ប្រទេសហ្វ៊ីលីពីន ៖ ការរញ្ជួយដីមួយមានកម្លាំង៦,១រីស្ទ័រ កើតមានកាលពីថ្ងៃទី២២ មេសា នៅកោះលូហ្សុងហ្វ៊ីលីពីន ជាកោះធំជាងគេបំផុតរបស់ប្រទេស បណ្ដាលឲ្យមនុស្សស្លាប់យ៉ាងតិច១១នាក់ហើយច្រើននាក់រងរបួស។ អាជ្ញាធរសង្ស័យថា ចំនួនជនរងគ្រោះអាចមានខ្ពស់ជាងនេះទៀត។…
ប្រទេសហ្វ៊ីលីពីន ៖ ការរញ្ជួយដីមួយមានកម្លាំង៦,១រីស្ទ័រ កើតមានកាលពីថ្ងៃទី២២ មេសា នៅកោះលូហ្សុងហ្វ៊ីលីពីន ជាកោះធំជាងគេបំផុតរបស់ប្រទេស បណ្ដាលឲ្យមនុស្សស្លាប់យ៉ាងតិច១១នាក់ហើយច្រើននាក់រងរបួស។ អាជ្ញាធរសង្ស័យថា ចំនួនជនរងគ្រោះអាចមានខ្ពស់ជាងនេះទៀត។
លោកស្រី LILIA PINEDA អភិបាលខេត្ត PAMPANGA ជាខេត្តរងការប៉ះពាល់ខ្លាំងជាងគេ គូសបញ្ជាក់ថា មនុស្សច្រើនសិបនាក់អាចជាប់ក្រោមគំនរបាក់បែក នៃអគារកម្ពស់៤ជាន់មួយដែលរលំបាក់។ ពួកអ្នកជួយសង្គ្រោះ ជាមួយការប្រើឧបករណ៍នានាបានខិតខំ ដើម្បីកាយរកពួកគេ។ មជ្ឈមណ្ឌលភូគ្ភសាស្ត្រអាមេរិក USGS រាយការណ៍ថា ចំណុចកណ្ដាលនៃការរញ្ជួយដីនោះ ដែលមានកម្លាំង៦,១រីស្ទ័រ ស្ថិតនៅចម្ងាយ៦០គីឡូម៉ែត្រភាគពាយ័ព្យរដ្ឋធានីម៉ានីល ហើយមានជម្រៅប្រមាណជា៤០គីឡូម៉ែត្រ។ វាកើតមាននាវេលាម៉ោង១៧ម៉ោងក្នុងស្រុក។
ការរញ្ជួយដីនេះញ័ររង្គើដល់ក្រុងម៉ានីលដែលនៅទីនោះអគារជាច្រើនបានជម្លៀសមនុស្សចេញ។ វាបានបង្កឲ្យមានការរាំងស្ទះដល់ការដឹកជញ្ជូនតាមអាកាស តាមផ្លូវដែកនិងផ្លូវថ្នល់។ បណ្ដាញអគ្គិសនីមួយចំនួនមិនអាចប្រើបាន។
កម្លាំងនៃការរញ្ជួយដីនោះពីដំបូងកំណត់ឃើញថា មាន៦,៣រីស្ទ័រ តែក្រោយមក USGS កំណត់ត្រឹម៦,១រីស្ទ័រ។ វាបណ្ដាលឲ្យមានការភ័យជ្រួលច្របល់ក្នុងចំណោមប្រជាជនដែលប្រញាប់ប្រញាល់រត់ មកកាន់តាមដងវិថី។ អគារខ្ពស់នានាញ័ររង្គើមើលទៅគួរឲ្យខ្លាច។
រីឯការរញ្ជួយដីខ្លាំងមួយទៀត គឺត្រូវបានវិទ្យាស្ថានភូគ្ភសាស្ត្រអាមេរិក USGS រាយការណ៍នាថ្ងៃទី២៣ មេសាថា ការរញ្ជួយដីខ្លាំង១ទៀតមានកម្លាំងដល់ទៅ៦,៣រីស្ទ័រ កើតមានកាលពីថ្ងៃទី២៣មេសានៅកោះSAMAR ជាកោះធំទី៣របស់ហ្វ៊ីលីពីន មានប្រជាជនជាង១លាននាក់។
ការរញ្ជួយដីនោះដែលដំំបូងថាមានកម្លាំង៦,៦រីស្ទ័រ កើតមានបន្ទាប់ពីការរញ្ជួយដីកាលពីថ្ងៃទី២២មេសានៅភាគកណ្ដាលប្រទេស។ ការរញ្ជួយដីថ្មីនោះកើតមាននាវេលាម៉ោង៥និង៣៧នាទីម៉ោងក្នុងស្រុក នៅកន្លែងមួយចម្ងាយ៣៧គីឡូម៉ែត្រភាគឦសាន ទីក្រុងCATBALOGANដែលមានប្រជាជនជាង៩៤.០០០នាក់។ ចំណុចកណ្ដាលរបស់វាស្ថិតនៅក្នុងជម្រៅ៨៦គីឡូម៉ែត្រ៕
ចែករំលែកព័តមាននេះ