តាមប្រភពពី Shanghaiistឱ្យដឹងថា ស្ត្រីម្នាក់ត្រូវបានប៉ូលិសសាកសួរ ក្រោយពីរាយការណ៍ក្លែងក្លាយប្រាប់ថា នាងត្រូវបានគេចាប់រំលោភ ។ ក្រោយពីការសាកសួរទើបដឹងថា នាងធ្វើបែបនេះ ដោយសារតែចង់ដឹងថា ប៉ូលិសធ្វើការលឿនដែរឬអត់។
កាលពីយប់ថ្ងៃសៅរ៍កន្លងមក ប៉ូលិសនៅក្រុង Heilongjiang នៃខេត្ត Tieli បានទទួលទូរស័ព្ទពីស្ត្រីម្នាក់រាយការណ៍មកថា នាងនឹងត្រូវគេចាប់រំលោភនៅពេលបន្តិចទៀតនេះ ហើយប៉ូលិសត្រូវតែជួយនាងជាបន្ទាន់ ។ នាងមិនបានប្រាប់ពីអាសយដ្ឋាននាងនោះទេ ដែលទាមទារឱ្យប៉ូលិសធ្វើការឆែកតាមបន្ទប់នីមួយៗក្នុងអគារផ្សេងៗគ្នា។
ការរុករករបស់ប៉ូលិសមិនបានសម្រេចនោះទេ។ តែក្រោយមកនាងក៏ទូរស័ព្ទមកម្តងទៀត តែលើកនេះនាងប្រាប់ថា នាងគ្មានបញ្ហាអ្វីឡើយ ព្រោះនាងគ្រាន់តែខឹងមិត្តប្រុសរបស់នាងប៉ុណ្ណោះ ។ ប៉ូលិសកាន់តែគិតថា នាងត្រូវគេគំរាម ហើយបានជានិយាយបែបនេះ។
ពួកគេបានបន្ថែមការរុករករហូតទាល់តែដឹងថា អាសយដ្ឋានរបស់នាងនៅទីណាតាមរយៈទូរស័ព្ទ ។ ដល់ពេលប៉ូលិសរកឃើញ នាងប្រាប់ថា នាងធ្វើដូចនេះ ដោយសារតែចង់ដឹងថា ប៉ូលិសចាត់ការរឿងនេះលឿនប៉ុនណា ។ យោងទៅតាមច្បាប់ ទង្វើរបស់នាងនឹងត្រូវដាក់ពិន័យពីបទបង្កការលេងសើចតាមការទូរស័ព្ទទៅលេខបន្ទាន់។ តែគេមិនទាន់ដឹងថា នាងត្រូវទទួលពិន័យបែបណានៅឡើយទេ ៕
ចែករំលែកព័តមាននេះ