ប្រទេសជប៉ុន ៖ អ្នកនាំពាក្យម្នាក់របស់កងទ័ពអាកាសជប៉ុនថ្លែងកាលពីថ្ងៃទី១០ មេសាថា បណ្ដាក្រុមអ្នករុករកបានរកឃើញបំណែករបស់យន្តហោះប្រដេញបំបាំងកាយធុន F35ផលិតដោយក្រុមហ៊ុនអាមេរិក LOCKHEED MARTIN របស់កងទ័ពអាកាសជប៉ុន១គ្រឿង ដែលបាត់ដានកាលពីថ្ងៃទី៩មេសា ពីលើមហាសមុទ្រប៉ាសីុហ្វិក នៅក្បែរប្រទេសជប៉ុន។
អ្នកនាំពាក្យរូបនេះថ្លែងទៅកាន់រ៉យទ័រថា អ្នកបើកយន្តហោះនោះនៅតែបាត់ខ្លួន។ កងទ័ពអាកាសជប៉ុនរៀបរាប់ថា យន្តហោះប្រដេញនោះ ស្ថិតនៅចម្ងាយប្រមាណជា១៣៥គីឡូម៉ែត្រ ខាងកើតមូលដ្ឋានអាកាសចរណ៍នៃទីក្រុងអាអូម៉ូរី នាវេលាម៉ោង១០និង២៧នាទីម៉ោងសកលថ្ងៃទី៩មេសា ពេលបាត់ដានពីរ៉ាដា។
នេះជាការបាត់បង់លើកដំបូងនូវយន្តហោះធុនF35Aជំនាន់ទី៥ ហើយជាគ្រោះថ្នាក់លើកទី២ប៉ុណ្ណោះនៃយន្តហោះF35 ចាប់តាំងពីដាក់ឲ្យប្រើប្រាស់ជិត២ទសវត្សមកហើយ។ យន្តហោះជួបគ្រោះថ្នាក់នេះត្រូវបានប្រគល់ឲ្យ កាលពីខែឧសភាឆ្នាំ២០១៨ ក្នុងក្របខណ្ឌនៃការបញ្ជាទិញលើកដំបូងរបស់ជប៉ុននៃយន្តហោះF35 ពីក្រុមហ៊ុន LOCKHEED MARTIN។
ក្រុងតូក្យូគ្រោងទិញយន្តហោះប្រដេញបំបាំងកាយធុននោះ ៨៧គ្រឿងថែមទៀតដើម្បីប្រឈមមុខនឹងឥទ្ធិពល កាន់តែខ្លាំងរបស់ចិនក្នុងតំបន់ប៉ាសីុហ្វិកខាងលិច។ មួយផ្នែកនៃយន្តហោះF35ដែលរដ្ឋាភិបាលជប៉ុនគ្រោងទិញ ត្រូវដាក់ពង្រាយក្នុងតំបន់សមុទ្រចិនខាងត្បូង ដែលនៅទីនោះជប៉ុនទាមទារយកកោះនានា។ យន្តហោះធុនF35មួយគ្រឿង បើតាមតម្លៃទើបនឹងបញ្ចុះច្រើន គឺប្រមាណជា៨៩,២លានដុល្លារ៕
ចែករំលែកព័តមាននេះ