ប្រទេសលីប៊ី់ ៖ ព្រលានយន្តហោះតែមួយគត់នៃទីក្រុងទ្រីប៉ូលីដែលនៅដំណើរការ កាលពីថ្ងៃទី៨មេសា រងការវាយប្រហារតាមអាកាស ពីសំណាក់កងកម្លាំងដែលស្មោះត្រង់នឹងសេនាប្រមុខ KHALIFA HAFTAR ដែលធ្វើការវាយលុកយ៉ាងបង្ហូរឈាមមួយ ប្រឆាំងរដ្ឋធានីលីប៊ីជាការវាយប្រហារ ដែលទទួលការថ្កោលទោសពីសំណាក់អ.ស.ប។
ចាប់តាំងពីថ្ងៃទី៤មេសាមក សេនាប្រមុខរូបនេះជាបុរសខ្លាំងនៃភាគខាងកើតលីប៊ី និងជាមេដឹកនាំកងទ័ពជាតិលីប៊ី បានបើកការវាយលុកធំមួយឆ្ពោះមកកាន់ក្រុងទ្រីប៉ូលី នាំឲ្យមានការប្រយុទ្ធគ្នាយ៉ាងសាហាវ ជាមួយកងកម្លាំងនៃរដ្ឋាភិបាលរួបរួមជាតិ បណ្ដាលឲ្យមនុស្សច្រើនសិបនាក់ស្លាប់ ហើយមនុស្សជាង៣៤០០នាក់រត់ភៀសខ្លួន។
កងកម្លាំងរបស់សេនាប្រមុខHAFTAR អះអាងពីការវាយប្រហារតាមអាកាស ប្រឆាំងព្រលានយន្តហោះMITIGA ស្ថិតនៅជាយក្រុងខាងកើតនៃក្រុងទ្រីប៉ូលី នាំឲ្យមានការផ្អាកភ្លាមៗនៃការហោះហើរ និងការជម្លៀសមនុស្សចេញពីព្រលានយន្តនោះ ទោះបីការវាយប្រហារនេះពុំបណ្ដាលឲ្យមានជនរងគ្រោះក្ដី។
សាក្សីរៀបរាប់ពីការឃើញរណ្ដៅធំមួយមានជម្រៅមួយម៉ែត្រជិតផ្លូវយន្តហោះ និងឃើញឧទ្ធម្ភាគចក្រយោធាចាស់មួយគ្រឿងរងការខូតខាត ដោយការទម្លាក់គ្រាប់បែក។
អ្នកនាំពាក្យម្នាក់នៃកងកម្លាំងភាគខាងកើតលីប៊ី លោកAHMAD AL MESMARI គូសបញ្ជាក់ក្នុងសន្និសីទសារព័ត៌មានមួយថា ការវាយប្រហារតាមអាកាសនេះ សំដៅលើយន្តហោះយោធាធុនMIG-23មួយគ្រឿង និងឧទ្ធម្ភាគចក្រ១គ្រឿង។
បេសកជនអ.ស.បប្រចាំលីប៊ី លោកGHASSAN SALAMEវាយតម្លៃថា ការវាយប្រហារនេះ គឺជាការរំលោភបំពានធ្ងន់ធ្ងរមួយលើច្បាប់មនុស្សធម៌អន្តរជាតិ ដែលហាមឃាត់ការវាយប្រហារ ប្រឆាំងបណ្ដាហេដ្ឋារចនាសម្ព័ន្ធស៊ីវិល។
ទោះបីមានស្រមោលនៃសង្គ្រាមជាទូទៅមួយនៅលីប៊ី ជាប្រទេសសម្បូរប្រេងកំពុងស្ដិតក្នុងភាពច្របូកច្របល់ ក្រោយការផ្ដួលរំលំលោកមូអាម៉ាកាដាហ្វីកាលពីឆ្នាំ២០១១មក ពួកមហាអំណាចនៅតែបរាជ័យ ពុំអាចសម្រេចបានកិច្ចព្រមព្រៀងមួយ នៅអ.ស.បស្ដីពីសេចក្ដីថ្លែងការណ៍មួយ ដែលអំពាវនាវដល់កងកម្លាំងសេនាប្រមុខHAFTARបញ្ឈប់ការវាយលុកប្រឆាំងរដ្ឋធានីលីប៊ី៕
ចែករំលែកព័តមាននេះ