ខេត្តសៀមរាប ៖ រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង ដើម្បីសិក្សារៀបចំផែនការមេ សម្រាប់ការអភិវឌ្ឍវិស័យទេសចរណ៍ នៅខេត្តសៀមរាប បានអះអាងថា សហគមន៍នេសាទ និងតំបន់ការពារធម្មជាតិបឹងពារាំង…
ខេត្តសៀមរាប ៖ រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួង ដើម្បីសិក្សារៀបចំផែនការមេ សម្រាប់ការអភិវឌ្ឍវិស័យទេសចរណ៍ នៅខេត្តសៀមរាប បានអះអាងថា សហគមន៍នេសាទ និងតំបន់ការពារធម្មជាតិបឹងពារាំង ក្នុងសង្កាត់ជ្រាវ ក្រុងសៀមរាប នឹងក្លាយជាសហគមន៍ទេសចរណ៍ដ៏ទាក់ទាញថ្មីមួយទៀត ដើម្បីបំពេញតម្រូវការបន្ថែមជូនភ្ញៀវទេសចរ ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងនូវការអះអាងដូច្នេះក្នុងកិច្ចប្រជុំលើកទី២ របស់គណៈកម្មាធិការអន្តរក្រសួង ដើម្បីសិក្សារៀបចំផែនការមេសម្រាប់ការអភិវឌ្ឍន៍វិស័យ ទេសចរណ៍នៅខេត្តសៀមរាបនាពេលកន្លងទៅ។
សូមជម្រាបថា នៅសហគមន៍នេសាទ និងតំបន់ការពារធម្មជាតិបឹងពារាំងនេះ មានសក្តានុពលទេសចរណ៍ដ៏ទាក់ទាញសម្រាប់ភ្ញៀវទេសចរដែលស្រលាញ់ចូលចិត្តធម្មជាតិ មើលសត្វស្លាប គយគន់ថ្ងៃលិច ជិះទូកកម្សាន្តនៅជុំវិញបឹងជាដើម។
លោករដ្ឋមន្ត្រីបានបញ្ជាក់ថា ក្រសួងទេសចរណ៍មិនទាមទារនូវការចុះបញ្ជី ឬការគ្រប់គ្រងទៅលើ សហគមន៍នេសាទ ឬសហគមន៍តំបន់ការពារធម្មជាតិទេ ប៉ុន្តែក្រសួង អាចទទួលស្គាល់ សហគមន៍ណាមួយ ជាសហគមន៍ទេសចរណ៍បាន លុះត្រាតែសហគមន៍ទេសចរណ៍នោះ អាចបង្ហាញគោលការណ៍២សំខាន់គឺ ទី១-សហគមន៍ទាំងនោះមានសក្តានុពលទេសចរណ៍ អាចទាក់ទាញភ្ញៀវទេសចរបាន និងទី២-សហគមន៍ទាំងនោះ បានរៀបចំត្រឹមត្រូវតាមស្តង់ដារ សហគមន៍ទេសចរជាតិ និងអាស៊ាន។
ប៉ុន្តែលោកមើលឃើញថានៅតំបន់បឹងពារាំងនេះប្រជាពលរដ្ឋសហគមន៍បានចូលរួមយ៉ាងសកម្ម ក្នុងការអភិរក្ស នូវធនធានជលផល ជាពិសេសត្រីធម្មជាតិ ដែលជាប្រភពទាក់ទាញសត្វស្លាប រាប់សែនក្បាល ឲ្យមកស្នាក់អាស្រ័យ ធ្វើសំបុកពងកូន ដែលទាំងនេះបង្កើតបានជាសក្តានុពលទេសចរណ៍ដ៏ទាក់ទាញសម្រាប់ភ្ញៀវទេសចរដែលស្រលាញ់ចូលចិត្តធម្មជាតិ មើលសត្វ គយគន់ថ្ងៃលិច ជិះទូកកម្សាន្តនៅជុំវិញបឹងជាដើម។
