រាជធានីភ្នំពេញ ៖ វិស័យធានារ៉ាប់រង ដែលជាវិស័យហិរញ្ញវត្ថុថ្មីមួយនៅកម្ពុជា រកបានចំណូលប្រមាណ២០០លានដុល្លារអាមេរិក ក្នុងឆ្នាំ២០១៨ កន្លងទៅ ខណៈពលរដ្ឋកាន់តែយល់ច្បាស់បន្តិចម្ដងៗពីសេវាកម្មធានារ៉ាប់រងជាពិសេសទៅលើទ្រព្យសម្បតិ្តនិងអាយុជីវិត ។ លោក…
រាជធានីភ្នំពេញ ៖ វិស័យធានារ៉ាប់រង ដែលជាវិស័យហិរញ្ញវត្ថុថ្មីមួយនៅកម្ពុជា រកបានចំណូលប្រមាណ២០០លានដុល្លារអាមេរិក ក្នុងឆ្នាំ២០១៨ កន្លងទៅ ខណៈពលរដ្ឋកាន់តែយល់ច្បាស់បន្តិចម្ដងៗពីសេវាកម្មធានារ៉ាប់រងជាពិសេសទៅលើទ្រព្យសម្បតិ្តនិងអាយុជីវិត ។
លោក យក់ ចំរើនឬទ្ធិ អគ្គនាយកក្រុមហ៊ុនធានារ៉ាប់រងហ្វតតេ បានមានប្រសាសន៍ថា សម្រាប់ប្រទេសកម្ពុជា វិស័យធានារ៉ាប់រងធ្លាប់មានប្រវត្តិយូរដែរមកហើយ តែត្រូវបានបាត់ទៅវិញ នៅសម័យសង្គ្រាម និងទើបតែកកើតឡើងវិញ នៅក្រោយសម័យសង្គ្រាម ដូច្នេះហើយទើបវិស័យនេះហាក់នៅក្មេងខ្ចី ដែលធ្វើអោយពលរដ្ឋកម្ពុជា មិនទាន់យល់ច្បាស់ពីសេវាកម្មនេះ ។ លោកបន្ថែមទៀតថា « វិស័យធានារ៉ាប់រងនៅកម្ពុជា ទើបតែមានប្រវត្តិខ្លី តែវិស័យនេះគេមើលឃើញថាមានការរីកចម្រើន ជាក់ស្ដែងក្នុងរយៈពេលប៉ុន្មានឆ្នាំកន្លងមកនេះ វិស័យធានារ៉ាប់រងនៅក្នុងប្រទេសកម្ពុជាយើងសម្រេចបានកំណើនប្រមាណ១៥ទៅ២០ភាគរយ តែមានឆ្នាំខ្លះបានឡើងដល់ ៣០ភាគរយឯណោះ » ។
លោកបន្តថាក្នុងឆ្នាំ ២០១៨ ទាំងមូលវិស័យធានារ៉ាប់រងរកបានចំណូលប្រមាណ១៩៦លានដុល្លារអាមេរិក ឬអាចនិយាយថាប្រហាក់ប្រហែល២០០លានដុល្លារអាមេរិក ។ ចំនួននេះបើយើងគិតមកលើតែប្រទេសកម្ពុជា យើងគិតថាវាមានទំហំធំ តែបើធៀបនឹងប្រទេសជិតខាង ឬ ប្រទេសក្នុងតំបន់អាស៊ាន ទំហំទឹកប្រាក់ប៉ុណ្ណេះ នៅមានទំហំតូចនៅឡើយ ។ ជាក់ស្ដែងនៅប្រទេសវៀតណាម វិស័យធានារ៉ាប់រងគេ អាចរកបានចំណូលប្រមាណ២ពាន់លានដុល្លារអាមេរិក ហើយបើនៅប្រទេសថៃវិញ វិស័យនេះរកចំណូលបានដល់ទៅជាង៤ពាន់លានដុល្លារអាមេរិកឯណោះ ហើយបើនៅប្រទេសសឹង្ហបុរីវិញមានទំហំដល់ជាង៨ពាន់លានដុល្លារ ម៉ាឡេស៊ី ប្រមាណ១៧ ឬ១៨ពាន់លានដុល្លារអាមេរិក ។លោកបន្តថា «ទោះបីជាកម្ពុជារកចំណូលបានត្រឹមតែ ២០០លានដុល្លារអាមេរិក ក្នុង វិស័យធានារ៉ាប់រងនេះក៏ដោយ តែកម្ពុជា បានងើបផុតពីប្រទេសបាតតារាង ក្នុងវិស័យធានារ៉ាប់រងមកជាប្រទេសលំដាប់ទី៦ ដោយកម្ពុជានៅលើប្រទេសឡាវ ព្រុយណេ មីយ៉ាន់ម៉ាផងដែរ » ។
