រាជធានីភ្នំពេញ ៖ កាលពីរសៀលថ្ងៃទី២៣ ខែមេសា នគរបាលព្រហ្មទណ្ឌក្រសួងមហាផ្ទៃបានបញ្ជូនខ្លួនមន្ត្រី យោធាម្នាក់ឈ្មោះ សេង សុភគ៌ ជាអគ្គនាយកក្រុមហ៊ុនលក់ និងបង់រំលស់រថយន្តយីហោ «សេង ហួត» ទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ពាក់ព័ន្ធករណីឆបោកលើទឹកប្រាក់រាប់ម៉ឺនដុលា្លរ ក្រោមរូបភាពជួលរថយន្តពីអ្នកដទៃយកមកលក់ ឬបង់រំលស់តៗគ្នា ។
ជនសង្ស័យមានឈ្មោះ សេង សុភ៌គ ភេទប្រុស អាយុ៣៦ឆ្នាំ មុខរបរជាមន្ត្រីយោធា និងជាអគ្គនាយកក្រុមហ៊ុន សេង ហួត ទិញលក់ និងបង់រំលស់រថយន្ត ដែលមានទីតាំងស្ថិតនៅផ្ទះលេខ៧២ ក្រុម២ ផ្លូវបេតុង ភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
នគរបាលព្រហ្មទណ្ឌបានឲយដឹងថា ជនសង្ស័យត្រូវបានសមត្ថកិច្ចឃាត់ខ្លួនកាលពីថ្ងៃទី២១ ខែមេសា យកទៅសាកសួរនៅនាយកដ្ឋាននគរបាលព្រហ្មទណ្ឌ យោងតាមពាក្យបណ្តឹងរបស់ប្រជាពលរដ្ឋជាច្រើននាក់ ។
ក្រោយពីឃាត់ខ្លួនជនសង្ស័យរួចមក នារសៀលថ្ងៃទី២៣ ខែមេសា ប្រជាពលរដ្ឋជាម្ចាស់ពាក្យបណ្តឹងប្រមាណជិត១០០នាក់បានប្រមូលផ្តុំគ្នានៅក្រោមដើមពោធិ៍សួនច្បារវិមានឯករាជ្យ ដើម្បីយកញតិទៅដាក់ជូនសម្តេចនាយករដ្ឋមន្ត្រី ក្នុងគោលបំណងមិនឲ្យមានអ្នកអន្តរាគមន៍ចំពោះរឿងអគ្គនាយកក្រុមហ៊ុន សេង ហួត នេះ ។
បន្ទាប់ពីដើមបណ្តឹងប្រមូលគ្នាតវ៉ានោះ កាលពីរសៀលថ្ងៃទី២៣ ខែមេសា នគរបានព្រហ្មទណ្ឌក្រសួងបញ្ជូនអគ្គនាយកក្រុមហ៊ុននោះទៅសាលាដំបូងរាជធានីភ្នំពេញ ខណៈនេះក៏មានម្ចាស់បណ្តឹងជាច្រើននាក់ទៀតតាមសង្កេតការដល់ទីនោះ ហើយបើតាមក្រុមដើមបណ្តឹងបង្ហើបថា ថ្ងៃទី២៤ មេសា នឹងលើកគ្នាមកកាន់សាលាដំបូងទៀត ចៀសវាងវប្បធម៌អន្តរាគមន៍ដោះលែងអគ្គនាយកក្រុមហ៊ុនធ្វើនំអត់ម្សៅនោះ ។
តាមសម្តីម្ចាស់បណ្តឹងមួយក្រុមបង្ហើបឲ្យដឹងថា កន្លងមកឈ្មោះ សេង សុភ័គ បានលេងល្បិចប្រើស្នៀតឆបោកលុយពីប្រជាពលរដ្ឋជាអតិថិជនរាប់រយនាក់តាមរូបភាព ទិញ លក់ ជួល បង់រំលោះរថយន្តគ្រប់ប្រភេទ ធ្វើឱ្យម្នាក់ៗអស់ប្រាក់រាប់ពាន់រាប់ម៉ឺនដុល្លារអាមេរិក ដែលនោះជាប្រាក់កក់មុនក្នុងការបង់រំលោះរថយន្តទៅតាមស៊េរី ។
ក្រោយពីដឹងចាញ់បោកអគ្គនាយកក្រុមហ៊ុននោះហើយ ប្រជាពលរដ្ឋបានទៅតវ៉ាទាមទារយកលុយវិញ តែក្រុមហ៊ុនយកលេសដោះសារថាចាំថ្ងៃនេះ ចាំថ្ងៃនោះ ពីមួយថ្ងៃទៅមួយថ្ងៃ លុយក៏មិនឲ្យ រថយន្តក៏មិនបាន ដូច្នោះហើយបានជាប្រជាពលរដ្ឋរងគ្រោះប្រមាណជាង៥០នាក់លើកគ្នាទៅតវ៉ាដល់ក្រុមហ៊ុន ធ្វើឲ្យមានការភ្ញាក់ផ្អើល រហូតអគ្គនាយកក្រុមហ៊ុនរូបនេះបិទឃ្លាំងរត់គេចខ្លួនបាត់ ។
អ្នករងគ្រោះបានបន្តថា ក្នុងរូបភាពឆបោករបស់ក្រុមហ៊ុន សេង ហួត ដែលមានបុរសម្នាក់ ឈ្មោះ សេង សុភគ៌ ជាអគ្គនាយកក្រុមហ៊ុននេះ បានបោកប្រាស់ប្រជាពលរដ្ឋ ឲ្យបង់លុយ១ពាន់ទៅ៥ពាន់ដុល្លារអាមេរិកមុន តាមប្រភេទស៊េរីរថយន្តកក់ទុកដើម្បីរង់ចាំរថយន្តមកដល់ ដោយក្រុមហ៊ុនបានធ្វើលិខិតស្នាមហើយ តម្រូវជូនដំណឹងពេលក្រោយ ទីបំផុតក្រុមហ៊ុនបោក ៕
ចែករំលែកព័តមាននេះ