រាជធានីភ្នំពេញ៖ ជនសង្ស័យធ្វើសកម្មភាពឆក់យ៉ាងសកម្មចំនួន៤នាក់ក្នុងករណីផ្សេងៗគ្នា ត្រូវបានកម្លាំងនគរបាលខណ្ឌសែនសុខស្រាវជ្រាវឃាត់ខ្លួនជាបន្តបន្ទាប់កាលពីយប់ថ្ងៃទី២២ ខែមេសា ឆ្នាំ ២០១៩ បន្ទាប់ពីជនសង្ស័យ២នាក់បានធ្វើសកម្មភាពឆក់កាបូបបានសម្រេច ហើយជិះម៉ូតូទៅបុករ៉ឺម៉កម៉ូតូ។
ជនសង្ស័យដែលត្រូវឃាត់ខ្លួនទាំង៤នាក់ខាងលើរួមមាន ១-ឈ្មោះ សូត្រ លាងហេង ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ផ្លូវបេតុង ភូមិរោងចក្រ សង្កាត់គោកឃ្លាង ខណ្ឌសែនសុខ ២-ឈ្មោះហម ឆដា ភេទប្រុស អាយុ១៨ឆ្នាំ ៣-ឈ្មោះសុខ រតនះ ភេទប្រុស អាយុ១៧ឆ្នាំ និង៤-ឈ្មោះជា ណារាជ ភេទប្រុស អាយុ១៥ឆ្នាំ ។ បន្ទាប់ពីឃាត់ខ្លួន នគរបាលបានដកហូតម៉ូតូចំនួន ៣គ្រឿងដែលជិះធ្វើសកម្មភាពផងដែរ។
តាមប្រភពពីនគរបាលខណ្ឌសែនសុខបានអោយដឹងថា ជនសង្ស័យម្នាក់ត្រូវបានកម្លាំងនគរបាលប៉ុស្តិ៍ភ្នំពេញថ្មី ឃាត់ខ្លួនកាលពីវេលាម៉ោង៩និង៣០នាទីយប់ថ្ងៃទី២២ ខែមេសា បន្ទាប់ពីជនសង្ស័យ និងបក្ខពួកម្នាក់ទៀតបានជិះម៉ូតូមួយគ្រឿងម៉ាកនិច ពណ៌ស ស៊េរីឆ្នាំ២០១៧ ពាក់ស្លាកលេខ ភ្នំពេញ ១GE-២៩១២ ធ្វើសកម្មភាពឆក់កាបូបបានសម្រេចនៅចំណុចតាមផ្លូវ១០០៣ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ លុះពេលជនសង្ស័យជិះម៉ូតូគេចខ្លួន ក៍បានជួបគ្រោះថ្នាក់ចរាចរណ៍ ហើយត្រូវកម្លាំង នគរបាលដែលជិះល្បាតឃាត់ខ្លួនបានម្នាក់ដកហូតបានម៉ូតូនិងកាបូបរបស់ជនជនរងគ្រោះប្រគល់អោយម្ចាស់វិញ ។ ចំណែកជនសង្ស័យម្នាក់ទៀតបានរត់គេចខ្លួនបាត់។
តាមនគរបាលអោយដឹងថា នៅក្នុងកាបូបយួរដៃចំនួនមួយដែលក្រុមជនសង្ស័យធ្វើសកម្មភាពឆក់ ក្នុងកាបូបនោះមានលុយចំនួន២០.០០០រៀល និងទូរស័ព្ទដៃ១គ្រឿងត្រូវបានប្រគល់អោយម្ចាស់ឈ្មោះ សុខ ជាតា ភេទស្រី អាយុ២៥ឆ្នាំ មុខរបរចុងភៅ ស្នាក់នៅបន្ទប់ជួល ផ្លូវបេតុង ភូមិបាយ៉ាប សង្កាត់ភ្នំពេញថ្មី។
តាមនគរបាលខណ្ឌសែនសុខ បានអោយដឹងទៀតថា បន្ទាប់ពីជនសង្ស័យម្នាក់គេចខ្លួន នគរបាលក៍បានស្រាវជ្រាវតាមចាប់ខ្លួនផងដែរ ហើយនៅវេលាម៉ោងប្រមាណ១២យប់រំលងអធ្រាត្រឈានចូលថ្ងៃទី២៣ ខែមេសា ឃាត់ខ្លួនជនសង្ស័យចំនួន៣នាក់ដែលជាមុខសញ្ញាឆក់ក្នុងករណីផ្សេងទៀត នៅចំណុចផ្ទះសំណាក់មុន្នីពេជ្រក្នុងភូមិគោកឃ្លាង សង្កាត់គោកឃ្លាង។
តាមនគរបាលបានអោយដឹងទៀតថា ជនសង្ស័យ ជាមុខសញ្ញាឆក់យ៉ាងសកម្មដែលតែងតែធ្វើសកម្មភាពឆក់នៅក្នុងមូលដ្ឋានខណ្ឌសែនសុខ និងខណ្ឌទួលគោក ។ តាមចម្លើយសារភាពរបស់ជនសង្ស័យម្នាក់បានឱ្យដឹងថា ខ្លួនបានធ្វើសកម្មភាពឆក់ចំនួន៥លើក ចំណែកជនសង្ស័យចំនួន៣នាក់ផ្សេងទៀតបានឆ្លើយសារភាពថា កន្លងមកពួកខ្លួនធ្វើសកម្មភាពឆក់ជាច្រើនលើកមកហើយ ៕
ចែករំលែកព័តមាននេះ