ប្រទេសបារាំង ៖ ក្រោយការពិនិត្យបណ្ដាទិន្នន័យពីការឆេះ CATHEDRALE NOTRE-DAME DE PARIS ជាទីតាំងបូរាណបំផុតមួយរបស់បារាំង ពួកអ្នកស៊ើបអង្កេតសម្រាប់ពេលនេះផ្ដោតលើការទុស្សេចរន្តអគ្គិសនី ចំណែកការសង្ស័យពីការលួចដុតត្រូវបានបដិសេធ។…
ប្រទេសបារាំង ៖ ក្រោយការពិនិត្យបណ្ដាទិន្នន័យពីការឆេះ CATHEDRALE NOTRE-DAME DE PARIS ជាទីតាំងបូរាណបំផុតមួយរបស់បារាំង ពួកអ្នកស៊ើបអង្កេតសម្រាប់ពេលនេះផ្ដោតលើការទុស្សេចរន្តអគ្គិសនី ចំណែកការសង្ស័យពីការលួចដុតត្រូវបានបដិសេធ។ នេះជាការគូសបញ្ជាក់កាលពីថ្ងៃទី២១មេសា របស់កាសែតបារាំងLE JOURNAL DE DIMANCHE។
ការស៊ើបអង្កេតរកមូលហេតុនៃការឆេះអស់មួយផ្នែកធំ នៃCATHEDRALE NOTRE-DAME DE PARIS បានបដិសេធការលួចដុត។ ក្រោយស្ដាប់ការរ៉ាយរ៉ាប់របស់បណ្ដាកម្មករ ភ្នាក់ងារសន្តិសុខ ស្ថាបត្យករនិងសាក្សីទាំងឡាយ ប៉ូលិសនាពេលនេះផ្ដោតលើការទូស្សេចរន្តអគ្គិសនី។ គេកត់សម្គាល់ថាពុំមានការងារផ្សារដែកណាមួយ ត្រូវបានធ្វើនាថ្ងៃនោះឡើយ និងថាកម្មករបានចាកចេញអស់ពីទីតាំងនោះមុនម៉ោង១៨ម៉ោងក្នុងស្រុក។
ជាជំនួយដល់ការស្រាវជ្រាវ វីដេអូជាច្រើនត្រូវបានប្រើ ក្នុងនោះមានវីដេអូនៃកាមេរ៉ាត្រួតពិនិត្យ ព្រមទាំងវីដេអូនៃកាមេរ៉ាដែលដាក់នៅលើព្រួញ។
ក្រោយការវិភាគទិន្នន័យទាំងនេះ និងបណ្ដារូបភាពដែលទទួលបានពីបណ្ដាដ្រូន ចាប់តាំងពីថ្ងៃទី១៥មេសា ជាថ្ងៃមានភ្លើងឆេះទីតាំងនោះ ពួកអ្នកសើុបអង្កេតទីបំផុតនឹងទៅពិនិត្យទីតាំងផ្ទាល់ ចាប់ពីសប្ដាហ៍ខាងមុខនេះទៅ។ ពួកគេគិតថា ការស្រាវជ្រាវសំដៅកំណត់មូលហេតុនៃភ្លើងឆាបឆេះទីទាំងបូរាណនោះ នឹងអាចប្រើពេលច្រើនខែ។ មានមនុស្សច្រើនក្រុមចូលរួមក្នុងការស្រាវជ្រាវនោះ។
ភ្លើងបានឆាបឆេះCATHEDRALE NOTRE-DAME DE PARISកាលពីថ្ងៃទី១៥មេសា។ យោងតាមពួកអ្នកពន្លត់ភ្លើងថាភ្លើងឆេះអាចទាក់ទិននឹងការងារជួសជុលវិមានប្រវត្តិសាស្ត្រដែលល្បីល្បាញនៅអឺរ៉ុបនោះ។ ប្រធានាធិបតីបារាំង លោកEMMANUEL MACRONប្រកាសកាលពីថ្ងៃទី១៦មេសាថា លោកចង់ឲ្យCATHEDRALE នោះអាចកសាងជាថ្មីរយៈពេល៥ឆ្នាំ។ មានការរៃអង្គាសប្រាក់គ្នាសម្រាប់ការកសាងវិមាននោះឡើងវិញ៕
ចែករំលែកព័តមាននេះ