ប្រទេសវៀតណាម៖ ភ្នាក់ងារសារព័ត៌មាន Viet Nam News បានឲ្យដឹងកាលពីថ្ងៃទី២២ មេសា កន្លងមកថា ប្រទេសវៀតណាមត្រូវតែផ្តោតសំខាន់លើការបង្រួបបង្រួមមូលដ្ឋានសេដ្ឋកិច្ចម៉ាក្រូ និងកែទម្រង់ស្ថាបន័ដើម្បីបង្កើនភាពរឹងមាំ…
ប្រទេសវៀតណាម៖ ភ្នាក់ងារសារព័ត៌មាន Viet Nam News បានឲ្យដឹងកាលពីថ្ងៃទី២២ មេសា កន្លងមកថា ប្រទេសវៀតណាមត្រូវតែផ្តោតសំខាន់លើការបង្រួបបង្រួមមូលដ្ឋានសេដ្ឋកិច្ចម៉ាក្រូ និងកែទម្រង់ស្ថាបន័ដើម្បីបង្កើនភាពរឹងមាំ ខណៈដែលកំពុងមានភាពមិនប្រាកដប្រជាជុំវិញពិភពលោក។
លោក Nguyen Dinh Cung ដែលជាប្រធានវិទ្យាស្ថានកណ្តាលសម្រាប់ការគ្រប់គ្រងសេដ្ឋកិច្ច(CIEM) បានឲ្យដឹងថា «កំណែទម្រង់បន្ថែមគឺពិតជាសំខាន់ណាស់ក្នុងការជំរុញដល់ការលូតលាស់សេដ្ឋកិច្ច និងបង្កើនគុណភាពការលូតលាស់»។
លោកបានលើកឡើងថា ប្រទេសវៀតណាមមានឧបសគ្គជាច្រើន ហើយការអភិវឌ្ឍន៍សេដ្ឋកិច្ចក្នុងត្រីមាសទី ១នាឆ្នាំនេះមិនមើលឃើញមានការល្អប្រសើរឡើងខ្លាំងឡើយ ។ លោកបានបន្តថា ការលើកស្ទួយការបង្កើតថ្មីគឺពិតជាសំខាន់ណាស់ ហើយការបង្កើតថ្មីគួរតែត្រូវបានចាត់ទុកជាធនធានដ៏សំខាន់សម្រាប់ការលូតលាស់។
យោងទៅតាម CIEM បានឲ្យដឹងថា ប្រទេសវៀតណាមត្រូវតែដោះស្រាយឧបសគ្គជាច្រើន ភាគច្រើនទាក់ទិននឹងមូលដ្ឋានសេដ្ឋកិច្ចម៉ាក្រូ ជាពិសេសរួមមានភាពយឺតយ៉ាវក្នុងការចេញឯកសារផ្លូវច្បាប់ដើម្បីដោះស្រាយនឹងការផ្លាស់ប្តូរជុំវិញពិភពលោកជាដើម ។ ឧទាហរណ៍ដូចជាប្រទេសវៀតណាមមានភាពយឺតយ៉ាវក្នុងការកែទម្រង់វិធានការ និងចេញសេចក្តីនណែនាំដើម្បីអនុម័តកិច្ចព្រមព្រៀង CPTPP ។
យោងទៅតាមលោក Nguyen Anh Duong ដែលជាប្រធាននាយកដ្ឋានស្រាវជ្រាវទូទៅនៃ CIEM បានឲ្យដឹងដែរថា សេដ្ឋកិច្ចវៀតណាមជួបប្រទះនឹងបញ្ហាជាច្រើនដែលបង្កឡើងពីការអន់ថយនៃសេដ្ឋកិច្ចសហរដ្ឋអាមេរិក ភាពតានតឹងពាណិជ្ជកម្មរវាងសហរដ្ឋអាមេរិកនិងប្រទេសធំៗដទៃ និងភាពយឺតយ៉ាវក្នុងការចេញគោលនយោបាយដូចជាការអនុម័ត CPTPP និងគោលនយោបាយឧស្សាហកម្ម 4.០ ជាដើម ៕
ចែករំលែកព័តមាននេះ