ក្រុម​ពលរដ្ឋ​បិទផ្លូវ​តវ៉ា​ប្រឆាំង​សមត្ថកិច្ច


ខេត្ត​ព្រះ​សីហ​នុ ៖ ពលរដ្ឋ​ចំនួន​៨​នាក់​ដែលសមត្ថកិច្ច​ឃាត់ខ្លួន​ពី​បទ​ប្រើប្រាស់​អំពើ​ហិង្សា​លើ​សមត្ថកិច្ច​បណ្ដាល​ឲ្យ​រង​របួស និង​ធ្វើ​សកម្មភាពបិទផ្លូវ​ជាតិ​លេខ​៤​នៅ​ស្រុក​ព្រៃ​នប់​ កាលពីព្រឹក​ថ្ងៃ​ទី​១៩ ខែមេសា​កន្លង​ទៅ បាន​ត្រូវ​នគរបាល​ខេត្ត​បញ្ជូន​ទៅ​កាន់​សាលាដំបូង ដើម្បី​ចាត់ការ​តាម​ផ្លូវច្បាប់​ ហើយ​គ្មាន​ការ​លើកលែង​ទេ ។

ស្នងការ​នគរបាល​ខេត្ត លោក​ឧត្តមសេនីយ៍ទោ ជួន ណា​រិ​ន្ទ បាន​ប្រាប់​ឲ្យ​ដឹង​ថា ពលរដ្ឋ​ទាំង​៨​នាក់​ដែល​ត្រូវ​បាន​ឃាត់ខ្លួន​ជា​បន្ដបន្ទាប់​រយៈពេល​២​ថ្ងៃ​នោះ ត្រូវ​បាន​បញ្ជូន​ទៅ​សាលាដំបូង​នា​រសៀល​ថ្ងៃ​ទី​២០ ខែមេសា និង​កំពុង​ស្ថិត​ក្រោម​ការ​សាកសួរ​ពី​សំណាក់​ព្រះរាជអាជ្ញា​តាម​នីតិវិធី មុន​ពេល​បញ្ជូន​ទៅ​ចៅក្រម​សុ​ើ​ប​សួរ ។

សូម​រំឭក​ថា បាតុភាព​ហិង្សា​ថ្មី​ទៀត​បាន​ផ្ទុះឡើង ខណៈ​ដំបៅ​ចាស់​នៅ​មិន​ទាន់​ជា​សះស្បើយនៅឡើយ ពី​រឿង​អនុវត្ត​សាលដីកា​តុលាការ​កំពូ​ល ដោយ​ការ​រុះរើ​ផ្ទះសម្បែង និង​បណ្តេញ​ពលរដ្ឋ​ដែល​នាំ​គ្នា​ទៅ​រស់នៅ​លើ​ដី​ទំនាស់​ដែល​អាជ្ញាធរ​នៅ​តែ​ប្រកាន់​ជំហរ​បណ្តេញ​ពលរដ្ឋ​ឲ្យ​ចាកចេញ ដោយ​សំអាង​ថា​ជា​ដី​កម្មសិទ្ធិ​ស្រប​ច្បាប់របស់​គេ ។

ការ​ផ្ទុះ​ហិង្សា​នេះ តាម​អាជ្ញាធរ​ថា មន្ត្រី​នគរបាល​ចំនួន​៤​រូប និង​ប្រជា​ការពារ​២រូប បាន​រង​របួស​ដែល​ខ្លះ​បែកក្បាល និង​រថយន្តចំនួន​៣​គ្រឿង​បាន​ខូចខាត ដោយសារ​ប្រជាពលរដ្ឋ​ដែល​អាជ្ញា​ធរ​ចាត់​ទុក​ថា​ជា​ក្រុម​អ​នា​ធិ​បតេ​យ្យ​បាន​គប់​ដុំ​ថ្ម និង​ប្រើ​អំពើ​ហិង្សា ពេល​នាំ​គ្នា​បិទផ្លូវ​ជាតិ​លេខ​៤ ក្នុង​ឃុំ​បិត​ត្រាំ​ង ស្រុក​ព្រៃ​នប់ កាលពី​ព្រឹក​ថ្ងៃ​ទី​១៩ ខែមេសា ។

លោកស្នងការ ជួន ណា​រិ​ន្ទ ឲ្យ​ដឹង​ថា នា​ព្រឹក​ថ្ងៃ​ទី​១៩ ខែមេសា កម្លាំង​នគរបាល​បាន​ឃាត់ខ្លួន​មនុស្ស​៦​នាក់ ដែល​បាន​ដឹកនាំ​និង​ចូលរួម​ប្រើ​ហិង្សា​ទៅ​លើ​មន្ដ្រី​នគរបាល និង​ប្រជា​ការពារ នៅ​ពេល​ដែល​កងកម្លាំង​សមត្ថ​កិច្ច​ទៅ​អន្ដរាគម​ន៍​ឲ្យ​បើកផ្លូវ​ឡើង​វិញ ក្រោយ​ពី​ពួក​គេ​យក​ដុំ​ថ្ម​និង​ដើមឈើ​ទៅ​ដាក់​បិទផ្លូវ​ជាតិ​លេខ​៤​បណ្តាល​ឲ្យ​កកស្ទះ​ចរាចរណ៍​ប្រហែល​កន្លះ​ម៉ោង នៅ​ព្រឹក​ថ្ងៃ​នោះ​ក្រោយ​ពី​ពិធី​បុណ្យចូលឆ្នាំ​ថ្មី​។ ការ​ឃាត់​ខ្លួន​មនុស្ស​៦​នាក់​បន្ថែម​ទៀត​នេះ​គឺ​ក្រោយ​ពី​បាន​ឃាត់ខ្លួន​មនុស្ស​២​នាក់​កាលពី​ថ្ងៃ​ទី​១៨ ខែមេសា ។

