រដ្ឋធានី​វ៉ា​ស៊ី​ន​តោន ៖ ភ្នាក់ងារ​សារព័ត៌មាន Channel News Asia បាន​ឲ្យ​ដឹង​កាលពី​ថ្ងៃ​ទី​២០ មេ​សា កន្លង​មក​ថា រដ្ឋបាល​អាកាសចរណ៍​សហព័ន្ធ​អា​មេ​រិ​ក (FAA) បាន​និយាយ​ថា ការ​ត្រួតពិនិត្យ​រួម​រដ្ឋាភិបាល​នៃ​យន្តហោះ Boeing 737 MAX នឹង​ចាប់ផ្តើម​នៅ​ថ្ងៃ​ទី​២៩ មេ​សា ហើយនឹង​មានការ​ចូលរួម​ពី​អាជ្ញាធរ​អាកាសចរណ៍​ចំនួន​៩​ថែម​ទៀត​ដែល​មក​ពី​ជុំវិញ​ពិភពលោក ។

FAA បាន​និយាយ​កាលពី​ដើមខែ​នេះ​ផង​ដែរ​ថា​ពួក​គេ​កំពុង​តែ​បង្កើត​ក្រុម​អន្តរជាតិ​មួយ​ដើម្បី​ត្រួតពិនិត្យ​សុវត្ថិភាព​របស់​យន្តហោះ​នេះ​ដែល​ត្រូវ​បាន​ផ្អាក​មិន​ឲ្យ​ហោះហើរ​ជុំវិញ​ពិភពលោក​បន្ទាប់​ពី​មានការ​ធ្លាក់​យន្តហោះ​ជាប់​ៗ​គ្នា​ពីរ​ករណី​ក្នុង​ប្រទេស​ឥណ្ឌូ​នេ​ស៊ី​កាលពី​ខែតុលា និង​អ៊ី​តូ​ភី​កាលពី​ខែ​មុន​កន្លង​មក​។

Boeing បាន​ប្រកាស​ពី​គម្រោង​ធ្វើការ Update កម្មវិធី Software មួយ​សម្រាប់​យន្តហោះ 737 MAX ប៉ុន្តែ​ពួក​គេ​មិន​ទាន់​បាន​ផ្ញើ​ការ Update នេះ​ទៅ​កាន់ FAA ដើម្បី​ទទួល​បានការ​អនុញ្ញាត​ផ្លូវការ​ទេ​។

ជាមួយ​គ្នា​នេះ​ផង​ដែរ FAA បាន​ឲ្យ​ដឹង​ដែរ​ថា ប្រទេស​ចិន ភ្នាក់ងារ​សុវត្ថិភាព​អាកាសចរណ៍​អ៊ឺ​រ៉ុ​ប កា​ណា​ដា ប្រេ​ស៊ី​ល អូស្ត្រាលី ជប៉ុន ឥណ្ឌូ​នេ​ស៊ី សិង្ហ​បុរី​និង​អេ​មី​រ៉ាត​អា​រ៉ាប់​រួម​នឹង​ចូលរួម​ជា​អា​ជា្ញ​ធរ​ត្រួតពិនិត្យ​បច្ចេកទេស​រួម (JATR) ដែល​ត្រូវ​បាន​គិត​ថា​នឹង​កើត​មាន​ឡើង​ប្រមាណ​៩០​ថ្ងៃ​។

JATR ត្រូវ​បាន​ដឹកនាំ​ដោយ​លោក Chris Hart ដែល​ជា​អតីត​ប្រធាន​គណៈកម្មាធិការ​សុវត្ថិភាព​ដឹក​ជញ្ជូន​ជាតិ​។ ក្រុម​នេះ​នឹង​ធ្វើការ​ត្រួតពិនិត្យ​ការ​ផ្តល់​ប័ណ្ណ​អនុញ្ញាត​ឲ្យ​មានការ​ប្រើប្រាស់​ប្រពន្ធ​គ្រប់គ្រង​ការ​ហោះហើរ​ស្វ័យប្រវត្តិ​របស់​យន្តហោះ​នេះ​។

លោក Chris បាន​ប្រាប់​ដល់​សារព័ត៌មាន​កាលពី​ដើមខែ​នេះ​ថា ការ​ត្រួតពិនិត្យ​គឺជា​ការ​ឆ្លើយ​តប​នឹង​កំណើន​តម្រូវការ​នៃ​ការ​ធ្វើ​សកលភាវូបនីយកម្ម ព្រោះ​យន្តហោះ​ទាំងនេះ​មាន​គ្រប់​ទីកន្លែង និង​តម្រូវការ​ការ​ឆ្លើយ​តប​រួម​មួយ​ផង​ដែរ​។

លោក Dennis Muilenburg ដែល​ជានា​យក​ប្រតិបត្តិ​របស់ Boeing បាន​និយាយ​កាលពី​ថ្ងៃ​ពុធ​កន្លង​មក​ថា ក្រុមហ៊ុន​កំពុង​តែ​ដើរទៅ​មុខ​យ៉ាង​រលូន​ក្នុង​ការ​ទទួល​បានការ​អនុញ្ញាត​សម្រាប់​ការ Update កម្មវិធី Software របស់​យន្តហោះ Boeing 737 MAX និង​បាន​ធ្វើការ​សាកល្បង​ហោះហើរ​ចុង​ក្រោយ​ផង​ដែរ​។