ប្រទេសវេណេស៊ុយអេឡា ៖ យោងតាមAFPនិងរូបភាពទាំងឡាយផ្សាយតាមបណ្ដាញសង្គមថា រដ្ឋធានីការ៉ាកាស់និងផ្នែកមួយធំនៃប្រទេសវេណេស៊ុយអេឡា ត្រូវធ្លាក់ក្នុងភាពងងឹតជាថ្មីកាលពីយប់ថ្ងៃទី៩មក១០មេសា មកពីការដាច់ភ្លើងធំថ្មីុ។
ការដាច់ភ្លើងធំថ្មីនេះកើតមាននាវេលាម៉ោង២៣និង២០នាទីម៉ោងក្នុងស្រុក ប៉ះពាល់ដល់ផ្នែកមួយធំនៃរដ្ឋធានី ព្រមទាំងតំបន់សំខាន់ៗ ក្នុងរដ្ឋយ៉ាងតិច១៨ក្នុងចំណោមរដ្ឋទាំង២៣របស់ប្រទេស។ ទាំងរដ្ឋាភិបាលទាំងក្រុមហ៊ុនអគ្គិសនីជាតិ ពុំបានធ្វើការពន្យល់ចំពោះការដាច់ភ្លើងធំថ្មីនោះឡើយ ខណៈមេដឹកនាំប្រឆាំងលោកJUAN GUAIDOអំពាវនាវឲ្យមានបាតុកម្មនាថ្ងៃទី១០មេសា ដើម្បីតវ៉ាប្រឆាំងពីភាពអសកម្មនៃសេវាកម្មសាធារណៈ។
ចាប់តាំងពីថ្ងៃទី៧មីនាដែលមានការដាច់ភ្លើងដ៏ធំ ធ្វើឲ្យប្រទេសស្ទើរទាំងមូលងងឹតសូន្យសុងដល់ទៅ៥ថ្ងៃ ការដាច់ភ្លើងមានជាប់រដឹកនៅវេណេស៊ុយអេឡា ធ្វើឲ្យប៉ះពាល់ជាពិសេសដល់សេវាកម្មចែកចាយទឹក ការដឹកជញ្ជូននិងបណ្ដាញទូរស័ព្ទព្រមទាំងអីុនធើរណេត។ រដ្ឋាភិបាលរបស់ប្រធានាធិបតីលោកនីកូឡាស់ម៉ាឌូរ៉ូ បានទម្លាក់ការទទួលខុសត្រូវលើការដាច់ភ្លើងនោះ លើការវាយប្រហារអេឡិចត្រូម៉ាញ៉េទិក និងCYBERNETIQUES ប្រឆាំងមជ្ឈមណ្ឌលវារីអគ្គិសនីGURI ដែលផលិតថាមពល៨០%របស់ប្រទេស។ រដ្ឋាភិបាលនោះក៏ចោទប្រកាន់លើសហរដ្ឋអាមេរិកដែរថា ជាអ្នកនៅពីក្រោយការវាយប្រហារទាំងនេះ ក្នុងគោលបំណងបង្កអស្ថេរភាព៕
ចែករំលែកព័តមាននេះ