ខេត្តបាត់ដំបង ៖ ពិរុទ្ធជនម្នាក់ដែលជាប់ពាក់ព័ន្ធក្នុងអំពើប្លន់កាលពី១៧ឆ្នាំមុន ហើយទើបបង្ហាញខ្លួននាពេលនេះ ត្រូវកម្លាំងនគរបាលផ្នែកអនុវត្តន៍ដីកានៃស្នងការខេត្តចាប់ខ្លូន នៅវេលាម៉ោង១១និង១៥នាទីថ្ងៃត្រង់ ថ្ងៃទី១៥ មេសានេះ នៅផ្ទះរបស់ខ្លួន ដែលស្ថិតនៅភូមិឆាយបល្ល័ង្ក ឃុំធិបតី ស្រុកគាស់ក្រឡ ក្នុងឱកាសចូលឆ្នាំថ្មីប្រពៃណីខ្មែរ។
មន្ត្រីផ្នែកអនុវត្តន៍ដីកាបានឲ្យដឹងថា ពិរុទ្ធជនរូបនេះឈ្មោះ ខាន់ ចន្ថា ភេទប្រុស អាយុ៤១ឆ្នាំ រស់នៅភូមិឆាយបល្ល័ង្ក ឃុំធិបតី ស្រុកគាស់ក្រឡ។ ជននេះត្រូវបានចាប់ខ្លួនតាម «ដីកាបង្គាប់ឲ្យចាប់ខ្លួន» លេខ១៧៩ ដចខ ចុះថ្ងៃទី២២ តុលា ឆ្នាំ២០០៣ របស់ចៅក្រមស៊ើបសួរ លោក សួស សំអាត សាលាដំបូងខេត្តបាត់ដំបង។
![](https://kohsantepheapdaily.com.kh/wp-content/images/2019/04/a97da629b098b75c294dffdc3e463904-2.jpg)
បើយោងដីកានេះ ឈ្មោះខាន់ ចន្ថា នេះ ត្រូវបានតំណាងអយ្យការចោទប្រកាន់ពីបទ «ប្លន់ទ្រព្យសម្បត្តិប្រជារាស្ត្រ» ដែលបានប្រព្រឹត្ត នៅចំណុចក្រុមហ៊ុនណាវ៉ារ៉ាត់ ស្ថិតក្នុងភូមិកន្ទួត ឃុំធិបតី ស្រុកគាស់ក្រឡ កាលពីថ្ងៃទី២៥ វិច្ឆិកា ឆ្នាំ២០០២ កន្លងទៅ ប៉ុន្តែក្រោយប្រព្រឹត្តបទល្មើស ជននេះបានរត់គេចទៅសម្ងំសុខនៅប្រទេសថៃរហូត លុះត្រឡប់ចូលស្រុកវិញដើម្បីចូលឆ្នាំថ្មីប្រពៃណីខ្មែរនាឆ្នាំនេះ ក៏ត្រូវកម្លាំងជំនាញចាប់ខ្លួនតាមដីកាតែម្ដង។
ជាមួយនឹងការចាប់ខ្លួន ពិរុទ្ធជនឈ្មោះ ខាន់ ចន្ថា បានផ្ដល់ចម្លើយខ្លះៗដោយសង្ខេបថា ខ្លួនពិតជាបានប្រព្រឹត្តនូវអំពើប្លន់មែន ហើយក្រោយពេលប្រព្រឹត្តបទល្មើសខ្លួនបានរត់គេចទៅសម្ងំលាក់ខ្លួននៅប្រទេសថៃជារៀងរហូត បើគិតត្រឹមថ្ងៃចាប់ខ្លួនគឺមានរយៈពេល១៧ឆ្នាំហើយ។ ប៉ុន្តែក្នុងរយៈពេលនៃការរត់គេចខ្លួននេះ ខ្លួនធ្លាប់ចរចាជាមួយមន្ត្រីនគរបាលនៅស្រុកគាស់ក្រឡ (សុំលាក់ឈ្មោះ) ដើម្បីបញ្ចប់សំណុំរឿងជាថ្នូរនឹងការសូកលុយរាប់លានរៀល។
![](https://kohsantepheapdaily.com.kh/wp-content/images/2019/04/a3c65c2974270fd093ee8a9bf8ae7d0b-2.jpg)
ជនរូបនេះនិយាយថា ខ្លួនបានសូកលុយជូនមន្ត្រីនគរបាលម្នាក់នៅស្រុកគាស់ក្រឡ និងបងប្អូនខ្លួនម្នាក់ជាសមត្ថកិច្ចដែរ ដើម្បីឲ្យជួយរត់ការបញ្ចប់សំណុំរឿងបទឧក្រិដ្ធនេះ ហើយមន្ត្រីទាំងនោះក៏បានអះអាងធានាបញ្ចប់សំណុំរឿងនេះជាមួយតុលាការរួចរាល់ហើយដែរ ប៉ុន្តែនៅពេលខ្លួនត្រឡប់ពីប្រទេសថៃមកស្រុកកំណើត ដើម្បីចូលរួមពិធីបុណ្យចូលឆ្នាំថ្មីប្រពៃណីខ្មែរ នាឆ្នាំនេះក៏ត្រូវសមត្ថកិច្ចចាប់ខ្លួនតែម្ដង។
ជននេះក៏បាននិយាយដែរថា តាមពិតខ្លួនមិននឹកស្មានថា នៅជាប់ទោសទណ្ឌបែបនេះទេ ព្រោះសំអាងថា បានបង់លុយឲ្យមន្ត្រីនគរបាល ដើម្បីបញ្ចប់រឿងរួចហើយ ទើបខ្លួនហ៊ានចូលស្រុក តែបែរជានៅតែជាប់ទោសដដែល។ យ៉ាងណាក៏ដោយ បើតាមមន្ត្រីផ្នែកអនុវត្តដីកា ក្រោយអនុវត្តដីកា កម្លាំងជំនាញបានបញ្ជូនជនល្មើសរូបនេះទៅប្រគល់ជូនតុលាការ ដើម្បីចាត់ការបន្តតាមនីតិវិធីហើយ៕
ចែករំលែកព័តមាននេះ