ខេត្តបន្ទាយមានជ័យ ៖ លោកនាយករងសាលាបឋមសិក្សារំពាក់បានធ្វើអត្តឃាតដោយចង.កនៅនឹងមែកដើមស្នាយដែលមានកំពស់២,៥០ម៉ែត្រ បណ្តាលឱ្យស្លាប់ ។ ហេតុការណ៍នេះបង្កឲ្យមានការភ្ញាក់ផ្អើលបានកើតឡើងកាលពីវេលាម៉ោង៤និង៥០នាទីរសៀលថ្ងៃទី១៩ ខែមេសា ឆ្នាំ២០១៩ នៅចំណុចខាងលិចសាលាបឋមសិក្សារំបាក់ ចម្ងាយ១៥០ម៉ែត្រ ស្ថិតក្នុងភូមិរំបាក់ ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ ។
តាមការឲ្យដឹងពីលោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា ជនរងគ្រោះដែលស្លាប់ឈ្មោះ កាន់ ភីឡា ភេទប្រុស អាយុ៥៣ឆ្នាំ នៅភូមិរំពាក់ ឃុំឈ្នួរមានជ័យ ស្រុកព្រះ
នេត្រព្រះ ខេត្តបន្ទាយមានជ័យ មានតួនាទីជានាយករងនៃសាលាបឋមសិក្សារំពាក់ ។
លោកអធិការក៏បានបញ្ជាក់ថា យោងតាមរបាយការណ៍របស់លោកមេភូមិរំបាក់បានឲ្យដឹងថា កាលពីយប់ថ្ងៃទី១៨ មេសា ជនរងគ្រោះបានធ្វើបុណ្យឆ្លងចេតីយឪពុកក្មេក ហើយនៅក្នុងកម្មវិធីបុណ្យនេះជនរងគ្រោះបានបម្រើភ្ញៀវជាធម្មតា និងមានការហូបស្រាបន្តិចបន្តួច រួមទាំងមានការរាំលេងកម្សាន្តសប្បាយជាមួយបងប្អូនជិតខាងផងដែរ ហើយជនរងគ្រោះតែងតែផឹកស្រាស្រវឹងជាប្រចាំផងដែរ។
បើតាមការបំភ្លឺពីអ្នកជិតខាងឈ្មោះ យាវ កាន ភេទប្រុស អាយុ២៧ឆ្នាំ បានប្រាប់សមត្ថកិច្ចថា នៅវេលាម៉ោង៤និង៥០នាទីរសៀលថ្ងៃទី១៩ ខែមេសា គាត់បានដើរកាត់ត្រង់ចំណុចព្រំរបងថ្នាលស្រែរបស់ជនរងគ្រោះស្ថិតនៅខាងលិចសាលាបឋមសិក្សារពាក់ចំងាយ១៥០ម៉ែត្រ ដើម្បីទៅមើលគោ និងទៅមើលអង្គប់ដាក់កណ្តុរដែលគាត់បានដាក់កាលពីថ្ងៃមុនផងនោះ ក៏ស្រាប់តែប្រទះឃើញជនរងគ្រោះចង.កនឹងមែកដើមស្នាយស្លាប់បាត់ទៅហើយ ។ បន្ទាប់មកគាត់ក៏រាយការណ៍ទៅសមត្ថកិច្ចដើម្បីឱ្យចុះមកពិនិត្យកន្លែងកើតហេតុ ។
លោកវរសេនីយ៍ឯកមាស ប្ញទ្ធី អធិការនគរបាលស្រុកព្រះនេត្រព្រះ បានបញ្ជាក់ឲ្យដឹងថា ក្រោយពីទទួលបានព័ត៌មានខាងលើភ្លាម លោកបានចាត់កម្លាំងជំនាញបច្ចេកទេសវិទ្យាសាស្ត្រ អធិការដ្ឋាននគរបាលស្រុក និងប៉ុស្តិ៍រដ្ឋ ចុះទៅពិនិត្យសព ដោយមានការសហការជាមួយអាជ្ញាធរភូមិ ឃុំ រួមទាំងសាច់ញាតិ និងគ្រូពេទ្យមណ្ឌលសុខភាពឃុំ បានរកឃើញថា នៅលើខ្លួនសពជនរងគ្រោះគឺពុំមានស្នាកស្នាមអ្វីទាក់ទិននឹងករណីមនុស្សឃាតនោះទេ គឺជនរងគ្រោះពិតជាស្លាប់ដោយសារចង.កប្រាកដមែន ដោយជនរងគ្រោះបានយកខ្សែលួសប្រវែង១ម៉ែត្រចង.កភ្ជាប់នឹងមែកដើមស្នាយ ។ ចំពោះមូលហេតុបណ្តាលឲ្យជនរងគ្រោះធ្វើអត្តឃាតដោយចងកនេះ គេនៅមិនទាន់ដឹងនៅឡើយ។
ក្រោយពីធ្វើកោសល្យវិច្ច័យរួច សពជនរងគ្រោះត្រូវបានប្រគល់ឲ្យប្រពន្ធ និងសាច់ញាតិដើម្បីយកទៅចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