណ្តាល ៖ ប្រសិនបើគ្មានចំណាត់ការទប់ស្កាត់ ឬបង្ក្រាបអោយបានទាន់ពេលវេលាពីសំណាក់គណៈបញ្ជាការឯកភាពស្រុក-ខេត្តនោះទេ ដីបឹងសាធារណៈរបស់រដ្ឋ តំបន់អតីតឡូត៍នេសាទលេខ៦ រាប់ពាន់ហិកតាក្នុងដែនរដ្ឋបាលឃុំកំពង់ភ្នំ ស្រុកលើកដែក ខេត្តកណ្តាលនឹងត្រូវវិនាសហិនហោចធ្លាក់ទៅលើកណ្តាប់ដៃបុគ្គលឯកជនជាក់ជាមិនខានឡើយ។ ខណៈដែលបច្ចុប្បន្នកំពុងមានក្រុមឈ្មួញបានដាក់គ្រឿងចក្រជាច្រើនគ្រឿងទៅធ្វើសកម្មភាពឈូសឆាយទន្ទ្រានដុតបំផ្លាញព្រៃលិចទឹកជំរកត្រីពងកូនរំលោភបំពានវាទយកដីយ៉ាងអាណាធិបតេយ្យ។
ប្រភពព័ត៌មានបានលួចបង្ហើបអោយដឹងថា ឈ្មួញលួចឈូសឆាយបំផ្លិចបំផ្លាញធនធានធម្មជាតិព័ទ្ធយកដីបឹងសាធារណៈសម្បត្តិរបស់រដ្ឋតំបន់អតីតឡូត៍នេសាទលេខ៦នេះត្រូវបានគេស្គាល់ថាឈ្មោះកេត តុវីរៈ ជាអ្នកមើលការគ្រឿងចក្រនិងម្នាក់ទៀតជាមេឈ្មួញធំឈ្មោះចាន់ធី យូៗទើបគេចុះមកពិនិត្យមើលដីម្តងប៉ុណ្ណោះ។
ប្រភពព័ត៌មានបានបន្តថា ដីចំណុចអតីតឡូត៍នេសាទលេខ៦នេះខែទឹកឡើងមានផ្ទៃបឹងធម្មជាតិលាតសន្ធឹងធំល្វឹងល្វើយមើលដាច់កន្ទុយភ្នែក ដោយមានព្រំប្រទល់ជាប់នឹងបីស្រុកគឺស្រុកកៀនស្វាយ ស្រុកស្អាង និងស្រុកកោះធំ ដែលជាតំបន់មានសក្តានុពលសំបូរទៅដោយធនធានមច្ឆជាតិជីវៈចម្រុះគ្រប់ប្រភេទ ហើយក៍ជាតំបន់អភិរក្សសម្រាប់ការពារធនធានមច្ឆជាតិជីវៈចម្រុះគ្រប់ប្រភេទក្នុងការបង្កាត់ពូជផងដែរ។
ប្រភពព័ត៌មានបន្តទៀតថា ចាប់តាំងពីសម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានកាត់រំសាយឡូត៍ចោល ផ្ទៃបឹងនេះមានសារៈសំខាន់ណាស់សម្រាប់ប្រជាពលរដ្ឋទូទៅ ជាពិសេសពលរដ្ឋនៃស្រុកទាំងបួនខាងលើក្នុងការប្រកបមុខរបរនេសាទត្រីលក្ខណៈគ្រួសារដាក់មង ចងសន្ទូច ដាក់លប ដាក់លាន់។ល។គ្រាន់ចិញ្ចឹមជីវិត ស្រាប់តែឥឡូវបែរជាមានឈ្មួញអ្នកមានលុយ មានអំណាចដាក់គ្រឿងចក្រមកឈូសឆាយដុតបំផ្លាញព្រៃជំរកត្រីពងកូនព័ទ្ធយកដីសាធារណៈសម្បត្តិរដ្ឋមកធ្វើជាកម្មសិទ្ធិបុគ្គលឯកជនយ៉ាងគឃ្លើន និងបានសង់រោងព័ទ្ធជុំវិញដាក់កម្លាំងស្លៀកពាក់ស៊ីវិលយាមកាមយ៉ាងតឹងរឹងទាំងថ្ងៃទាំងយប់បែបនេះ ខ្លាចតែបន្តិចទៀតមិនចាំបាច់ថាចូលទៅរកនេសាទត្រីនោះទេ សូម្បីតែសត្វពាហនៈ ឬមនុស្សដើរឆ្លងកាត់ទៅរកអុស បេះត្រកួន ដកព្រលឹត ដកក្រអៅឈូកមិនបានផងមើលទៅ។ព័ត៌មានពិស្តារមានផ្សាយនៅកាសែតកោះសន្តិភាព ៕
ចែករំលែកព័តមាននេះ