ប្រទេសលីប៊ី ៖ កងទ័ពជាតិលីប៊ីរបស់សេនាប្រមុខ KHALIFA HAFTAR ដែលត្រួតត្រាផ្នែកមួយដ៏ធំរបស់ប្រទេស មកដល់ថ្ងៃទី៩មេសា នៅតែបន្តការវាយលុកប្រឆាំងក្រុងទ្រីប៉ូលីជាទីតាំងរបស់រដ្ឋាភិបាលរួបរួមជាតិ ទទួលស្គាល់ដោយអ.ស.ប ប៉ុន្តែហាក់ដូចជាចុះខ្សោយ។
ចាប់តាំងពីយូរមកហើយជាមនុស្សជិតដិតនឹងអាមេរិក សេនាប្រមុខរូបនោះបច្ចុប្បន្នពឹងពាក់លើមហាអំណាចបរទេសផ្សេងៗ។ សេនាប្រមុខKHALIFA HAFTARមិនត្រឹមតែចង់ក្លាយជាបុរសខ្លាំងនៅភាគខាងកើតប្រទេសប៉ុណ្ណោះទេ តែនៅលីប៊ីទាំងមូល។ គាំទ្រដោយសភាក្រុងTABROUK ជាទីតាំងរបស់រដ្ឋាភិបាលភាគខាងកើតលីប៊ី ចាប់តាំងពីឆ្នាំ២០១៤មក សេនាប្រមុខអាយុ៧៥ឆ្នាំរូបនោះ ដែលកងកម្លាំងរបស់លោកត្រួតត្រាផ្នែកមួយដ៏ធំនៃប្រទេស ចង់វាយដណ្ដើមយកភាគខាងលិចប្រទេសនិងរដ្ឋធានីទ្រីប៉ូលីទៀត។
រដ្ឋធានីទ្រីប៉ូលីជាទីតាំងរបស់រដ្ឋាភិបាលរួបរួមជាតិដែលមាន លោកFAYEZ AL SARRAJជានាយករដ្ឋមន្ត្រី ទទួលស្គាល់ដោយអ.ស.ប ប៉ុន្តែមានអំណាចពុំទូលំទូលាយ។
ទោះបីយ៉ាងណាកងកម្លាំងរបស់លោកHAFTAR ដែលបើកធ្វើចាប់តាំងពីសប្ដាហ៍មុនមក នូវការវាយលុកមួយលើក្រុងទ្រីប៉ូលី ជួបប្រទះនឹងការវាយទប់ទល់ របស់បណ្ដាកងជីវពលប្រដាប់អាវុធខ្លាំងៗ ដែលគាំទ្រលោកSARRAJ។ ខណៈជម្លោះដោយអាវុធថ្មីនាំឲ្យមានការភ័យខ្លាចរបស់ពលរដ្ឋក្រុងទ្រីប៉ូលី តែពលរដ្ឋនោះមួយផ្នែកមានបំណងចង់បានប្រទេសលីប៊ីឯកភាពមួយ ហើយងាកមកគាំទ្រសេនាប្រមុខHAFTAR។
កាសែតបារាំងLE FIGAROបានចេញផ្សាយអត្ថបទមួយដែលនាំឲ្យស្គាល់សេនាប្រមុខរូបនោះ។ កើតក្នុងឆ្នាំ១៩៤៣នាយទាហានសកម្មរូបនោះ ធ្លាប់ចូលរួមក្នុងរដ្ឋប្រហារឆ្នាំ១៩៦៩ ដែលនាំទៅដល់ការផ្ដួលរំលំព្រះមហាក្សត្រIDRISទី១ ហើយនាំទៅរកការឡើងកាន់អំណាចរបស់វរសេនីយឯកកាដាហ្វី។ ក្នុងឆ្នាំ១៩៨៧ លោកជាអ្នកដឹកនាំកងកម្លាំងប្រតិបត្តិការមួយរបស់លីប៊ី វាយប្រហារប្រឆាំងកងទ័ពឆាដ។ ដោយទទួលបរាជ័យលោកត្រូវគេចាប់បានហើយយកទៅឃុំឃាំង នៅរដ្ឋធានីឆាដក្រុងយ៉ាមេណា រួចនៅទីនោះលោកបានបែរខ្នងហើយត្រូវបានសហរដ្ឋអាមេរិកឲ្យដឹកនាំក្នុងប្រទេសឆាដ កងកម្លាំងមួយហៅកងកម្លាំងHAFTAR។ កងកម្លាំងនោះបង្កើតឡើងសម្រាប់ផ្ដួលរំលំលោកកាដាហ្វីនៅលីប៊ី៕
ចែករំលែកព័តមាននេះ