លោកបន្តទៀតថា ក្នុងរយៈពេលចុងក្រោយនេះ បុព្វលាភរ៉ាប់រងមានកំណើនគួរអោយកត់សម្គាល់ ដោយដំបូងឡើងអតិថិជនដែលប្រើសេវាធានារ៉ាប់រងជាអតិថិជនលក្ខណៈ ក្រុមហ៊ុន រោងចក្រ និងអង្គការជាដើម ហើយ ភាគច្រើនជាជនបរទេស ។ ប៉ុន្តែពេលនេះវិស័យធានារ៉ាប់រង ចាប់ផ្ដើមមានអតិថិជនជាលក្ខណៈបុគ្គល ហើយពលរដ្ឋ ក្នុងស្រុកក៏បានយល់ដឹង និងទិញសេវាធានារ៉ាប់រងក៏ច្រើនដែរ ។ លោកបន្ថែមថា បច្ចុប្បន្ននេះ វិស័យធានារ៉ាប់រងក៏មានការប្រកួតប្រជែងដូចគ្នាទៅនឹងវិស័យហិរញ្ញវត្ថុផ្សេងៗដែរ ដូចជាការប្រកួតទៅលើសេវាកម្ម និងតម្លៃដែលអតិថិជនអាចទទួលបាន និងការប្រកួតប្រជែងទៅលើសំណងជាដើម ។ លោកថា៖ ធានារ៉ាប់រ៉ងគឺជាការទិញកិច្ចសន្យានិងមានក្រដាស ហើយបើសិនជាក្នុងអំឡុងពេលកិច្ចសន្យានោះ ភាគីអ្នកទិញមិនមានអ្វីកើតឡើង កិច្ចសន្យានោះ គ្រាន់តែជាក្រដាសធម្មតាប៉ុណ្ណោះ មិនមានតម្លៃអ្វីឡើយ ហើយបើសិនជាអំឡុងពេលកិច្ចសន្យាមានសុពលភាព តើកិច្ចសន្យាដែលបានព្រមព្រៀងនោះ យកមកអនុវត្តន៍បានសមស្របដែលឬអត់ នេះក៏ជាការប្រកួតប្រជែងធំមួយ » ។
លោកបញ្ជាក់ថាសម្រាប់បញ្ហាប្រឈម របស់វិស័យធានារ៉ាប់រងកម្ពុជា បច្ចុប្បន្ននេះ គឺកត្តាជីវភាពរបស់ពលរដ្ឋ និងប្រព័ន្ធច្បាប់ ។ លោកថា៖« ពលរដ្ឋអាចទិញធានារ៉ាប់រងសម្រាប់ប្រើប្រាស់លុះត្រាតែពួកគាត់មានទ្រព្យសម្បតិ្តច្រើននិងធំសម្រាប់ពួកគាត់ តែបើសិនជាពួកគាត់មិនទាន់មានទ្រព្យ តើពួកគាត់ទិញធានារ៉ាប់រងសម្រាប់ធានាអ្វី ។ ម្យ៉ាងទៀតប្រព័ន្ធច្បាប់ក៏ជាកត្តាសំខាន់មួយសម្រាប់ជំរុញអោយវិស័យធានារ៉ាប់រងនៅកម្ពុជា មានកំណើនឬអត់ដែរ ។ ជាក់ស្ដែងនៅពេលដែលមនុស្សមានបញ្ហាវិវាទអ្វីមួយ ជំហ៊ានដំបូងពួកគេគឺត្រូវរត់រកច្បាប់អោយជួយ ដូច្នេះហើយច្បាប់ត្រូវតែសុក្រឹត្យ និងមិនលម្អៀង ដើម្បីជួយដោះស្រាយវិវាទអ្វីមួយនោះ » ។
បើតាមមន្ត្រីជាន់ខ្ពស់នៃរាជរដ្ឋាភិបាលកម្ពុជា លោក ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ធ្លាប់បានលើកឡើងថា វិស័យធានារ៉ាប់រងត្រូវបានរាជរដ្ឋាភិបាលចាត់ទុកជាសរសរស្ដម្ភនៃវិស័យហិរញ្ញវត្ថុ ក្នុងយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ ២០១៦-២០២៥ ដែលក្នុងនោះ សកម្មភាពអាទិភាពចម្បងៗមួយចំនួនត្រូវបានដាក់ចេញយ៉ាងច្បាស់ ដូចជាការលើកកម្ពស់បរិស្ថាន បទបញ្ញត្តិ កាន់តែប្រសើរ ការពង្រឹងយន្តការគ្រប់គ្រង និងត្រួតពិនិត្យទីផ្សារឱ្យកាន់តែមាន ស្តង់ដារខ្ពស់ស្របតាមភាពចាំបាច់នៃការអភិវឌ្ឍទីផ្សារធានារ៉ាប់រងនៅកម្ពុជា ៕
ចែករំលែកព័តមាននេះ