រាជធានីភ្នំពេញ ៖ ព្រឹទ្ធសភាបានប្រកាសគាំទ្រចំពោះគោលនយោបាយធ្វើកំណែទម្រង់តាមបែបវិមជ្ឍការ និងវិសហមជ្ឍការរបស់រាជរដ្ឋាភិបាល ។ លោកម៉ម ប៊ុននាង សមាជិកព្រឹទ្ធសភា និងជាអ្នកនាំពាក្យបានឲ្យដឹងនៅថ្ងៃទី២៤ ខែមេសាថា សមាជិកព្រឹទ្ធ នៅតាមភូមិភាគបានចុះមូលដ្ឋានពិសេសនោះតាមឃុំសង្កាត់នានា ដោយបានរកឃើញបញ្ហាប្រឈមមួយចំនួន ។ ប៉ុន្តែរាជរដ្ឋាភិបាលបានរៀបចំផែនការយុទ្ធសាស្ត្រចតុកោណដំណាក់កាលទី៤ ជាស្នូល គឺផ្តោតលើកំណែទម្រង់ថ្នាក់ក្រោមជាតិដែលធ្វើឲ្យសមាជិកព្រឹទ្ធសភាគាំទ្រ ។
លោកបញ្ជាក់ថា«ថ្នាក់ក្រោមជាតិ គឺជាកំណែទម្រងស្រួចស្រាវ ពិសេសនោះការអនុវត្តវិមជ្ឍការ និងវិសហមជ្ឍការដូចជា ការរៀបចំឲ្យមានការិយាល័យច្រកចេញចូលតែមួយ ។ អីញ្ចឹងនៅតាមខេត្តស្រុកមួយចំនួន គឺមានការពេញចិត្តណាស់ពីប្រជាពលរដ្ឋ ហើយទទួលយកសេវា ហើយមិនអាចបង្កើតអំពើពុករលួយ» ។ អ្នកនាំពាក្យក៏បានលើកឡើងថា ការធ្វើកំណែទម្រង់របស់រាជរដ្ឋាភិបាលនេះត្រូវបានអង្គប្រជុំព្រឹទ្ធសភាគាំទ្រយ៉ាងពេញទំហឹង ក្នុងការឆ្លុះបញ្ចាំងពីសកម្មភាពជាក់ស្តែង ពិសេសនោះការចុះបេសកម្មរបស់សមាជិកព្រឹទ្ធសភា ទៅកាន់មូលដ្ឋាននានា ។
លោកបានបញ្ជាក់ថា «គណៈកម្មការព្រឹទ្ធសភាទាំងអស់សូមវាយតម្លៃខ្ពស់ចំពោះសមទ្ធិផលដែលសម្រេចបានដោយសកម្មដោយទទួលខុសត្រូវក្នុងស្មារតីទទួលសុខត្រូវខ្ពស់ ដើម្បីបន្ត អនុវត្តប្រទេសជាតិក្នុងគុណភាពមួយថ្មីដែលឈរលើកំណែទម្រង់គ្រប់វិស័យ » ។ អ្នកនាំពាក្យក៏បានលើកឡើងថា ក្នុងកំឡុងពេលចន្លោះសម័យប្រជុំព្រឹទ្ធសភា រយៈពេលបីខែនេះ ថ្នាក់ដឹកនាំគណៈកម្មាធិការអចិន្ដ្រៃយ៍គណៈកម្មការក្រុមភូមិភាគនានា និងសមាជិកសមាជិកាព្រឹទ្ធសភា បានរួមគ្នាខិតខំបំពេញភារកិច្ចរៀងៗខ្លួន ប្រកបដោយស្មារតីទទួលខុសត្រូវខ្ពស់ ហើយសម្រេចបានលទ្ធផលផ្លែផ្កាជាគុណប្រយោជន៍ដល់ជាតិ និងប្រជាពលរដ្ឋយើង។
សកម្មភាពលេចធ្លោ គឺការយកចិត្តទុកដាក់ធ្វើសកម្មភាពឆ្ពោះទៅកាន់មូលដ្ឋានតាមរយៈការរៀបចំវេទិកាកិច្ចពិគ្រោះយោបល់ការឈ្វេងយល់អំពីវឌ្ឍនភាពជាវិជ្ជមាន ក្រោយការរៀបចំវេទិការចុះសាកសួរសុខទុក្ខប្រជាពលរដ្ឋរងគ្រោះដោយគ្រោះរាំងស្ងួត និងនាំក្រុមគ្រូពេទ្យចុះពិនិត្យព្យាបាលជំងឺជូនប្រជាពលរដ្ឋ ព្រមទាំងការចូលរួមចំណែកដល់ការអភិវឌ្ឍលើគ្រប់វិស័យនៅថ្នាក់ក្រោមជាតិ ។ លោកក៏បានលើកឡើងថា គណៈកម្មការទាំង១០ដែលជាសេនាធិការរបស់ព្រឹទ្ធសភាបានចុះជួបពិភាក្សាការងារជាមួយក្រសួងស្ថាប័ន និងអាជ្ញាធរថ្នាក់ក្រោមជាតិ ដើម្បីឈ្វេងយល់វឌ្ឍនភាពការងារតាមវិស័យប្រមូលព័ត៌មានព្រមទាំងពង្រឹង កិច្ចសហប្រតិបត្តិការល្អជាមួយអាជ្ញាធរមានសមត្ថកិច្ចគ្រប់លំដាប់ថ្នាក់៕
ចែករំលែកព័តមាននេះ