រាជធានីភ្នំពេញ ៖ អគ្គីភ័យបានឆាបឆេះឃ្លាំងស្តុកអីវ៉ាន់ក្នុងក្រុមហ៊ុនមួយយ៉ាងសន្ធោសន្ធៅផ្អើលរថយន្តពន្លត់អគ្គីភ័យបាញ់ទឹកអស់២គ្រឿងទើបរលត់ ។ ហេតុការណ៍នេះបង្កការភ្ញាក់ផ្អើលកាលពីវេលាម៉ោង៣និង៣០នាទីទៀបភ្លឺថ្ងៃទី១០ ខែមេសា ឆ្នាំ២០១៩ តាមបណ្តោយផ្លូវ៦៣កែងផ្លូវ១៥៤ នៅចំណុចផ្ទះលេខ៥០ ក្រុមហ៊ុនយីហោHCC ស្ថិតក្នុងក្រុម១២ ភូមិ៣ សង្កាត់បឹងរាំង ខណ្ឌដូនពេញ ។
តាមប្រភពព័ត៌មានពីសន្តិសុខឯកជនមួយសុំមិនបញ្ចេញឈ្មោះបានអោយដឹងថា មុនពេលកើតហេតុ គាត់កំពុងតែយាមនៅក្រុមហ៊ុនខាងលើ លុះដល់វេលាម៉ោងកើតហេតុស្រាប់តែមានផ្សែងខ្មួលខ្មាញ់ហុយចេញពីឃ្លាំងស្តុកអីវ៉ាន់ក្នុងក្រុមហ៊ុនខាងលើ បង្កអោយមានការភ្ញាក់ផ្អើលដល់សន្តិសុខចាក់សោបើកទ្វារឃ្លាំងភ្លាមៗឃើញមានអណ្តាតភ្លើងឆាបឆេះចេញមកក្រៅយ៉ាងខ្លាំង ទើបសន្តិសុខយកបំពង់ពន្លត់អគ្គីភ័យបាញ់អស់៣ទៅ៤បំពង់នៅតែមិនរលត់ ទើបសមត្ថកិច្ចប៉ុស្តិ៍បឹងរាំងចុះអន្តរាគមន៍រាយការណ៍ហៅរថយន្តពន្លត់អគ្គីភ័យចុះមកធ្វើការបាញ់ទឹកពន្លត់ចំនួន៣គ្រឿង ប៉ុន្តែបាញ់អស់ទឹកតែ២រថយន្តប៉ុណ្ណោះ ។
សមត្ថកិច្ចក៏បានបញ្ជាក់ផងដែរថា ម្ចាស់ក្រុមហ៊ុនកើតហេតុខាងលើនេះមានឈ្មោះជា ឡេង ភេទប្រុស អាយុ២៧ឆ្នាំ ។
ក្នុងហេតុការណ៍ខាងលើបណ្តាលឱ្យរងការខូចខាតសម្ភារៈដូចជាថ្នាំបាញ់សំលាប់សត្វល្អិត និងម៉ាស៊ីន
សំអាតផ្ទះមួយចំនួនផងដែរ តែមិនបង្កអោយមានគ្រោះថ្នាក់ ឬរងរបួសដល់មនុស្សណាម្នាក់ឡើយ ។
អគ្គីភ័យខាងលើនេះបានរលត់អស់ទាំងស្រុងនៅវេលាម៉ោង៤ទៀបភ្លឺថ្ងៃដដែល ។ ចំពោះមូលហេតុដែលបង្កឲ្យមានអគ្គិភ័យឆាបឆេះឃ្លាំងស្តុកអីវ៉ាន់ខាងលើ សមត្ថកិច្ចបានសន្និដ្ឋានជាជំហានដំបូងថា បណ្តាលមកពីទុស្សេខ្សែភ្លើង ៕
ចែករំលែកព័តមាននេះ