លោក ថោង ខុន ក៏បានបញ្ជាក់បន្ថែមថា គំរូនៃការប្រែក្លាយសហគមន៍នេសាទ និងសហគមន៍ តំបន់ការពារធម្មជាតិ ទៅជាសហគមន៍ ទេសចរណ៍ ក៏ត្រូវបានអនុវត្តប្រកបដោយជោគជ័យ នៅសហគមន៍មួយចំនួន ដូចជាសហគមន៍ អេកូទេសចរណ៍ជីផាត សហគមន៍ទេសចរណ៍ ធម្មជាតិចំបក់ និងសហគមន៍អេកូទេសចរណ៍ អារ៉ែងជាដើម។
លោករដ្ឋមន្ត្រីបានលើកឡើងថា ការអភិវឌ្ឍអេកូទេសចរណ៍ និងសហគមន៍ទេសចរណ៍ គឺជាយន្តការមួយដ៏សមស្របសម្រាប់ការអភិវឌ្ឍ និងអភិរក្សក្នុងតំបន់ការពារធម្មជាតិប្រកប ដោយប្រសិទ្ធភាព និងភាពស័ក្តិសិទ្ធ និងផ្តល់ឱកាសឱ្យប្រជាពលរដ្ឋមូលដ្ឋានអាចចូលរួម យ៉ាងសកម្ម ក្នុងការសម្រេចចិត្ត ឬអាចនិយាយបានថា ជាការផ្តល់នូវសិទ្ធិអំណាចដល់ ប្រជាពលរដ្ឋមូលដ្ឋាន (Local Empowerment) ដោយប្រជាពលរដ្ឋអាចទទួលផលប្រយោជន៍ ដោយផ្ទាល់ពីទេសចរណ៍ ប្រកបដោយសមធម៌ បង្កើនការការអភិរក្សនូវធនធានធម្មជាតិ ក្នុងតំបន់ដែលខ្លួនគ្រប់គ្រង បង្កើននូវកម្រិតជីវភាព និងចូលរួមដល់ការកាត់បន្ថយភាពក្រីក្រ និងចំណាកស្រុកប្រកបដោយប្រសិទ្ធភាព។
គួរកត់សម្គាល់ថា ក្នុងក្របខណ្ឌនៃរដ្ឋមន្ត្រីទេសចរណ៍អាស៊ាន កម្ពុជាគឺជាប្រទេសនាំមុខ ក្នុងការរៀបចំស្តង់ដារ សហគមន៍ទេសចរណ៍អាស៊ាន និងស្តង់ដាផ្ទះស្នាក់អាស៊ាន ហើយ អំឡុងនៃវេទិការទេសចរណ៍អាស៊ានកាលពីខែមករា ឆ្នាំ២០១៩ នៅប្រទេសវៀតណាម កម្ពុជា មានសហគមន៍ទេសចរណ៍ចំនួន៣ និងផ្ទះស្នាក់ចំនួន៥ ដែលបានទទួលរង្វាន់ពីអាស៊ានក្នុងនោះ រួមមាន៖
ទី១-សហគមន៍អេកូទេសចរណ៍តំបន់ស្ទឹងអារ៉ែង ក្នុងខេត្តកោះកុង ទី២-សហគមន៍ទេសចរណ៍កំពង់ភ្លុក ក្នុងខេត្តសៀមរាប ទី៣-សហគមន៍ទេសចរណ៍បន្ទាយឆ្មារ ក្នុងខេត្តបន្ទាយមានជ័យ ។
ចំណែកផ្ទះស្នាក់ចំនួន៥ ដែលបានទទួលជ័យលាភីអាស៊ានឆ្នាំ២០១៩ ផងដែរនោះ រួមមាន៖ ទី១-ផ្ទះស្នាក់ឥសាន្តបុរី ក្នុងសហគមន៍សំបូរព្រៃគុក ខេត្តកំពង់ធំ ទី២-ផ្ទះស្នាក់ទុនសារិន ក្នុងសហគមន៍ទេសចរណ៍កំពង់ឃ្លាំង ខេត្តសៀមរាប ទី៣-ផ្ទះស្នាក់តាំងងិន ក្នុងសហគមន៍ទេសចរណ៍ជីផាត ខេត្តកោះកុង ទី៤-ផ្ទះស្នាក់បាណាណា ក្នុងសហគមន៍រ៉ុនតាឯក ខេត្តសៀមរាប ទី៥-ផ្ទះស្នាក់កឿនស្រីមុំ ក្នុងសហគមន៍ទេសចរណ៍បន្ទាយឆ្មារ ខេត្តបន្ទាយមានជ័យ៕
ចែករំលែកព័តមាននេះ