ទីក្រុងហុងកុង ៖ បណ្ដាមេដឹកនាំនៃចលនាប្រឆាំងក្រុងហុងកុងក្រុមOCCUPY កាលពីថ្ងៃទី៩មេសាទទួលការកាត់ទោស ពីបទបង្កឲ្យមានការរំខាននានាជាសាធារណៈ។ ក្រោយការប្រកាសពីការកាត់ទោសមេដឹកនាំប្រឆាំងទាំង៩នាក់នោះ អ្នកគាំទ្រចលនានេះ ដែលកាលពីឆ្នាំ២០១៤ ក្រឡុកក្រុងហុងកុងជិត៣ខែ ច្រើនសិបនាក់បានលើកគ្នាតវ៉ា។
មេដឹកនាំប្រឆាំង៣រូប សាស្ត្រាចារ្យច្បាប់លោកBENNY TAIអាយុ៥៤ឆ្នាំ សាស្ត្រាចារ្យសង្គមវិទ្យាលោកCHAN KIM MANអាយុ៦០ឆ្នាំនិងគ្រូប្រដៅសាសនាចូលនិវត្តន៍លោកCHU YIU MINGអាយុ៧៥ឆ្នាំ ដែលសុទ្ធតែបដិសេធការចោទប្រកាន់ ត្រូវទទួលការកាត់ទោសពីបទបង្កការរំខានសាធារណៈ។
ម្យ៉ាងវិញទៀតលោកBENNY TAIនិងលោកCHAN KIM MANទទួលការកាត់ទោសពីបទអុជអាលឲ្យប្រព្រឹត្តចលាចលសាធារណៈ។ លោកBENNY TAIមុនការប្រកាសសាលក្រម បាននិយាយទៅកាន់រ៉យទ័រថា យើងនឹងបន្តការតស៊ូរបស់យើងដើម្បីលទ្ធិប្រជាធិបតេយ្យ។ បើយើងប្រព្រឹត្តការបះបោរស៊ីវិល ក៏ព្រោះតែយើងចង់បានយុត្តិធម៌នៅហុងកុង។
អ្នកជាប់ចោទ៦នាក់ទៀតក៏ទទួលការកាត់ទោស ដោយបទចោទប្រកាន់យ៉ាងតិចមួយពីបទរំខានសាធារណៈដែរ។ សម្រាប់ពេលនេះចៅក្រម នៅពុំទាន់ប្រកាសថាតើពួកគេទទួលទោសជាប់គុកឬពិន័យបែបណានៅឡើយ៕
ចែករំលែកព័តមាននេះ