លោក​ឧត្តមសេនីយ៍ទោ ជួន ណា​រិ​ន្ទ បញ្ជាក់​ថា «​ពេល​ដែល​កម្លាំង​សមត្ថកិច្ច​និង​ប្រជា​ការពារ​ចុះ​ទៅ​សម្រប​សម្រួល និង​រើស​ដុំ​ថ្ម​ចេញពី​ផ្លូវ​ស្រាប់តែ​ប្រជាពលរដ្ឋ​ទាំងនោះ​បាន​គប់​ដុំ​ថ្ម​ទៅលើ​សមត្ថកិច្ច បណ្ដាល​ឲ្យ​មន្ដ្រី​នគរបាល​៤​រូប និង​ប្រជា​ការពារ​២​រូប រង​របួស​បែកក្បាល ហើយរថយន្ដ​៣​គ្រឿង​បាន​ខូចខាត ។

លោក​វរសេនីយ៍ទោ ហួ យ៉ៃ អធិការ​នគរបាល​ស្រុក​ព្រៃ​នប់ ឲ្យ​ដឹង​ថា មន្ត្រី​នគរបាល​ស្រុក​៤​រូប​និង​ប្រជា​ការពារ​២​រូប ដែល​រង​របួសដោយ​អំពើ​ហិង្សា​នោះ បាន​ទទួល​ថវិកា​ឧបត្ថម្ភ​ពី​លោកនាយ​ឧត្តមសេនីយ៍ នេ​ត សា​វឿ​ន អគ្គស្នងការ​នគរបាល​ជាតិ សម្រាប់​មន្ត្រី​នគរបាល​ក្នុង​ម្នាក់​ៗ១​លាន​រៀល និង​ប្រជា​ការពារ​ក្នុង​ម្នាក់​ៗ៥​សែន​រៀល ។ ជាមួយ​គ្នា​នេះ លោក យន្ត មីន​អភិបាលខេត្ត ក៏​បាន​ឧបត្ថម្ភ​ថវិកា​បន្ថែមចំនួន​៣​លាន​រៀល​ទៀត ដល់​កងកម្លាំង​ដែល​រង​របួស​ក្នុង​អំពើ​ហិង្សា​នេះ​ផង​ដែរ​។

សូម​បញ្ជាក់​ថា ចាប់តាំងពី​ថ្ងៃ​ទី​១៨ ខែមេសា​មក អាជ្ញាធរ​បាន​ព្យាយាម​ចុះ​រុះរើ​សំណង់ផ្ទះ​ខ្ទម​ជាង​៦០០​ខ្នង ដែល​អាជ្ញាធរ​អះអាង​ថា​ជា​សំណង់​អនាធិបតេយ្យ​ខុសច្បាប់​នៅ​ម្តុំ​ចំណោតអូរ​ត្រាវ ក្នុងភូមិ​គគីរ ឃុំ​បិត​ត្រាំ​ង ស្រុក​ព្រៃ​នប់ ប៉ុន្តែ​ប្រជាពលរដ្ឋ​មួយ​ចំនួន​ដែល​បាន​សាងសង់​សំណង់​ខ្ទម​នៅ​លើ​ដី​នោះ បាន​ផ្ទុះ​ការ​តវ៉ា​ជំទាស់ និង​ឈាន​ទៅ​ដល់​ការ​បិទផ្លូវ​ជាតិ​លេខ​៤ ហើយ​ខាង​អាជ្ញាធរ​ក៏​អន្តរាគមន៍​សម្របសម្រួល​សុំ​កុំ​ឲ្យ​ពលរដ្ឋ​បិទផ្លូវ​ជាតិ ព្រោះ​ប៉ះពាល់​ដល់​ការ​ធ្វើ​ចរាចរណ៍​សាធារណៈ ។

ក្នុង​វិធានការ​រុះរើ​ខ្ទម​អនាធិបតេយ្យ​ទាំងនោះ គឺ​សមត្ថកិច្ច​ធ្វើការ​រុះរើ​បាន​មួយ​ចំនួន​ធំ​ហើយ​ហើយ​កម្លាំង​សមត្ថកិច្ច​ក៏​បាន​តម្រូវ​ឲ្យ​ឈរជើង​នៅ​ទីនោះ​សិន ឯ​ក្រុម​ពលរដ្ឋ​ដែល​លើកគ្នា​មក​ចាប់ដី​នោះ ក៏​មិន​បាន​ចាក​ចេញ​ទៅ​ណា​ឆ្ងាយ​ដែរ ៕​

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