ប្រទេសស្រីលង្កា ៖ ប្រទេសស្រីលង្កានាថ្ងៃទី២១មេសា កើតមានការវាយប្រហារភេរវកម្មដោយគ្រឿងផ្ទុះ ប្រឆាំងសណ្ឋាគារដឺលុច៤ និងព្រះវិហារគ្រឹស្ត៣ ក្នុងទីក្រុង៣ផ្សេងគ្នា បណ្ដាលឲ្យមនុស្សស្លាប់យ៉ាងតិច១៥៨នាក់ក្នុងនោះមានជនបរទេស៣៥នាក់ និងរបួសច្រើនរយនាក់ ក្នុងនោះមួយចំនួនស្ថិតក្នុងស្ថានភាពធ្ងន់ធ្ងរ។
ការវាយប្រហារទាំងនោះសំដៅលើសណ្ឋាគារទំនើប៤និងព្រះវិហារគ្រឹស្តមួយនៃរដ្ឋធានីកូឡឡុំបូ ព្រមទាំងព្រះវិហារគ្រឹស្ត២ទៀត ដោយព្រះវិហារមួយស្ថិតនៅក្នុងទីក្រុងជាប់មាត់សមុទ្រNEGOMBOភាគខាងជើងក្រុងកូឡុំបូនិងព្រះវិហារមួយទៀតស្ថិតនៅទីក្រុងBATTICALOAតំបន់ភាគខាងកើតប្រទេស។
នៅក្រុងកូឡុំបូសណ្ឋាគារទំនើប៣និងព្រះវិហារគ្រឹស្តSAINT ANTHONYរងការវាយប្រហារនាពេលព្រឹក ហើយសណ្ឋាគារមួយឈ្មោះសណ្ឋាគារDEHIWAKAនាជាយក្រុងកូឡុំបូភាគខាងត្បូងរងការវាយប្រហារនាវេលារសៀល។ អ្នកទទួលខុសត្រូវម្នាក់និយាយថា មនុស្សយ៉ាងតិច១៦០នាក់ដែលរងរបួស ក្នុងការផ្ទុះនៅក្នុងព្រះវិហារSAINT ANTHONYត្រូវបានបញ្ជូនទៅមន្ទីរពេទ្យជាតិក្រុងកូឡុំបូ។ ក្នុងចំណោមជនរងគ្រោះមនុស្សយ៉ាងតិចម្នាក់ស្លាប់ ក្នុងសណ្ឋាគារCINNAMON GRAND HOTELក្រុងកូឡុំបូ ស្ថិតនៅជិតនិវេសនដ្ឋានផ្លូវការរបស់នាយករដ្ឋមន្ត្រី។ អ្នកទទួលខុសត្រូវម្នាក់នៃសណ្ឋាគារនោះបញ្ជាក់ថា ការផ្ទុះកើតមានក្នុងភោជនីយដ្ឋានមួយ។ ចំណែគអ្នកទទួលខុសត្រូវម្នាក់នៃមន្ទីរពេទ្យក្រុងអះអាងថា មនុស្ស៣០០នាក់រងរបួស។
នាយករដ្ឋមន្ត្រីស្រីលង្កាលោកRANIL WICKREMMESINGHE បានបរិហារថា នោះជាការវាយប្រហារដ៏កំសាក។ ខ្ញុំថ្កោលទោសយ៉ាងខ្លាំងចំពោះការប្រហារដ៏កំសាកទាំងនេះមកលើប្រជាជនយើង។ ខ្ញុំអំពាវនាវដល់ពលរដ្ឋស្រីលង្កាទាំងអស់ឲ្យនៅតែរួបរួមគ្នានិងកាន់តែខ្លាំងថែមទៀត ក្នុងកាលៈទេសៈនៃសោកនាដកម្មនេះ។ លោកបន្តថារដ្ឋាភិបាលនឹងចាត់ វិធានការបន្ទាន់នានាដើម្បីកម្ទេចពួកភេរវករ។
ការវាយប្រហារទាំងនេះកើតមានក្នុងព្រះវិហារគ្រឹស្ត ពេលប្រារព្ធពិធីសូត្រធម៌ រដូវបុណ្យPAQUESគ្រឹស្ត ជាបុណ្យសំខាន់មួយនៃសាសនាគ្រឹស្ត។
ការវាយប្រហារទាំងនេះនៅពុំទាន់មានអ្នកប្រកាសទទួលខុសត្រូវនៅឡើយ ប៉ុន្តែប្រមុខប៉ូលិសជាតិ ធ្លាប់បានព្រមានកាលពី១០ថ្ងៃមុននេះថា ចលនាអ៊ិស្លាមនិយមNTJ មានគម្រោងវាយប្រហារ ប្រឆាំងបណ្ដាទីតាំងសាសនាកាតូលិក។ កាលពីឆ្នាំទៅមិញចលនានោះធ្លាប់បានប្រកាសទទួលខុសត្រូវ លើការវាយប្រហារ ប្រឆាំងទីតាំងព្រះពុទ្ធសាសនានានាក្នុងប្រទេសនេះ ដែលមាន អ្នកកាន់ព្រះពុទ្ធសាសនា កាតូលិក ហិណ្ឌូនិងអ៊ិស្លាម៕
ចែករំលែកព័តមាននេះ