ប្រទេសមីយ៉ាន់ម៉ា ៖ តុលាការកំពូលមីយ៉ាន់ម៉ា កាលពីថ្ងៃទី២៣ មេសា បានបដិសេធការតវ៉ាទៅសាលាឧទ្ធរណ៍របស់អ្នកកាសែត២នាក់ ធ្វើការឲ្យរ៉យទ័រដោយអ្នកទាំង២ជាប់ឃុំឃាំងចាប់តាំងពីខែធ្នូឆ្នាំ២០១៧មក ពីបទបំពានច្បាប់ស្ដីពីការសម្ងាត់របស់រដ្ឋ។
ការកាត់ទោសដាក់គុក៧ឆ្នាំប្រឆាំងអ្នកទាំង២ នៅតែរក្សាទុកដដែល ហើយការតវ៉ាទៅសាលាឧទ្ធរណ៍ត្រូវបានបដិសេធ។ នេះជាការអះអាងរបស់ចៅក្រមនៃតុលាការកំពូល លោកSOE NAINGនៅមុខតុលាការមួយនៃទីក្រុងណៃពិដោ តែលោកពុំបានផ្ដល់ភាពលម្អិតជាងនេះឡើយ។
លោកWA LONEអាយុ៣៣ឆ្នាំនិងលោកKYAW SOE OO អាយុ២៩ឆ្នាំ បានជាប់ឃុំឃាំងជាង១៦ខែរួចហើយ។ អ្នកទាំង២ត្រូវចាប់ខ្លួនកាលពីខែធ្នូឆ្នាំ២០១៧ ខណៈពួកគេសើុបតាមដានលើការសម្លាប់រង្គាលជនជាតិរ៉ូហីុងយ៉ា១០នាក់ ក្នុងឱកាសនៃប្រតិបត្តិការមួយរបស់កងទ័ពនៅភាគខាងលិចប្រទេស។
កាលពីខែកញ្ញាកន្លងទៅ អ្នកទាំង២ត្រូវបានកាត់ទោសដាក់គុក៧ឆ្នាំ ដោយតុលាការជាន់ខ្ពស់មួយនៃទីក្រុងរ៉ង់ហ្គូន ពីបទបំពានច្បាប់ស្ដីពីការសម្ងាត់របស់រដ្ឋ៕
ចែករំលែកព័តមាននេះ