ប្រទេសកូរ៉េខាងជើង-រុស្ស៊ី ៖ ទីភ្នាក់ងារព័ត៌មានផ្លូវការកូរ៉េខាងជើង KCNA រាយការណ៍កាលពីថ្ងៃទី២៣មេសាថា មេដឹកនាំកូរ៉េខាងជើងលោកគីមជុងអ៊ុន នឹងមកកាន់ប្រទេសរុស្ស៊ីនាពេលខាងមុខនេះ ដើម្បីជួបពិភាក្សាជាមួយប្រធានាធិបតីរុស្ស៊ី លោកវ្ល៉ឌីមៀរពូទីន។
KCNA បន្តថា លោកគីម ជុងអ៊ុន នឹងមកបំពេញទស្សនកិច្ចនៅរុស្ស៊ី នាសប្ដាហ៍នេះតាមការអញ្ជើញរបស់លោកប្រធានាធិបតីពូទីន។ នឹងមានការពិភាក្សាគ្នានានា ក្នុងឱកាសនៃទស្សនកិច្ចនេះ។ កាលពីសប្ដាហ៍មុនវិមានក្រឹមឡាំងធ្លាប់គូសបញ្ជាក់ថា មេដឹកនាំទាំង២នឹងជួបគ្នានៅរុស្ស៊ី នាពាក់កណ្ដាលទី២នៃខែមេសា តែពុំផ្ដល់ភាពលម្អិតជាងនេះឡើយ។ ការជួបគ្នាត្រូវធ្វើនៅក្រុងកំពង់ផែវ្ល៉ាឌីវ៉ូស្តុកនាភាគខាងកើតរុស្ស៊ី ប្រហែលជានាថ្ងៃទី២៤ឬ២៦មេសា។
នោះនឹងជាការជួបគ្នាកំពូលលើកដំបូងរវាងមេដឹកនាំទាំង២ ចាប់តាំងពីលោកគីមជុងអុីលបិតាលោកគីមជុងអ៊ុន មកជួបជាមួយលោកឌីមីទ្រីម៉េដវេដេវកាលពី៨ឆ្នាំមុនមក។ រុស្ស៊ីថែរក្សាទំនាក់ទំនងមិត្តភាពជាមួយក្រុងព្យុងយ៉ាង ហើយផ្ដល់ជំនួយស្បៀងមួយចំនួន។ លោកពូទីនចាប់តាំងពីយូរមកហើយ បានសម្ដែងពីចេតនាជួបជាមួយលោកគីមជុងអ៊ុន។
ការជួបគ្នារបស់មេដឹកនាំទាំង២កើតមានមិនដល់២ខែផង ក្រោយការជួបគ្នាកំពូលលើកទី២ រវាងលោកគីមជុងអ៊ុននិងប្រធានាធិបតីអាមេរិក លោកដូណាល់ត្រាំនៅក្រុងហាណូយប្រទេសវៀតណាម ដែលបានបញ្ចប់ដោយពុំសម្រេចបាន កិច្ចព្រមព្រៀងមួយស្ដីពីការរំសាយនុយក្លេអ៊ែរកូរ៉េខាងជើងឡើយ។
លោកគីមជុងអ៊ុនធ្លាប់ជួបជាមួយប្រធានាធិបតីចិន លោកស៊ីជីនពីង៤លើករួចមកហើយអំឡុងពេលតែ១ឆ្នាំ ប៉ុន្តែបច្ចុប្បន្នលោកចង់ស្វែងរកការគាំទ្រ របស់អន្តរជាតិកាន់តែទូលំទូលាយថែមទៀត ចំពោះជំហររបស់លោកជាមួយក្រុងវ៉ាស៊ិនតោន។
រុស្ស៊ីបានស្នើរួចហើយឲ្យលុបចោលទណ្ឌកម្មអន្តរជាតិប្រឆាំងកូរ៉េខាងជើង ចំណែកសហរដ្ឋអាមេរិកវិញចោទរុស្ស៊ីថា ជួយក្រុងព្យុងយ៉ាងដោយរំលោភបំពានការដាក់ទណ្ឌកម្ម តែក្រុងមូស្គូបានបដិសេធ៕
ចែករំលែកព័តមាននេះ